Meistaramót Íslands í víðavangshlaupi fer fram í Kjarnaskógi á Akureyri laugardaginn 17. október. Þar verður keppt um Íslandsmeistaratitla í öllum aldursflokkum barna og fullorðinna, en mótið er jafnframt öllum opið og hlauparar af öllum getustigum hvattir til að taka þátt.
Kjarnaskógur býður upp á flottar aðstæður fyrir víðavangshlaup. Hlaupið fer fram á 1,67 km hring. Brautin er hæðótt og ræsing og mark verða við tjaldsvæðið í Kjarnaskógi.
Fyrsta ræsing dagsins verður kl. 10:00 þegar almennur 5 km flokkur og Íslandsmeistaramót í eldri aldursflokkum fara af stað.
Í almenna flokknum geta allir tekið þátt óháð félagsaðild. Keppendur 40 ára og eldri geta jafnframt keppt um Íslandsmeistaratitil í sínum aldursflokki í 5 km hlaupinu. Til að geta unnið Íslandsmeistaratitil í eldri aldursflokki þarf keppandi að uppfylla skilyrði FRÍ um félagsaðild og félagsbúning.
Að því loknu tekur við keppni í yngri aldursflokkum. Deginum lýkur síðan með 10 km Meistaramóti Íslands karla og kvenna kl. 11:45.
Dagskrá
| Keppnisflokkar | Vegalengd | Ræst kl. |
|---|---|---|
| Almennur flokkur (#) | 5 km | 10:00 |
| Karlar og konur í eldri aldursflokkum | 5 km | 10:00 |
| Piltar og stúlkur 12 ára og yngri | 1,7 km | 10:35 |
| Piltar og stúlkur 13-14 ára | 3,4 km | 10:50 |
| Piltar og stúlkur 15-17 ára | 5 km | 11:15 |
| Piltar og stúlkur 18-19 ára | 5 km | 11:15 |
| Karlar og Konur 20 ára og eldri | 10 km | 11:45 |
Keppnisréttur og félagsaðild
Öllum er heimilt að taka þátt í Víðavangshlaupi Íslands.
Keppendur 17 ára og yngri þurfa hvorki að vera skráðir í aðildarfélag FRÍ né keppa í félagsbúningi til að geta unnið Íslandsmeistaratitil í sínum aldursflokki.
Keppendur 18 ára og eldri þurfa að vera skráðir í aðildarfélag FRÍ og keppa í félagsbúningi til að geta unnið til MÍ-verðlauna.
Þeir sem uppfylla ekki þau skilyrði geta engu að síður tekið þátt í hlaupunum en telja ekki til sæta á Íslandsmeistaramótinu.
Verðlaun
Gullverðlaun verða veitt fyrir fyrsta sæti í hverjum aldursflokki samkvæmt aldursflokkaskipan FRÍ.
Keppt verður meðal annars í eftirfarandi aldursflokkum:
- 12 ára – piltar og stúlkur
- 13 ára – piltar og stúlkur
- 14 ára – piltar og stúlkur
- 15 ára – piltar og stúlkur
- 16–17 ára – piltar og stúlkur
- 18–19 ára – piltar og stúlkur
- 20–22 ára – karlar og konur
- 23–39 ára – karlar og konur
- 40–44 ára og áfram í eldri aldursflokkum samkvæmt reglugerð FRÍ
Meistaramót Íslands karla og kvenna fer fram í 10 km hlaupinu kl. 11:45. Þar verða veitt gull-, silfur- og bronsverðlaun fyrir fyrstu þrjú sæti karla og fyrstu þrjú sæti kvenna.
Keppni um Íslandsmeistaratitla barna, unglinga og eldri aldursflokka fer fram í styttri vegalengdum.
Sveitakeppni
Keppt verður í sveitakeppni innan keppnisflokka mótsins. Þrír keppendur mynda sveit samkvæmt reglum FRÍ.
Skráning
Skráning fer fram á netskraning.is og verður hægt að skrá sig allt þar til einni klukkustund fyrir fyrstu ræsingu.
Skráningargjald er 1.500 krónur fyrir keppendur 13 ára og eldri en þátttaka er ókeypis fyrir 12 ára og yngri.
Keppnisgögn, keppnisnúmer og nælur verða afhent á keppnisstað.
Aðkoma og keppnisstaður
Ræsing og mark verða við tjaldsvæðið í Kjarnaskógi.
Mótstjóri er Þorbergur Ingi Jónsson og yfirdómari verður tilnefndur af Frjálsíþróttasambandi Íslands.
Frekari upplýsingar má fá hjá Þorbergi Inga Jónssyni í gegnum netfangið fjallahlaupathjalfun@gmail.com.
Víðavangshlaup reyna á aðra þætti en hefðbundin brautar- og götuhlaup þar sem undirlag, brekkur, beygjur og taktík geta haft mikil áhrif á keppnina. Framundan er því fjölbreyttur keppnisdagur í Kjarnaskógi þar sem bæði reyndir keppendur og þeir sem vilja prófa víðavangshlaup geta tekið þátt.
Sjá upplýsingar um mót hér