Ísland átti þrjá keppendur á NM í víðavangshlaupum í Växjö í sænsku Smálöndunum í gær. Helga Lilja Maack, Davíð Freyr Magnússon og Sindri Karl Sigurjónsson, öll í ÍR, kepptu í 5km í U20 aldursflokkum.
Helga hóf keppni fyrst og var í góðri baráttu við dönsku stelpurnar fram á þriðja hring, þegar hún þurfti að gefa eftir. Hún endaði að lokum í 15. sæti. Strákunum gekk betur og höfnuðu í 22. og 26. sæti eftir að hafa báðir verið í hörkubaráttu allan tímann. Þetta mót er alla jafna firnasterkt og margir hlauparar hafa tekið þar þátt sem endað hafa í Evrópu- og jafnvel heimsklassa.
Aðstæður voru frábærar, hæglætisveður og brautin afar skemmtileg að sögn keppenda, hóflega hæðótt en með sandköflum sem drógu mjög úr keppendum rétt fyrir endasprett upp brekku. Sjálfur Vésteinn Hafsteinsson lét sjá sig til að hvetja íslenska hópinn en hann hefur verið búsettur í Växjö til margra ára.
Úrslit úr hlaupinu má finna hér: https://ultraevent.se/nordiccrosscountry2026/live
