Frjálsíþróttaárið 2025 var frábært, bæði fjölbreytt, líflegt og árangursríkt, jafnt innan vallar sem utan. Á árinu voru sett fjölmörg Íslandsmet, aldursflokkamet og mótsmet, auk þess sem ótal persónuleg met litu dagsins ljós. Haldinn var fjöldi glæsilegra móta hérlendis og íslenskir keppendur áttu jafnframt sterka fulltrúa á alþjóðavettvangi, meðal annars á Norðurlandameistaramótum, Evrópumeistaramótum og heimsmeistaramótum.

Fjölmargar viðurkenningar voru veittar innan frjálsíþróttahreyfingarinnar á árinu og bæði íþróttafólk og sjálfboðaliðar voru heiðruð fyrir ómetanlegt framlag sitt, samhliða því sem mikið var um að vera á sviði fræðslu- og útbreiðslumála.

Það er því með mikilli ánægju sem horft er til baka á árið 2025 og jafnframt með bjartsýni og tilhlökkun til ársins 2026, með trú á að fram undan sé enn eitt sterkt frjálsíþróttaár. Frjálsíþróttasamband Íslands þakkar kærlega fyrir árið sem er að líða og hlakkar til áframhaldandi samstarfs, afreka og árangurs á nýju ári.

Stiklum á stóru yfir árið 2025.

Janúar

Innanhússtímabilið fór vel af stað þegar Meistaramót Íslands í fjölþrautum og Meistaramót Íslands í eldri aldursflokkum fóru fram í Laugardalshöllinni helgina 11.-12. janúar.  Í fjölþrautinni sigruðu í fullorðinsflokki Fjóla Signý Hannesdóttir (Selfoss) í fimmtarþraut kvenna og Birnir Vagn Finnsson (UFA) í sjöþraut karla.

Það voru FH-ingar sem stóðu uppi sem sigurvegarar í stigakeppninni á MÍ í eldri aldursflokkum. Það sást greinilega á mótinu hvað það er mikil gróska og stemming í frjálsíþróttum hjá eldri iðkendum en metþátttaka var á mótinu. Árangur lét heldur ekki standa á sér en það voru sett hvorki meira né minna en 14 aldursflokkamet, í fjölda greina og fjölda aldursflokka.

Um miðjan janúar fór Stórmót ÍR fram í Laugardalshöllinni og eins og áður var um að ræða einn af stærstu frjálsíþróttaviðburðum hvers árs og í ár voru 600 þátttakendur sem mættu til leiks frá öllu landinu auk keppanda frá Færeyjum, Írlandi og Bretlandi.

Fyrsta Íslandsmet ársins leit dagsins ljós 19. janúar þegar Baldvin Þór Magnússon (UFA) gerði sér lítið fyrir og bætti eigið Íslandsmet í 3000 m hlaupi um rúmar tvær sekúndur.

Í lok janúar var svo komið að RIG, sem er eitt af skemmtilegri mótum ársins þar sem umgjörð þess er með aðeins öðru og stærra sniði en önnur frjálsíþróttamót, og var mættur stór hópur af erlendum keppendum til að etja kappi við okkar allra besta frjálsíþróttafólk. RIG í ár var virkilega skemmtilegt mót og var mikil stemming í Laugardalshöllinni þar sem áhorfendastúkur voru nánast fullar og sýnt frá mótinu á RÚV2. Íþróttafólkið sýndi líka að það var í hörkuformi og náðist frábær árangur í mörgum greinum og voru persónulegar bætingar 43. Hápunkturinn var að sjálfsögðu, líkt og í fyrra, glæsilegt Íslandsmet Baldvins Þórs Magnússonar (UFA), en hann bætti eigið Íslandsmet í 1500 m um tæpa eina og hálfa sekúndu þegar hann kom fyrstur í mark á tímanum 3:39,67 og ætlaði þakið að rifna af Laugardalshöllinni á síðustu metrum hlaupsins. Þvílík skemmtun!

