Næsta Meistaramót Íslands er fram undan þegar Haustmaraþon Félags maraþonhlaupara fer fram laugardaginn 10. október í Elliðárdal í Reykjavík. Maraþonið er jafnframt Meistaramót Íslands í maraþoni 2026 og síðasta Meistaramót Íslands ársins í götuhlaupum.
Boðið verður upp á bæði heilt og hálft maraþon. Maraþonið, þar sem keppt verður um Íslandsmeistaratitlana, hefst kl. 09:00, en hálfmaraþonið kl. 11:00.
MÍ í maraþoni
Haustmaraþonið hefur um árabil verið fastur liður í íslenska hlaupasamfélaginu. Leiðin liggur um Elliðárdal og eftir stígum borgarinnar og er maraþonleiðin löglega mæld, viðurkennd af AIMS og vottuð af Frjálsíþróttasambandi Íslands.
Til þess að eiga tilkall til Íslandsmeistaratitils og verðlauna á MÍ þarf keppandi að uppfylla reglur FRÍ um þátttöku á Meistaramóti Íslands, þar á meðal að vera íslenskur ríkisborgari og skráður í aðildarfélag FRÍ. Keppendur um Íslandsmeistaratitla skulu einnig keppa í félagsbúningi.
👉 Skráning í Haustmaraþonið er opin:
https://netskraning.is/haustmarathon/
📅 10. október 2026
📍 Elliðárdalur, Reykjavík
🏃 Maraþon – MÍ: kl. 09:00
🏃 Hálfmaraþon: kl. 11:00
Lokamótið í MÍ götuhlaupum 2026
Haustmaraþonið lokar dagskrá Meistaramóta Íslands í götuhlaupum árið 2026. Á árinu hefur verið keppt um Íslandsmeistaratitla í fjölbreyttum vegalengdum:
5 km – Víðavangshlaup ÍR
Götumíla – Vecct mílan
Hálfmaraþon – Akureyrarhlaupið
10 km – Aukakrónuhlaup Ármanns
100 km – Rauðavatn Ultra
Maraþon – Haustmaraþon Félags maraþonhlaupara, 10. október
MÍ í víðavangshlaupum viku síðar
Keppnistímabilinu er þó ekki lokið. Aðeins viku síðar, laugardaginn 17. október, fer Meistaramót Íslands í víðavangshlaupum fram í Kjarnaskógi á Akureyri.
Hægt er að sjá upplýsingar um hlaup hér