Það er óhætt að segja að frjálsíþróttaárið 2024 hafi verið fjölbreytt, skemmtilegt og árangursríkt, innan vallar sem utan. Það voru sett Íslandsmet, aldursflokkamet og mótsmet, að ógleymdum þvílíkum fjölda persónulegra meta. Fjöldi frábærra móta var haldinn hér innanlands og einnig áttum við fulltrúa í hinum ýmsum keppnum á erlendri grundu, Norðurlandameistaramótum, Evrópumeistaramótum, heimsmeistaramótum og Ólympíuleikum. Það voru ýmsar viðurkenningar veittar til félaga í frjálsíþróttahreyfingunni og var íþróttafólk og sjálfboðaliðar heiðrað á árinu. Það voru jákvæðar fréttir sem bárust hvað aðstöðumál varðar, bæði innanhúss og utanhúss. Það er ekki annað hægt en að skilja sátt við árið 2024 og horfa björtum og jákvæðum augum til ársins 2025 og trúa því að það verði alveg heljarinnar frjálsíþróttaár. Enn einu sinni þakkar Frjálsíþróttasamband Íslands fyrir árið og hlökkum við til áframhaldandi samstarfs, afreka og árangurs á nýju ári.
Stiklum á stóru yfir árið 2024.
Janúar
Innanhúss tímabilið fór heldur betur vel af stað þegar Meistaramót Íslands 15-22 ára fór fram í Laugardalshöllinni helgina 13.-14. janúar. Sett voru sex mótsmet á mótinu, Sindri Karl Sigurjónsson (UMSB) setti aldursflokkamet í 2000 m hlaupi í flokki pilta 15 ára og Eir Chang Hlésdóttir (ÍR) náði lágmarki á EM U18 í 200 m hlaupi. Það var lið HSK/Selfoss sem sigraði stigakeppni félagsliða á mótinu. Hægt er að lesa um það nánar hér.
Í byrjun janúar keppti Guðrún Karítas Hallgrímsdóttir (ÍR) í lóðakasti innanhúss á Virginia Tech Invitational í Bandaríkjunum og bætti þar eigið Íslandsmet þegar hún kastaði 20,37 m og var það einnig nýtt skólamet hjá VCU. Ekki nóg með þetta heldur viku seinna, eða um miðjan janúar gerði Guðrún Karítas sér lítið fyrir og bætti metið aftur um einn og hálfan meter og kastaði lóðinu 21,87 m. Hægt er að lesa nánar um það hér.
Frábær skráning var á Stórmót ÍR sem fram fór í Laugardalshöllinni helgina 20.-21. janúar, og voru það um 750 keppendur sem tóku þátt og voru sett 11 mótsmet á mótinu. Hægt er að lesa nánar um það hér.
Abban, sérstök verðlaun fyrir framúrskarandi framlag til upplyftingar og útbreiðslu frjálsíþrótta, var veitt í fyrsta skipti í upphafi árs og var það Albert Þór Magnússon sem var fyrsti handhafi þeirra. Albert hefur farið á kostum við að lýsa og lyfta upp stemmingu á frjálsíþróttamótum. Abban er veitt til að heiðra minningu Aðalbjargar Hafsteinsdóttur, sem var varaformaður FRÍ, en hún féll frá langt fyrir aldur fram sumarið 2023.
Febrúar
Febrúar byrjaði heldur betur með trompi þegar RIG fór fram í Laugardalshöllinni sunnudaginn 4. febrúar. Þar atti okkar allra fremsta frjálsíþróttafólk kappi við erlenda keppendur og var þetta virkilega flott mót. Segja má að það sem staðið hafi upp úr á RIG var hið frábæra 1500 m hlaup Baldvins Þórs Magnússonar (UFA) þar sem hann bætti 44 ára gamalt Íslandsmet og kom í mark á 3:41,04 og sigraði hlaupið eftir hörkuspennandi keppni við tvo norska hlaupara, Håkon Berg Moe og Kjetil Brenno Gagnås. Hægt er að lesa nánar um RIG hér.