Febrúar

Aðra helgina í febrúar var komið að MÍ 11-14 ára en það fór fram í Kaplakrika í ár, og í ár voru það ÍR-ingar sem stóðu uppi sem sigurvegarar í stigakeppni félagsliða og hlutu þau 505 stig. En það sem er markverðast er að á mótinu voru hvorki meira né minna en 888 persónulegar bætingar.

Sunnudaginn 9. febrúar fór Norðurlandameistaramótið innanhúss í frjálsíþróttum fram í Espoo í Finnlandi og tefldi Ísland þar fram sameiginlegu liði með Danmörku. Íslensku keppendurnir í ár voru níu og unnu þau til einna gullverðlauna, einna silfurverðlauna og tvennra bronsverðlauna. Auk þessa setti Baldvin Þór Magnússon glæsilegt Íslandsmet í 3000 m hlaupi þegar hann bætti eigið met, frá í janúar, um rúmar fimm sekúndur og kom fyrstur í mark á tímanum 7:39,94 mín.  

Um miðjan febrúar, helgina 15.-16. febrúar, fór Meistaramót Íslands 15-22 ára fram í Laugardalshöllinni og þar voru það ÍR-ingar sem stóðu uppi sem sigurvegarar stigakeppninnar.

Um sömu helgi, 15.-16. febrúar, fór Norðurlandameistaramótið í eldri aldursflokkum fram í Osló í Noregi og það var heldur betur ferð til fjár hjá íslensku keppendunum sem komu heim með hvorki meira né minna en 12 gullverðlaun, og þar með 12 Norðurlandameistaratitla, sjö silfurverðlaun og fern bronsverðlaun. Þau settu 11 aldursflokkamet og Anna Sofia Rappich (UFA) gerði sér lítið fyrir og bætti eigið Norðurlandamet í flokki 60-64 ára í 60 m hlaupi þegar hún kom í mark á 8,88 sek.

Síðustu helgina í febrúar, 22.-23. febrúar, var komið að einum hápunkti tímabilsins þegar Meistaramót Íslands fór fram í Laugardalshöllinni og var okkar allra fremsta frjálsíþróttafólk mætt til keppni. Það voru sett tvö aldursflokkamet á mótinu auk tveggja mótsmeta, en það sem stendur upp úr er að sjálfsögðu frábært Íslandsmet Eirar Chang Hlésdóttur í 200 m hlaupi. Eir hljóp 200 m á 23,69 sek og bætti þar með 21 árs gamalt met Silju Úlfarsdóttur um 10 sekúndubrot. Það voru svo ÍR-ingar sem stóðu uppi sem sigurvegarar í stigakeppni félagsliða eftir hörkuspennandi keppni við FH-inga en ÍR hlaut 49 stig, þar með tryggði ÍR sér þriðja og síðasta Íslandsmeistaratitilinn á tímabilinu, frábær árangur hjá ÍR-ingum.

Mars

Laugardaginn 1. mars var svo komið að síðasta stóra innanhússmótinu hérna innanlands þegar Bikarkeppnir FRÍ fóru fram í Kaplakrika. Í flokki 15 ára og yngri voru það ÍR-ingar sem urðu bikarmeistarar en þau hlutu 125,5 stig. Sett var eitt mótsmet á mótinu og voru 86 persónulegar bætingar. Í bikarkeppni fullorðinna voru það FH-ingar sem urðu bikarmeistarar með 145 stig. Sett var eitt mótsmet á mótinu og mikill fjöldi persónulegra bætinga.

Evrópumeistaramótið innanhúss fór fram dagana 6.-9. mars í Apeldoorn í Hollandi og þar áttum við Íslendingar þrjá flotta fulltrúa, Daníel Inga í langstökki, Ernu Sóleyju í kúluvarpi og Baldvin Þór i 3000 m hlaupi.  Þau náðu sér ekki alveg á strik að þessu sinni en engu að síður frábær stórmótareynsla fyrir þau öll.

