Sunnudaginn 8. nóvember fór Vetrarmót FH fram í Kaplakrika þar sem um 40 keppendur komu saman til að keppa, hittast og njóta samverunnar. Mótið var haldið með það að markmiði að skapa fleiri keppnistækifæri fyrir fullorðna og efla mastersstarf í frjálsum íþróttum á Íslandi.
Keppt var í 60 metra hlaupi, 200 metra hlaupi, 800 metra hlaupi, kúluvarpi og hástökki. Keppendur voru á breiðu aldursbili, en sá elsti er fæddur árið 1941 og þeir yngstu árið 1996, auk tveggja yngri gestakeppenda.
Mótið tókst vel og sýndi að áhugi er fyrir fleiri minni mótum þar sem fólk getur komið saman, keppt við aðra og notið þess að stunda frjálsar íþróttir. Að keppni lokinni bauð mastershópur FH upp á pálínuboð þar sem þátttakendur áttu góða stund saman.
Öflugt mastersstarf hjá FH
Mastershópur FH hefur verið að byggjast upp og telur nú um 30 iðkendur sem æfa reglulega í Kaplakrika. Æfingar fara fram tvisvar í viku, á miðvikudögum kl. 20:00–21:00 og sunnudögum kl. 11:00–12:00. Auk þess stendur iðkendum til boða styrktaræfingaplan sem þeir geta fylgt sjálfstætt.
Hópurinn er opinn öllum, óháð fyrri reynslu af frjálsum íþróttum. Margir iðkendanna höfðu ekki stundað frjálsar íþróttir áður en hafa fundið sér nýjar áskoranir í greininni. Æfingarnar hefjast með sameiginlegri upphitun og að henni lokinni geta þátttakendur valið þær greinar sem þeir hafa áhuga á.
Stefnt er að þátttöku á Meistaramóti Íslands í frjálsum íþróttum öldunga í janúar og jafnframt er áhugi á að halda fleiri minni mót í samstarfi við önnur félög.
Mastershópur FH býður alla áhugasama velkomna að koma og prófa æfingar í Kaplakrika. Hægt er að mæta í nokkur skipti til reynslu og kynnast bæði íþróttinni og hópnum.
Hefur þú áhuga á að prófa frjálsar í mastersflokkum?
Hér fyrir neðan eru upplýsingar um þau félög sem halda uppi æfingar fyrir 30 ára og eldri