Guðrún Karítas hélt áfram að bæta Íslandsmetið í lóðakasti þennan mánuðinn þegar hún kastaði lóðinu 22,44 m og var það rúmlega hálfs meters bæting.
Meistaramót 11-14 ára fór fram í Laugardalshöllinni helgina 10.-11. febrúar og voru 270 keppendur skráðir til leiks frá 17 félögum um allt land. Sett voru sex mótsmet og hvorki meira né minna en 720 persónuleg met. FH-ingar urðu Íslandsmeistarar félagsliða.
Norðurlandameistaramótið í frjálsíþróttum fór fram sunnudaginn 11. febrúar í Bærum í Noregi og tefldi Ísland fram sameiginlegu liði með Danmörku. Ísland átti 8 keppendur að þessu sinni, sex konur og tvo karla og nældu tvö þeirra í verðlaun í sinni grein, Baldvin Þór Magnússon (UFA) varð í 2. sæti í 3000 m hlaupi og Erna Sóley Gunnarsdóttir (ÍR) varð í 3. sæti í kúluvarpi. Hægt er að lesa nánar um NM hér.
Helgina 17.-18. febrúar fór Meistaramót Íslands fram í Laugardalshöllinni og voru þar sett fjögur mótsmet og fjögur aldursflokkamet. Sindri Karl Sigurjónsson (UMSB) bætti aldursflokkametið í 3000 m hlaupi í flokki pilta 15 ára, Júlía Kristín Jóhannesdóttir (Breiðablik) setti aldursflokkamet í 60 m grindahlaupi í flokki 18-19 ára stúlkna og 20-22 ára og Halldóra Huld Ingvarsdóttir (FH) bætti aldursflokkametið í 1500 m og 3000 m hlaupi í flokki 35-39 ára. Það voru FH-ingar sem urðu Íslandsmeistarar félagsliða og sigruðu þau bæði í kvenna-og karlaflokki. Hægt að lesa nánar um MÍ hér.
Helgina 24.-25. febrúar fór Meistaramót Íslands í fjölþrautum og eldri aldursflokkum fram í Laugardalshöll. Hafsteinn Óskarsson (ÍR) setti Norðurlandamet í 800 m hlaupi í flokki 65-69 ára.
Framfarir, félag um eflingu millivegalengda- og langhlaupa, veitti í febrúar viðurkenningar fyrir unnin afrek á árinu 2023. Baldvin Þór Magnússon (UFA) var besti langhlaupari karla á árinu að mati Framfara fyrir einstaklega frábært ár 2023 en hann var einnig valinn bestur árið 2022. Andrea Kolbeinsdóttir (ÍR) er besti langhlaupari kvenna á árinu að mati Framfara annað árið í röð. Helga Lilja Maack (ÍR) var valin efnilegasti hlaupari í flokki stúlkna og Hilmar Ingi Bernharðsson (ÍR) var valinn efnilegasti hlaupari í flokki pilta. Hægt að lesa skemmtilega frétt um Framfarir og þeirra viðurkenningar hér.
Mars
Mars byrjaði heldur betur með trompi þegar kúluvarparinn Erna Sóley Gunnarsdóttir (ÍR) náði frábærum árangri á HM innanhúss sem fram fór í Glasgow í Skotlandi. Erna Sóley varpaði kúlunni 17,07 m og er þetta hennar besti árangur á stórmóti og hafnaði hún í 14. sæti. Sjá nánar um þetta hér.
Í byrjun mars átti Arnar Logi Brynjarsson (ÍR) heldur betur flott mót þegar hann varð þrefaldur írskur meistari í flokki U18 og náði lágmarki í 200 m hlaupi fyrir EM U18.
Helgina 9.-10. mars fór Evrópubikarkastmótið fram í Leiria í Portúgal og áttum við Íslendingar fimm keppendur á mótinu að þessu sinni. Hera Christensen (FH) keppti í kringlukasti og átti frábært mót þar sem hún tvíbætti aldursflokkametið í flokki 18-19 ára stúlkna. Lesa má nánar um Evrópubikarkastmótið hér.