Bandaríska innanhússháskólameistaramótið (NCAA Indoors Championship) fór fram um miðjan mars og þar átti Guðrún Karítas Hallgrímsdóttir (ÍR) frábært mót. Hún keppti þar í lóðkasti og tvíbætti Íslandsmet sitt og endaði í öðru sæti með kasti upp á 23,18 m.

Heimsmeistaramótið í eldri aldursflokkum fór fram í Flórída í Bandaríkjunum í lok mars og þar átti okkar fólk, Hafsteinn Óskarsson (ÍR) og Fríða Rún Þórðardóttir (ÍR), heldur betur frábært mót. Fríða gerði sér lítið fyrir og vann til verðlauna í þremur greinum af þeim fjórum sem hún keppti í og setti einnig eitt Norðurlandamet í sínum aldursflokki. Hafsteinn vann ein verðlaun og náði sínum besta árangri á HM.

Apríl              

Evrópumeistaramótið í götuhlaupum fór fram í Brussel í Belgíu um miðjan apríl. Þetta var í fyrsta skipti sem mótið er haldið og heppnaðist það virkilega vel og var mikil ánægja með skipulag og framkvæmd viðburðarins. Keppt var í 10 km hlaupi, hálfu maraþoni og maraþoni og það sem gerði hlaupið sérstakt og mjög skemmtilegt var að það var einnig opið almenningshlaup. Í heildina hlupu því um 28000 hlauparar um götur Brussel og Leuven um helgina. Íslendingar áttu keppendur í öllum vegalengdum og af báðum kynjum. Andrea Kolbeinsdóttir, Hlynur Andrésson og Stefán Kári Smárason kepptu í 10 km hlaupi, Arnar Pétursson og Sigþóra Brynja Kristjánsdóttir kepptu í hálfu maraþoni og Elín Edda Sigurðardóttir og Kristján Svanur Eymundsson kepptu í maraþoni.

Meistaramót Íslands í 5 km götuhlaupi fór fram samhliða Víðavangshlaupi ÍR á sumardaginn fyrsta. Þar voru það Andrea Kolbeinsdóttir (ÍR) og Arnar Pétursson (Breiðablik) sem stóðu uppi sem Íslandsmeistarar.

Maí

Stóri FRÍ-dagurinn, frjálsíþróttaviðburður fyrir 5.-7. bekk grunnskólanna sem samanstendur af boðhlaupum og stöðvaþjálfun þar sem krakkar fá tækifæri til að prófa ýmsar frjálsíþróttagreinar, var haldinn í fyrsta skipti í byrjun maí.

Fjölskylduhlaup TM og FRÍ var haldið í Elliðaárdalnum laugardaginn 24. maí. Þar komu saman um 800 börn og fjölskyldur þeirra og tóku þátt í skemmtilegu hlaupi um skógarstígana í Elliðaárdal, en aðalfjörið var upphitunin sem VÆB-bræður stýrðu.

Smáþjóðaleikarnir fóru fram í Andorra í lok maí og stóð íslenska frjálsíþróttafólkið sig alveg frábærlega. Þau komu heim samtals með 18 verðlaun, fjögur gull, sjö silfur og sjö brons, sett var eitt mótsmet, eitt Íslandsmet og sex persónulegar bætingar. Sjá fréttir um alla keppnisdagana hér, hér og hér.

