Það þarf ekki stórt félag eða fullkomna aðstöðu til að byggja upp öflugt frjálsíþróttastarf. Hjá HHF í Vesturbyggð hafa eljusemi, metnaður og áhugi á að skapa börnum tækifæri til íþróttaiðkunar skilað góðum árangri. Krakkarnir eru dugleg að mæta á mót, sjálfstraustið eykst og einn iðkandi hefur nú komist í Úrvalshóp FRÍ. Birna Hannesdóttir, þjálfari og formaður HHF, segir frá starfinu, áskorununum og því sem hefur reynst best við að byggja það upp.
Fyrir um fjórum árum hófst nýr kafli í frjálsíþróttastarfinu hjá HHF þegar hjónin Birna og Ásgeir ákváðu að taka málin í sínar hendur. Eftir Unglingalandsmót kviknaði áhuginn á að koma af stað öflugra starfi svo börnin þeirra gætu stundað frjálsíþróttir á heimaslóðum.
„Hvatinn hjá okkur var að börnin okkar gætu verið í íþróttum. Það dró þetta af stað,“ segir Birna, sem hafði áður reynslu af þjálfun á svæðinu en tók sér hlé frá þjálfun eftir að hún eignaðist börn.
Þegar þau tóku við starfinu voru aðeins tveir strákar að æfa og erfitt hafði reynst að fá þjálfara. Þau byrjuðu með æfingar þrisvar í viku og byggðu starfið upp jafnt og þétt. Í dag hefur hópurinn stækkað og fleiri börn hafa bæst í hópinn.
Mótin stærsta gulrótin
Birna segir þátttöku í mótum hafa skipt sköpum við að byggja upp starfið og halda krökkunum áhugasömum.
„Við vorum fyrst bara að fara með okkar krakka því það var einhvern veginn enginn búinn að hoppa á vagninn. Svo fór einn og einn að slæðast með. Að lokum var þetta orðið þannig að allir vildu fara með, enda var verið að fara svo oft á mót. Það er svolítið gulrótin.“
Ferðirnar snúast þó ekki eingöngu um keppni. HHF hefur átt gott samstarf við stærri félög á höfuðborgarsvæðinu, meðal annars FH og ÍR. Krakkarnir fá tækifæri til að æfa við góðar aðstæður hjá FH og síðan er farið á mót eða gert eitthvað skemmtilegt saman.
„Við reynum að gera ferð úr þessu. Þetta finnst þeim skemmtilegast.“
Þegar stærri mót eru fram undan reynir hópurinn jafnvel að fara suður degi fyrr til að ná æfingu áður en keppni hefst. Einnig hefur hópurinn farið í æfingabúðir og æfingahelgar. Samstarfið við FH hefur þar reynst afar mikilvægt.
Þátttakan í mótum og æfingaferðunum hefur skilað sér í auknu sjálfstrausti hjá krökkunum og þau hafa fengið meiri reynslu af því að keppa. Á tveggja ára fresti heldur hópurinn einnig til Gautaborgar á Gautaborgarleikana. Áður en haldið er utan þurfa iðkendurnir að hafa tekið þátt í mótum hér heima og öðlast reynslu af keppni.
Árangurinn lætur ekki á sér standa
Í dag æfa um 15 börn í eldri hópnum, sem nær yfir 5.–10. bekk, og um 12 börn í yngri hópnum, í 1.–4. bekk. Birna segir mikilvægt að byggja upp traustan kjarna iðkenda, þótt alltaf bætist einhverjir við og aðrir hætti.
„Það byggist mikið á foreldrunum. Við viljum auðvitað fá fleiri krakka til að æfa.“
Árangurinn sem hópurinn hefur náð sýnir að starfið er að skila sér. Þau hafa unnið marga Íslandsmeistaratitla ásamt því að einn iðkandi hefur náð þeim árangri að komast í Úrvalshóp FRÍ í hástökki og annar iðkandi setti Íslandsmet í kúluvarpi. Birna leggur áherslu á að markmiðið sé að bjóða upp á góða frjálsíþróttaþjálfun, þar sem iðkendurnir fái tækifæri til að ná eins langt og þeir vilja.