Um miðjan mars hóf sleggjukastarinn Elísabet Rut Rúnarsdóttir (ÍR) utanhúss tímabilið af krafti þegar hún sigraði UTSA Invitational í San Antonio í Texas á nýju Íslandsmeti þegar hún kastaði sleggjunni 69,11 m. Sjá nánar um þetta hér.
Um miðjan mars var 64. þing Frjálsíþróttasambands Íslands haldið á Sauðárkróki. Á þinginu var Freyr Ólafsson kjörinn formaður í fimmta sinn til tveggja ára. Með Frey í stjórn voru kjörin þau Auður Árnadóttir, Jóhann Haukur Björnsson, Sonja Sif Jóhannsdóttir og Sveinn Margeirsson, auk þeirra Rannveigar Oddsdóttur, Björgvins Víkingssonar, Hjördísar Ólafsdóttur, Hallgríms Egilssonar og Hafdísar Óskar Pétursdóttur sem manna varastjórn. Sjá nánar um þingið hér og hér. Á þinginu voru einnig veittar hinar ýmsu viðurkenningar og voru Gunnar Sigurðsson og Ingimundur Ingimundarson kjörnir heiðursfélagar Frjálsíþróttasambands Íslands. Sjá frétt um heiðursviðurkenningarnar hér.
Um miðjan mars fóru bikarkeppnir FRÍ fram, bæði bikarkepppni 15 ára yngri sem og aðal bikarkeppnin. Það var lið ÍR sem sigraði bikarkeppni 15 ára og yngri og féllu þrjú mótsmet á mótinu. Sjá nánar um það hér. Það var svo lið FH sem urðu bikarmeistarar FRÍ innanhúss og sigruðu þau bæði kvenna-og karlakeppnina. Það féllu einnig þrjú mótsmet í þeirri keppni. Sjá nánar um það hér.
Baldvin Þór Magnússon (UFA) gerði sér lítið fyrir og hljóp á besta tíma tíma frá upphafi í 5 km götuhlaupi þegar hann hljóp á Podium Festival í Leicester í Bretlandi sem fram fór 16. mars.
Það var mikil aldursflokkametaveisla í Torun í Póllandi dagana 17.-23. mars þegar Evrópumeistaramótið innanhúss í eldri aldursflokkum fór þar fram. Bergur Hallgrímsson (Breiðablik) tvíbætti eigið aldursflokkamet í 200 m hlaupi í flokki 40-44 ára. Fríða Rún Þórðardóttir (ÍR) setti aldursflokkamet í 3000 m hlaupi í flokki 50-54 ára og bætti sinn besta árangur.
Guðrún Karítas Hallgrímsdóttir (ÍR) keppti um miðjan mars á Virginia Opener í sleggjukasti og sigraði. Hún bætti sitt persónulega met og bætti einnig skólametið í VCU (Virginia Commonwealth University) er hún kastaði 67,01 m.
Í lok mars var hálfgert sleggjukastseinvígi í Texas þar sem Elísabet Rut Rúnarsdóttir (ÍR) og Guðrún Karítas Hallgrímsdóttir (ÍR) kepptu á Bobcat Invitational í Texas. Þær bættu báðar tveggja vikna gamalt Íslandsmet Elísabetar sem var 69,11 m. Guðrún náði kasti upp á 69,76 m í fjórðu umferð en Elísabet endurheimti Íslandsmetið í sjöttu umferð með kasti upp á 70,33 m. Frábær árangur hjá þessum flottu sleggjukösturum. Lesa má nánar um þetta hér.
Apríl
Þann 6. apríl fór Istria by UTNB hlaupið fram í Króatíu og þar gerði Andrea Kolbeinsdóttir (ÍR) sér lítið fyrir og sigraði 42 km hlaupið nokkuð örugglega og Thelma Björk Einarsdóttir endaði í fjórða sæti. Karlamegin í sama hlaupi hljóp Egill Gunnarsson (UFA) mjög vel og endað í þriðja sæti og stuttu á eftir honum kom Guðlaugur Ari Jónsson (UFA) í mark og endaði í fimmta sæti.