Júní

NM í fjölþrautum fór fram um miðjan júní í Gautaborg í Svíþjóð og þar átti Ísland fjóra keppendur og áttu þau öll hina fínustu þraut. Hjálmar Vilhelm Rúnarsson endaði í 5. sæti í tugþraut U18 en hann hlaut 6733 stig, sem er nýtt aldursflokkamet, og var hann aðeins 37 stigum frá þriðja sætinu. Hjálmar var með svakalega bætingu í þraut á þessu móti, og var hann m.a.s. búinn að bæta persónulegan árangur sinn, frá því á NM í fjölþrautum í fyrra, eftir níu greinar. Fyrri árangur hans var 6161 stig þannig að um er að ræða næstum því 600 stiga bætingu. Ísold Sævarsdóttir gerði sér lítið fyrir og nældi sér í silfurverðlaun í sjöþraut U20 þar sem hún fékk 5490 stig og náði þar með einnig lágmarki inn á EM U20. María Helga Högnadóttir endaði í 12. sæti í sjöþraut kvenna með 4893 stig, sem er bæting um 100 stig. Júlía Kristín Jóhannesdóttir endaði í 9. sæti í sjöþraut kvenna með 5238 stig, sem er um 150 stigum frá hennar besta árangri frá því í vor.

Meistaramót Íslands 11-14 ára fór einnig fram um miðjan júní og þar stóðu ÍR-ingar uppi sem sigurvegarar í stigakeppni félagsliða. Á mótinu voru hvorki fleiri né færri en 396 persónulegar bætingar, frábært hjá unga frjálsíþróttafólkinu okkar.

Lokakeppni NCAA fór fram í Eugene í Oregon í Bandaríkjunum um miðjan júní og þar kepptu þrjár íslenskar frjálsíþróttakonur með góðum árangri. Arndís Diljá Óskarsdóttir keppti í spjótkasti, þar sem hún hafði skömmu áður bætt sig stórkostlega með 54,99 m í undankeppni, og endaði í 19. sæti í lokakeppninni með 49,96 m, Eva María Baldursdóttir átti frábæra keppni í hástökki þegar hún stökk 1,84 m, bætti sig um 2 cm og endaði í 12. sæti, og þá hafnaði Guðrún Karítas Hallgrímsdóttir í 6. sæti í sleggjukasti með kast upp á 68,66 m í lokakeppni mótsins.

Andrea Kolbeinsdóttir bætti eigið Íslandsmet í 5 km götuhlaupi í Miðnæturhlaupi Suzuki sem fram fór 19. júní en hún kom í mark á 16:19 mín og bætti metið um 9 sekúndur.

Meistaramót Íslands 15-22 ára fór fram dagana 20.-22. júní og þar var það lið HSK/Selfoss sem vann stigakeppni félagsliða, en þau voru að vinna stigakeppnina fimmta árið í röð, virkilega vel gert hjá þessu öfluga liði. Keppendur stóðu sig mjög vel og var fjöldi persónulegra bætinga 245.

Einn af hápunktum sumarsins var Evrópubikar sem fram fór í Maribor í Slóveníu dagana 24.-26. júní en þar stóð íslenska liðið sig alveg frábærlega. Þau tóku forystuna í fyrstu grein og héldu henni út mótið og enduðu á að vinna 3. deildina með talsverðum yfirburðum og mun Ísland því keppa í 2. deild á næsta Evrópubikar. Íslenska frjálsíþróttafólkið var í fyrstu þremur sætunum í 26 greinum af 37 og voru sett fjögur Íslandsmet á mótinu. Svo var einnig aðdáunarvert hversu frábær stemming og liðsandi einkenndi liðið og það skilaði sér alla leið í gegnum skjáinn fyrir okkur sem fylgdumst með hérna heima. Sjá fréttir um árangur Evrópubikarsins hér og hér.

Júlí

Meistaramót Íslands í 10 km götuhlaupi fór fram í byrjun júlí samhliða Aukakrónuhlaupi Ármanns. Stefán Pálsson (Ármann) og Andrea Kolbeinsdóttir (ÍR) stóðu uppi sem sigurvegarar og eru því Íslandsmeistarar í 10 km götuhlaupi árið 2025.

Meistaramót Íslands í hálfu maraþoni fór einnig fram í byrjun júlí og var það samhliða Akureyrarhlaupi Mizuno og atNorth. Arnar Pétursson (Breiðablik) og Rannveig Oddsdóttir (UFA) stóðu uppi sem sigurvegarar og eru því Íslandsmeistarar í hálfu maraþoni árið 2025.

