Frjálsíþróttasamband Íslands vinnur nú að því að fá betri mynd af hlaupasamfélaginu á Íslandi og hvernig hægt er að styðja betur við almennt hlaupastarf, hlaupahópa og hlaupara um land allt.
Í þeirri vinnu hefur FRÍ útbúið stutta könnun fyrir hlaupara. Markmiðið er að fá betri innsýn í hvernig fólk stundar hlaup, hvað skiptir mestu máli við hlaupaþjálfun og þátttöku í hlaupum, hvaða upplýsingar og þjónusta nýtast hlaupurum best og hvernig FRÍ getur þróað þjónustu sína áfram.
Könnunin er ætluð öllum sem stunda hlaup, óháð því hvort viðkomandi hleypur einn, með vinum, í hlaupahópi eða innan íþróttafélags.
Meðal annars er spurt um:
- hvernig fólk stundar hlaup og hversu oft,
- þátttöku í hlaupahópum og hlaupaviðburðum,
- hvaðan fólk fær upplýsingar um hlaup,
- hvaða þjónusta og upplýsingar myndu nýtast betur,
- áhuga á Meistaramótum Íslands og formlegri tengingu við frjálsíþróttastarf,
- og hvað FRÍ gæti gert betur fyrir almenna hlaupara.
Svörin eru nafnlaus og verða eingöngu notuð í tengslum við rannsóknina og þróunarvinnu FRÍ. Ekki er óskað eftir nafni, kennitölu eða öðrum persónugreinanlegum upplýsingum.
Könnunin tekur aðeins nokkrar mínútur að svara.
Hlaupahópar á Íslandi
FRÍ vinnur jafnframt að nýrri skrá yfir hlaupahópa á Íslandi með það að markmiði að auðvelda fólki að finna hlaupahóp við hæfi.
Í skránni verður hægt að leita að hlaupahópum eftir meðal annars landsvæði og bæjarfélagi og sjá upplýsingar um staðsetningu, æfingaaðstöðu, tegund hlaupa og tengsl hópsins við íþróttafélag og FRÍ.
FRÍ hefur þegar hafið kortlagningu hlaupahópa en listinn er enn í vinnslu.
Vantar hlaupahóp á listann eða þarf að uppfæra upplýsingar um hópinn þinn?
Sendið okkur upplýsingar á skrifstofa@fri.is.
Samhliða þessari vinnu hefur FRÍ verið að byggja upp betra yfirlit yfir hlaupastarf og upplýsingar fyrir hlaupara.
Hlaupadagskrá FRÍ
Í hlaupadagskrá FRÍ má finna upplýsingar um vottuð götuhlaup, dagsetningar, vegalengdir, skráningu, úrslit og tengla á nánari upplýsingar hjá hlaupahöldurum.
FRÍ dagatalið
Í FRÍ dagatalinu er hægt að fylgjast með mótum, hlaupum og öðrum viðburðum á vegum frjálsíþróttahreyfingarinnar. Hægt er að hanna sitt eigið dagatal og bæta því við eigið dagatal og fylgjast þannig auðveldlega með því sem er fram undan.
Markmiðið með þessari vinnu er að gera fri.is að gagnlegri upplýsingamiðstöð fyrir hlaupara, hlaupahópa og hlaupahaldara og auðvelda fólki að finna bæði samfélag, viðburði og upplýsingar sem tengjast hlaupum á Íslandi.
FRÍ hvetur hlaupara til að taka þátt og deila könnuninni áfram til annarra sem stunda hlaup.