Spjótkastarinn Sindri Hrafn Guðmundsson (FH) byrjaði utanhússtímabilið með trompi fyrstu helgina í apríl þegar hann sigraði á Crimson Tide Invitational í Tuscaloosa í Alabama. Hann kastaði 80,30 m sem er þriðja lengsta kast hans frá upphafi.
Kalott kvöld var haldið 11. apríl en þar hittist landsliðsfólk síðustu aldar og var farið yfir þátttöku Íslands í Kalott keppninni á árunum 1972 til 1983 í máli og myndum. Sjá frétt um Kalott kvöldið hér.
Um miðjan apríl fóru æfingabúðir úrvalshóps FRÍ fram og voru yfir 60 af okkar efnilegasta frjálsíþróttafólki sem tóku þátt ásamt fjölda þjálfara. Helgin heppnaðist með eindæmum vel enda alltaf gaman þegar svona flottur hópur íþróttafólks kemur saman til æfinga og skemmtunar. Hægt er að lesa nánar um æfingabúðirnar hér.
Á sumardaginn fyrsta fór Víðavangshlaup ÍR fram í miðbæ Reykjavíkur, og samhliða því fór fram Meistaramót Íslands í 5 km hlaupi. Í kvennaflokki var það Andrea Kolbeinsdóttir (ÍR) sem sigraði í kvennaflokki á tímanum 16:39 mín. sem er annar besti tími kvenna frá upphafi. Það var Þorsteinn Roy Jóhannsson (FH) sem sigraði karlaflokkinn á tímanum 15:24 mín. Sjá nánar um Víðavangshlaup ÍR hér.
Apríl endaði á flottu afreki hjá honum Baldvini Þór Magnússyni (UFA) þegar hann bætti eigið Íslandsmet í 5000 m hlaupi á Spáni.
Maí
Í maí hlaut sleggjukastarinn Guðrún Karítas Hallgrímsdóttir (ÍR) viðurkenninguna Athlete of the Year og Moment of the Year á the Rodney Awards en það er árleg verðlaunahátið sem haldin er í Virginia Commonwealth University.
Sindri Hrafn Guðmundsson (FH) hélt áfram að standa sig með stakri prýði í spjótkastinu en í byrjun maí bætti hann sig um 30 sentímetra þegar hann kastaði 81,21 m, en það er lengsta kast hans síðan árið 2018.
Helgina 18.-19. maí fór Norðurlandameistaramótið í frjálsíþróttum fram í Malmö í Svíþjóð og átti Ísland 17 keppendur á mótinu að þessu sinni og náðu þau mörg hver alveg frábærum árangri. Þar ber kannski hæst glæsilegt Íslandsmet Daníels Inga Egilssonar (FH) í langstökki þegar hann stökk 8,21 m og bætti 30 ára gamalt Íslandsmet Jóns Arnars um 21 cm. Þetta stökk tryggði Daníel Inga Norðurlandameistaratitilinn og einnig keppnisrétt á Evrópumeistaramótinu í Róm. Glæsilegur árangur. Auk Daníels Inga urður þau Aníta Hinriksdóttir (FH) og Guðni Valur Guðnason (ÍR) einnig Norðurlandameistarar, Aníta í 1500 m hlaupi og Guðni í kringlukasti. Auk þessa er vert að nefna árangur Birtu Maríu Haraldsdóttur (FH) í hástökki en hún bætti sig um fjóra sentímetra og stökk 1,87 m og var því aðeins einum sentímetra frá 34 ára gömlu Íslandsmeti Þórdísar Lilju Gísladóttur. Hægt að lesa nánar um þennan frábæra árangur hér.
Júní
Í byrjun júní fór Evrópumeistaramótið í utanvegahlaupum fram í Annecy í Frakklandi og Ísland sendi lið til keppni í fyrsta sinn og stóð hlaupararnir sig frábærlega, kvennaliðið hafnaði í sjötta sæti í landsliðskeppninni og karlaliðið í ellefta sæti. Um var að ræða braut sem er 58 km með 3500 m hækkun. Frábær árangur í fyrstu EM keppninni sem Ísland tekur þátt í. Hægt er að lesa nánar um það hér.