ÍR-ingar urðu bikarmeistarar 15 ára og yngri þegar bikarkeppnin fór fram á Sauðárkróki í byrjun júlí.

Bikarkeppni FRÍ fór fram á Sauðárkróki fyrstu helgina í júlí og það voru FH-ingar sem urðu bikarmeistarar en þau sigruðu einnig bæði stigakeppni karla og kvenna.

Dagana 17.-20. júlí fór EM U23 fram í Bergen í Noregi og þar voru fimm íslenskar frjálsíþróttakonur meðal keppenda. Íslensku keppendurnir stóðu sig afar vel á mótinu en bestum árangri náði Hera Christensen í kringlukasti þegar hún hafnaði í 5. sæti með kast upp á 53,44 m, en hún tryggði sér sæti í úrslitum með 50,37 m í undankeppni. Arndís Diljá Óskarsdóttir keppti í spjótkasti og komst einnig í úrslit eftir 51,05 m kast í undankeppni og endaði í 12. sæti með 46,26 m í úrslitunum. Eva María Baldursdóttir var hársbreidd frá úrslitum í hástökki þegar hún stökk 1,77 m og endaði í 15. sæti, aðeins einni hæð frá úrslitasæti. Júlía Kristín Jóhannesdóttir keppti í 100 m grindahlaupi og hljóp á 13,75 sekúndum, aðeins fjórum sætum frá því að komast áfram í undanúrslit. Birta María Haraldsdóttir keppti í hástökki þar sem hún stökk 1,73 m og hafnaði í 25. sæti.

Ólympíuhátíð Evrópuæskunnar (EYOF) fór fram í Skopje í Makedóníu dagana 20.-26. júlí og þar kepptu fjórir ungir og efnilegir frjálsíþróttaiðkendur. Íslensku keppendurnir sýndu allir mjög flotta frammistöðu á mótinu. Patrekur Ómar Haraldsson keppti í 800 m hlaupi pilta og endaði í 21. sæti á tímanum 2:01,76 mínútur, sem var persónuleg bæting utanhúss um eina og hálfa sekúndu. Benedikt Gunnar Jónsson hafnaði í 9. sæti í kúluvarpi pilta með kast upp á 17,48 m og var aðeins einu sæti frá því að komast í úrslit. Bryndís Embla Einarsdóttir keppti í spjótkasti stúlkna og endaði í 14. sæti með kast upp á 39,80 m. Hjálmar Vilhelm Rúnarsson átti afar sterka keppni í tugþraut pilta þar sem hann náði bestum árangri í kúluvarpi og kringlukasti, bætti sig í fjórum greinum og fékk alls 6706 stig sem skiluðu honum 8. sæti.

Ísland sendi í fyrsta skipti í ár nánast fullskipað lið á NMU20, en ekki sameiginlegt lið með Danmörku eins og venjan hefur verið undanfarin ár. Þetta er stórt og mikilvægt skref fyrir okkar frábæra unga frjálsíþróttafólk sem þarna fékk tækifæri til að taka þátt í alþjóðlegri keppni. Mótið fór fram í lok júlí í Uppsala í Svíþjóð. Hópurinn sýndi mjög sterka heildarframmistöðu á mótinu en fyrir um helming keppenda var þetta fyrsta landsliðsverkefnið, á meðan aðrir höfðu áður keppt á NM U20 eða byggt upp töluverða alþjóðlega keppnisreynslu. Mörg keppendanna bættu sig vel í sínum greinum og íslenska liðið eignaðist einn Norðurlandameistara auk þess sem þrenn önnur verðlaun komu í hlut keppenda. Í heildina bættu íslensku keppendurnir persónulegan árangur sinn í 14 af 28 greinum sem þau kepptu í, sem undirstrikar afar gott gengi liðsins á mótinu.