„Aðstaðan er ekki hindrun fyrir þau yngstu, en við finnum meira fyrir henni þegar krakkarnir eru komnir lengra í frjálsíþróttunum. Maður reynir eins og maður getur.“
Unnið að bættri aðstöðu
Æfingar fara fram á Patreksfirði. Innanhússaðstaðan er ekki fullkomin og lítið geymslupláss gerir undirbúning æfinga tímafrekan. Einnig er erfitt að taka langa spretti í íþróttahúsinu og ýmsar takmarkanir koma í veg fyrir að hægt sé að æfa allar greinarnar eins og best væri á kosið yfir vetrartímann.
Á sumrin hefur hins vegar verið unnið markvisst að uppbyggingu útiaðstöðunnar. Þar er tartan fyrir hástökk og langstökk og nýlega fékkst styrkur frá Vesturbyggð til að bæta við tartani fyrir 60 metra hlaupabraut. Vonir standa einnig til að lengja tartansvæðið fyrir hástökk og spjótkast næsta sumar.
„Krakkarnir bíða eftir að komast út að æfa, kasta spjóti og æfa allar greinarnar.“
Uppbyggingin tekur tíma en Birna segir mikilvægt að halda áfram að bæta aðstöðuna jafnt og þétt. Framtíðardraumurinn er einnig að fá betri innanhússaðstöðu, enda fer stór hluti ársins í æfingar innandyra.
Samstaða og stuðningur byggja upp starfið
Starfið byggist að stórum hluta á sjálfboðaliðavinnu og stuðningi foreldra og fyrirtækja á svæðinu. HHF hefur verið heppið með styrki frá fyrirtækjum á svæðinu, meðal annars til að standa straum af kostnaði við þjálfara í mótaferðum. Jafnframt er unnið að því að efla stuðning frá sveitarfélaginu.
Skipulagið skiptir einnig miklu máli. Hópurinn heldur úti sérstöku íþróttadagatali svo fjölskyldur geti skipulagt ferðir til Reykjavíkur í kringum mót og nýtt ferðalögin í fleira en keppnina sjálfa.
Birna segir að það sé mikilvægt að gera sér grein fyrir því hversu miklu máli íþróttastarf skipti fyrir samfélög á landsbyggðinni.
„Þetta er ekki sjálfgefið, að hafa íþróttastarf á svæðinu. Það er svo mikils virði fyrir sveitarfélagið.“
HHF hefur jafnframt hlotið viðurkenninguna Fyrirmyndarhérað ÍSÍ, sem er mikilvægur áfangi í uppbyggingu íþróttastarfsins.
„Byrja bara einhvers staðar“
Aðspurð hvaða ráð hún myndi gefa öðrum sem vilja hefja frjálsíþróttastarf þar sem aðstaðan er takmörkuð, segir Birna að mikilvægast sé einfaldlega að byrja.
„Það eru allir í frjálsíþróttasamfélaginu til í að aðstoða. Byrja bara einhvers staðar. Þó að grunnurinn sé ekki til staðar eða aðstaðan, þá er hægt að leita eftir aðstoðinni og fá hana. Allir eru tilbúnir að hjálpa.“
Starf HHF sýnir vel hvað hægt er að áorka með áhuga, metnaði og góðri samvinnu. Með áframhaldandi uppbyggingu og stuðningi eru spennandi tækifæri til að efla frjálsíþróttastarfið enn frekar í Vesturbyggð á komandi árum.
Við hjá FRÍ viljum hvetja einstaklinga, félög og sveitarfélög sem hafa áhuga á að byggja upp eða efla frjálsíþróttastarf til að hafa samband. Við viljum gjarnan styðja við bakið á þeim sem hafa áhuga á að koma starfinu af stað og skapa börnum og ungmennum fleiri tækifæri til að stunda frjálsíþróttir.
Við hlökkum til að fylgjast með áframhaldandi uppbyggingu hjá HHF og sjá frjálsíþróttastarfið vaxa og dafna um land allt. Áfram frjálsar!