Evrópumeistaramótið í frjálsíþróttum fór fram í Róm á Ítalíu dagana 7.-12. júní og átti Ísland átta keppendur í ár sem er mesti fjöldi í 66 ár, eða síðan á EM 1958. Það voru glæsilegir fulltrúar sem tryggðu sér lágmark á EM í Róm og stóð íþróttafólkið okkar sig með stakri prýði og nýir fulltrúar sýndu að þau eiga sannarlega heima á stóra sviðinu. Á EM í Róm keppti eftirtalið íþróttafólk:
- Dagbjartur Daði Jónsson (ÍR) – Spjótkast
- Daníel Ingi Egilsson (FH) – Langstökk
- Elísabet Rut Rúnarsdóttir (ÍR) – Sleggjukast
- Erna Sóley Gunnarsdóttir (ÍR) – Kúluvarp
- Guðni Valur Guðnason (ÍR) – Kringlukast
- Guðrún Karítas Hallgrímsdóttir (ÍR) – Sleggjukast
- Hilmar Örn Jónsson (FH) – Sleggjukast
- Sindri Hrafn Guðmundssin (FH) – Spjótkast
Aðeins 30 keppendur fengu keppnisrétt í þessum greinum og því mikið afrek að komast á þann lista. Þetta var fyrsta stórmót í fullorðinsflokki hjá Daníel, Dagbjarti, Elísabetu og Guðrúnu. Sindri keppti á EM árið 2018 í Berlín en Guðni, Hilmar og Erna eru komin með meiri stórmótareynslu og kepptu öll á EM í München árið 2022.
Áður en þær Elísabet Rut og Guðrún Karítas drifu sig til Rómar til að keppa á EM, þá kepptu þær í sleggjukasti á Bandaríska Háskólameistaramótinu sem fram fór í Oregon. Elísabet Rut sigraði sleggjukast kvenna og bætti eigið Íslandsmet í þriðja sinn á tímabilinu er hún kastaði sleggjunni 70,47 m. Guðrún Karítas endaði í fimmta sæti með kast upp á 69,12 m. Hægt er að lesa nánar um það hér.
Norðurlandameistaramótið í fjölþrautum var haldið á ÍR vellinum í Skógarseli helgina 15.-16. júní. Ísland valdi átta íþróttamenn til keppni að þessu sinni, í flokki fullorðinna, U20 og U18. Íslands eignaðist einn Norðurlandameistara þegar hún Ísold Sævarsdóttir gerði sér lítið fyrir og sigraði sjöþraut stúlkna U18 á nýju persónulegu meti og hlaut hún 5583 stig.
Helgina 21.-23. júní fór Meistaramót Íslands 15-22 ára fram á Selfossvelli og var það lið HSK/Selfoss sem sigraði stigakeppni félagsliða með miklum yfirburðum. Það var eitt aldursflokkamet slegið á mótinu en það var hann Tobías Þórarinn Matharel (UFA) sem bætti átta ára gamalt aldursflokkamet í 100m grindahlaupi (84 cm) í flokki pilta 15 ára. Auk þess þá voru átta mótsmet slegin og hvorki meira né minna en 262 persónulegar bætingar. Hægt er að lesa nánar um það hér. Þess má til gamans geta að Frjálsíþróttaráð HSK hlaut viðurkenningu fyrir MÍ 15-22 sem viðburður ársins á uppskeruhátíð FRÍ núna í byrjun desember Viðurkenninguna hlutu þau fyrir virkilega faglega framkvæmd innan vallar við mótið sjálft, en enn frekar fyrir mikilvæga skemmtun og samveru fyrir utan mót, sem er öðrum til fyrirmyndar.
Sömu helgi, eða laugardaginn 22. júní, fór Smáþjóðameistaramótið fram á Gíbraltar í brakandi blíðu og þar voru gullin heldur betur sótt. Íslendingar settu tvö mótsmet, eitt aldursflokkamet og níu verðlaunapeningar komu í hús, þar af sjö gullverðlaun. Þær Birna Kristín Krisjánsdóttir (Breiðablik) og Ingibjörg Sigurðardóttir (ÍR) settu mótsmet, Birna í langstökki og Ingibjörg í 400 m grindahlaupi. En Birna Kristín setti einnig aldursflokkamet í langstökki í flokki 20-22 ára með stökki sínu upp á 6,46 m. Hægt er að lesa nánar um það hér.
