Íslenskir langhlauparar voru í eldlínunni á tveimur heimsmeistaramótum á sunnudag. Íris Anna Skúladóttir og Íris Dóra Snorradóttir kepptu í hálfmaraþoni á heimsmeistaramótinu í götuhlaupum í Kaupmannahöfn, á meðan Arnar Pétursson tók þátt í heimsmeistaramótinu í 100 km hlaupi í Ames á Spáni.
Íris Anna kom fyrst íslensku kvennanna í mark í Kaupmannahöfn á 1:21:36 og hafnaði í 97. sæti, en Íris Dóra hljóp á 1:27:13 og varð 103.
Á Spáni gekk fyrri hluti 100 km hlaupsins vel hjá Arnari. Hann hélt jöfnum hraða fyrstu klukkustundirnar en þegar hitinn fór vel yfir 30 gráður varð verkefnið sífellt erfiðara. Arnar hætti keppni eftir 11 af 20 hringjum, um 55 kílómetra, eftir 3:27:10 á brautinni.
Íris Anna 97. sæti á HM
Íris Anna kom inn í heimsmeistaramótið með persónulegt met upp á 1:18:18. Hún hljóp á 1:21:36 í Kaupmannahöfn og var því rúmum þremur mínútum frá sínum besta tíma.
Íris Dóra kom í mark á 1:27:13. Persónulegt met hennar er 1:20:40 og hafði hún fyrir mótið sett stefnuna á að komast undir 1:20.
Sjáðu myndir frá mótinu hér
Ngetich setti heimsmet
Mikill hraði var í fremstu röð hálfmaraþons kvenna. Kenýska hlaupakonan Agnes Jebet Ngetich varð heimsmeistari á 1:05:15 og setti um leið heimsmet í hálfmaraþoni þar sem eingöngu konur keppa.
Veronica Loleo frá Kenía varð önnur á 1:06:05 og Florence Niyonkuru frá Rúanda tók bronsið á nýju landsmeti, 1:06:08. Kenía vann einnig sveitakeppnina á samanlögðum tíma 3:17:33.
Góð íslensk úrslit í 5 km almenningshlaupinu
Fleiri Íslendingar stóðu sig vel í 5 km almenningshlaupinu sem fór fram samhliða heimsmeistaramótinu í Kaupmannahöfn.
Fríða Rún Þórðardóttir sigraði sinn aldursflokk á 18:57 og var 25 sekúndum á undan Carol Carter frá Bretlandi, sem varð önnur.
Helgi Sigurðsson náði einnig á verðlaunapall í sínum aldursflokki. Hann kom í mark á 19:42 og varð þriðji, aðeins sekúndu á undan fjórða sætinu.
Hitinn stöðvaði Arnar eftir um 55 kílómetra
Allt annars konar verkefni beið Arnars Péturssonar á HM í 100 km hlaupi í Ames á Spáni.
Arnar kom inn í mótið sem Íslandsmetshafi eftir að hafa hlaupið 6:24:53 fyrr á árinu. Hann fór vel af stað á sunnudagsmorgun og tímatakan sýnir að hraðinn var mjög jafn fyrstu klukkustundirnar.
Fyrsta hringnum lauk hann á 18:57 og næstu sjö hringir voru allir á bilinu 18:23 til 18:35. Eftir átta hringi hafði hann verið 2:28:17 á brautinni.
Þegar leið á hlaupið fór hins vegar að hægja á honum. Níundi hringurinn tók 18:50, tíundi 19:46 og sá ellefti 20:17. Arnar kom yfir tímatökumottuna eftir ellefta hring á 3:27:10 en hætti þá keppni.
Skýringin var hitinn.
„Um leið og sólin fór á fullt þá bara slokknar á kerfinu. Hræðileg tilfinning og mjög mikill vanmáttur í gangi,“ sagði Arnar í Instagram færslu sinni eftir hlaupið.
Aðstæður voru óvenju erfiðar fyrir 100 km hlaup. Hitinn fór yfir 30 gráður og heimildir frá mótinu greindu frá miklu brottfalli, sérstaklega í karlaflokki, vegna hita og lágrar rakaprósentu. Hámarkshiti á svæðinu fór í kringum 35 gráður.
Bandarískur tvöfaldur sigur í 100 km
Bandaríkin fögnuðu sigri í bæði karla- og kvennaflokki á Spáni.
Charlie Lawrence varð heimsmeistari karla á 6:09:25. Heimsmetshafinn Aleksandr Sorokin frá Litháen varð annar á 6:12:41 og Bretinn Alex Milne tók bronsið á 6:17:50.
Í kvennaflokki sigraði Courtney Olsen á 7:10:31 eftir að hafa náð Miho Nakata frá Japan undir lok hlaupsins. Nakata varð önnur á 7:11:57 og heimakonan Gemma Arenas tók bronsið á 7:17:50.