Síðustu helgina í júlí fór Meistaramót Íslands fram á Akureyri og voru það FH-ingar sem stóðu uppi sem sigurvegarar í stigakeppni félagsliða, og sigruðu einnig stigakeppni í kvenna-og karlaflokki. Sett voru tvö Íslandsmet á mótinu, Erna Sóley Gunnarsdóttir (ÍR) sem bætti eigið Íslandsmet í kúluvarpi þegar hún kastaði 17,91 m og Irma Gunnarsdóttir (FH) sem bætti eigið Íslandsmet í þrístökki þegar hún stökk 13,61 m. Auk þessa þá voru sett sjö mótsmet á mótinu. Hægt er að lesa nánar um það hér.
Júlí
Meistaramót Íslands í 10 km götuhlaupi fór fram 2. júlí samhliða Ármanshlaupinu. Það voru þau Andrea Kolbeinsdóttir (ÍR) og Arnar Pétursson (Breiðablik) sem komu fyrst í mark í kvenna-og karlaflokki og hlutu Íslandsmeistaratitlana. Hægt er að lesa nánar um það hér.
Örfáum dögum seinna, 5. júlí, urðu þau Andrea og Arnar aftur Íslandsmeistarar og nú í hálfu maraþoni, en Meistaramót Íslands í hálfu maraþoni fór fram samhliða Akureyrarhlaupinu. Tíminn hennar Andreu, 01:15:59 er persónuleg bæting og einnig annar besti tími íslenskrar konu í hálfmaraþoni frá upphafi. Hægt er að lesa nánar um það hér.
Í byrjun júlí var lokahópur þeirra keppenda sem færu á Ólympíuleikana í París kynntur til leiks og þá kom í ljós að kúluvarparinn Erna Sóley Gunnarsdóttir (ÍR) yrði þar á meðal. Erna var með þessu fyrsti íslenski kúluvarparinn til að taka þátt í Ólympíuleikunum. Hægt er að lesa nánar um það hér og hér.
Helgina 13.-14. júlí fór Meistaramót Íslands 11-14 ára fram á Laugum og var það lið HSK/Selfoss sem sigraði stigakeppni félagsliða nokkuð örugglega. Eitt aldursflokkamet var slegið á mótinu en það var Sigurður Ari Orrason (ÍR) sem hljóp 80 m grindahlaup í flokki pilta 13 ára á nýju meti. Auk þessa voru slegin sjö mótsmet og fjöldi persónulegra bætinga. Hægt er að lesa nánar um það hér.
Evrópumeistaramót U18 fór fram í Banská Bystrica í Slóvakíu dagana 18.-21. júlí og þar átti Ísland þrjá keppendur. Ísold Sævarsdóttir (FH) setti aldursflokkamet í sjöþraut í flokki 16-17 ára stúlkna með meyjaáhöldum, og hafnaði í 5. sæti með 5643 stig. Hægt er að lesa nánar um það hér.
Í lok júlí var Baldvin Þór Magnússon (UFA) fyrstur Íslendinga til að hlaupa 1500 m undir 3 mínútum og 40 sekúndum þegar hann hljóp vegalengdina á 3:39,90 og bætti þar með eigið Íslandsmet. Hægt er að lesa nánar um það hér.
Síðustu helgina í júlí fór fram Íslandsmeistaramótsþrenna í Kaplakrika þegar þar fóru fram Meistaramót Íslands í fjölþrautum, 10000 m hlaupi og eldri aldursflokkum. Hægt er að lesa nánar um það hér.
Ágúst
Erna Sóley Gunnarsdóttir (ÍR) keppti í kúluvarpi á Ólympíuleikunum í París þann 8. ágúst og var þar með fyrst íslenskra kvenna til að keppa í kúluvarpi á leikunum. Hennar lengsta kast í keppninni kom í annarri umferð og var það 17,39 m en Erna Sóley átti mjög jafna og góða kastseríu og endaði í 20. sæti. Frábær árangur á hjá Ernu Sóley á sínum fyrstu Ólympíuleikum. Hægt er að lesa nánar um það hér.
Helgina 10.-11. ágúst fór Norðurlandamót U20 fram í Danmörku, og tefldu Ísland og Danmörk fram sameiginlegu liði og voru 10 íslenski keppendur. Íslensku keppendurnir nældu í fern verðlaun á mótinu, tvö gull og tvö brons. Hera Christensen (FH) varð Norðurlandameistari í kringlukasti og Eir Chang Hlésdóttir (ÍR) varð Norðurlandameistari í 200m hlaupi. Einnig nældi Eir sér í brons í 400 m hlaupi sem og Guðjón Dunbar D. Þorsteinsson (Breiðablik) sem hafnaði í þriðja sæti í þrístökki. Hægt er að lesa nánar um það hér.
Bikarkeppni FRÍ fór fram á Kópavogsvelli 17. ágúst og voru það FH-ingar sem stóðu uppi sem sigurvegar, en FH vann heildarstigakeppnina sem og stigakeppnina í kvenna-og karlaflokki. Sett voru tvö aldursflokkamet. Kringlukastarinn Hera Christensen (FH) bætti eigið aldursflokkamet í flokki stúlkna 18-19 ára og Bryndís Embla Einarsdóttir bætti eigið aldursflokkamet í spjótkasti í flokki 15 ára stúlkna. Auk þessa voru sett þrjú mótsmet. Hægt er að lesa nánar um það hér.
Á sama tíma og á sama stað fór Bikarkeppni 15 ára og yngri fram og var það lið UFA sem sigraði stigakeppnina eftir spennandi keppni við ÍR-inga. Hægt er að lesa nánar um það hér.
Heimsmeistaramótið í eldri aldursflokkum fór fram í Gautaborg í Svíþjóð dagana 13.-25. ágúst og átti Íslands nokkra flotta fulltrúa þar. Hægt er að lesa nánar um það hér.
Í lok ágúst fór Heimsmeistaramót U20 fram í Lima í Perú og þar átti Íslands tvo fulltrúa, þær Heru Christensen (FH) sem keppti í kringlukasti og Eir Chang Hlésdóttir (ÍR) sem keppti í 400 m hlaupi. Hægt er að lesa nánar um það hér.
September
Í byrjun september var undirrituð sameiginleg viljayfirlýsing um framtíðaruppbyggingu þjóðarleikvanga fyrir frjálsíþróttir og knattspyrnu í Laugardals. Um var að ræða fyrsta skrefið að uppbyggingu tveggja aðskilinna þjóðarleikvanga utanhúss í Laugardal. Hægt er að lesa nánar um það hér.
Október
Bronsleikar ÍR fóru fram 5. október en þeir eru haldnir árlega til heiðurs ÍR-ingnum Völu Flosadóttur og bronsverðlaununum sem hún vann í stangarstökki á Ólympíuleikunum í Sydney árið 2000. Heiðursgestur á Bronsleikunum að þessu sinni var nýjasti Ólympíufarinn, kúluvarparinn Erna Sóley Gunnarsdóttir.
Laugardaginn 12. október fóru Krakkaleikarnir fram í fyrsta sinn í Lindexhöllinni á Selfossi en þeir byggja á Kids’ Athletics prógrammi Alþjóða frjálsíþróttasambandsins. Mikið líf og fjör var á Selfossi og ekki annað að sjá en að þátttakendur hafi skemmt sér vel. Hægt er að lesa nánar um það hér.
Meistaramót Íslands í víðavangshlaupum fór fram laugardaginn 19. október í Laugardalnum og var það lokaviðburðurinn í skemmtilegu víðavangshlaupahausti. Það voru þau Arnar Pétursson (Breiðablik) og Íris Dóra Snorradóttir (FH) sem komu fyrst í mark og hlutu Íslandsmeistaratitlana í karla-og kvennaflokki. Hægt er að lesa nánar um það hér.
Laugardaginn 26. október fór Meistaramót Íslands í maraþoni fram, samfara Haustmaraþoni Félags maraþonhlaupara. Það voru þau Arnar Pétursson (Breiðablik) og Linda Heiðarsdóttir (ÍR) sem komu fyrst í mark og urður þar með Íslandsmeistara í maraþoni karla og kvenna. Hægt er að lesa nánar um það hér.
Á sama tíma í Elliðaárdalnum, fór fram í fyrsta sinn hið stórskemmtilega Fjölskylduhlaup TM. Það voru tæplega 300 hlauparar sem hlupu um Elliðaárhólmann í mikilli stemmingu. Íþróttaálfurinn og vinir hans úr Latabæ mættu á svæðið og hlupu með krökkunum og veittu krakkarnir Íþróttaálfinum svaka samkeppni í brautinni. Krakkarnir stóðu sig svakalega vel og komu brosandi og sæl í mark og fengu öll medalíu og allskonar glaðning frá TM. Vonandi er þetta hlaup komið til að vera.
Nóvember
Norðurlandameistaramótið í víðavangshlaupum fór fram í Vantaa í Finnlandi sunnudaginn 10. nóvember. Ísland átti sex fulltrúa á mótinu í ár, þau Baldvin Magnússon (UFA), Arnar Pétursson (Breiðablik), Stefán Kára Smárason (Breiðablik), Sigþóru Brynju Kristjánsdóttur (UFA), Írisi Dóru Snorradóttur (FH) og Helgu Lilju Maack (ÍR). Hægt er að lesa nánar um það hér.
Silfurleikar ÍR voru að venju fram um miðjan nóvember en þeir er haldnir til heiðurs Vilhjálmi Einarssyni og silfurverðlaunum hans í þrístökki frá Ólympíuleikunum í Melbourne í Ástralíu. Sonur Vilhjálms, spjótkastarinn Einar Vilhjálmsson, var heiðursgestur á Silfurleikunum í ár.
Mánudaginn 25. nóvember stóðu FRÍ og frjálsíþróttadeild Breiðabliks fyrir skemmtilegum viðburði með ítalska frjálsíþróttaþjálfaranum Andrea Uberti, sem er núverandi þjálfari langstökkvarans Birnu Kristínar Kristjánsdóttur. Hægt er að lesa nánar um það hér.
Desember
Uppskeruhátíð Frjálsíþróttasambands Íslands fór fram 5. desember og voru þar veittar viðurkenningar fyrir afrek og árangur ársins. Þar ber helst að nefna að frjálsíþróttafólk ársins 2024 voru kúluvarparinn Erna Sóley Gunnarsdóttir (ÍR) og langstökkvarinn Daníel Ingi Egilsson (FH), en þau áttu alveg frábært ár á frjálsíþróttavellinum. Hægt er að lesa nánar um það hér.
Baldvin Þór Magnússon (UFA) var meðal keppenda á Evrópumeistaramótinu í víðavangshlaupum sem fram fór í Antalya í Tyrklandi 10. desember og hafnaði hann þar í 47. sæti. Hægt er að lesa nánar um það hér.
Um miðjan desember bárust þau gleðitíðindi að frjálsíþróttahöllin í Laugardalnum hefur hlotið vottun frá Alþjóða frjálsíþróttasambandinu, eftir að umfangsmiklum endurbótum þar lauk núna í byrjun haust. Vottunin sem um ræðir er „WA certification for indoor facilities“. Þetta þýðir að frjálsíþróttahöllin er nú í sama gæðaflokki og þekkist annarsstaðar í heiminum og uppfyllir kröfur sem gerðar eru til keppnisaðstöðu. Hægt er að lesa nánar um það hér.
Í desember var skipaður starfshópur um uppbyggingu þjóðarleikvangs í frjálsíþróttum í Laugardal og er skipaður sbr. Viljayfirlýsingu sem undirrituð var 2. september. Hægt er að lesa nánar um það hér.
Langhlaupanefnd FRÍ tilkynnti um þá hlaupara sem munu skipa landslið Íslands á heimsmeistaramótinu í utanvegahlaupum sem fer fram í Canfranc á Spáni næsta haust, 25.-28. september. Hægt er að lesa nánar um það hér.