Ágúst

Ísland átti tvo fulltrúa á EMU20 sem fram fór í Tampere í Finnlandi dagana 7.-10. ágúst, þar sem Eir Chang Hlésdóttir og Ísold Sævarsdóttir kepptu við fremsta unga frjálsíþróttafólk Evrópu. Eir keppti í 100 m og 200 m hlaupi, var aðeins örfáum sætum frá undanúrslitum í 100 m á 12,06 sekúndum, en átti frábæra keppni í 200 m þar sem hún tryggði sér sæti í úrslitum og endaði í 7. sæti, á 23,51 sekúndu í undanúrslitum sem er hennar annar besti tími frá upphafi. Ísold keppti í sjöþraut og stóð sig vel, bætti persónulegan árangur í kúluvarpi og spjótkasti og fékk alls 5358 stig og hafnaði í 12. sæti.

Meistaramót Íslands í 100 km hlaupifór fram í fyrsta skipti í ár, en það fór fram samhliða Rauðavatn Ultra laugardaginn 9. ágúst. Þar kom Arnar Pétursson (Breiðablik) langfyrstur í mark á glæsilegu nýju Íslandsmeti en hann kláraði kílómetrana 100 á 6:45:16 klst, sem er meðalhraði upp á 4:03 mín per kílómetra sem er enginn smá hraði í 100 km hlaupi. Íslandsmeistari kvennamegin var Erla Dögg Halldórsdóttir en hún kom í mark á 11:42:13 klst.

Meistaramótsþrenna fór fram á ÍR-vellinum um miðjan ágúst þegar þar fóru fram MÍ í 10.000 m hlaupi, MÍ í fjölþrautum og MÍ í eldri aldursflokkum. Í 10.000 m hlaupinu urðu Íris Dóra Snorradóttir (FH) og Hlynur Andrésson (ÍR) Íslandsmeistarar og það sem meira er þá bætti Hlynur 40 ára gamalt mótsmet í greininni um tæpa mínútu. Þorleifur Einar Leifsson og Arna Rut Arnarsdóttir urðu Íslandsmeistarar í tugþraut og sjöþraut. Á MÍ í eldri aldursflokkum var það lið ÍR sem sigraði stigakeppnina en á því móti voru sett hvorki fleiri né færri en 16 aldursflokkamet.

Meistaramót Íslands í maraþoni fór fram samhliða Reykjavíkurmaraþoninu laugardaginn 23. ágúst og þar voru það Hlynur Andrésson (ÍR) og Halldóra Huld Ingvarsdóttir (FH) sem urðu Íslandsmeistarar.

Meistaramót Íslands fór fram á Selfossi helgina 22.-24. ágúst og þar voru það ÍR-ingar sem unnu stigakeppni félagsliða. Þetta var mikil frjálsíþróttaveisla en hápunktur mótsins var glæsilegt Íslandsmet Guðrúnar Karítasar Hallgrímsdóttur í sleggjukasti en hún kastaði lengst 71,38 m, en þetta var í fyrsta sinn sem hún kastar yfir 70 m. Annar árangur sem vert er að nefna er árangur Tóbíasar Þórarins Matharel, en þessi 16 ára frjálsíþróttakappi gerði sér lítið fyrir og stökk í 7,00 m í langstökki og náði þar með EMU18 lágmarki fyrir næsta sumar.

Í lok ágúst setti Hera Christensen (FH) glæsilegt Íslandsmet í kringlukasti þegar hún kastaði 55,95 m og bætti þar með 7 ára gamalt Íslandsmet Thelmu Lindar Kristjánsdóttur um rúman meter.

September

Stóri FRÍ-dagurinn var haldinn í annað sinn á Hellu í byrjun september.

Heimsmeistaramótið í frjálsíþróttum fór fram í Tókýó dagana 13.-21. september og þar voru þrír íslenskir keppendur meðal þátttakenda. Guðrún Karítas Hallgrímsdóttir keppti í undankeppni sleggjukasts kvenna en þetta var hennar fyrsta heimsmeistaramót á ferlinum. Hún náði sér ekki alveg á strik að þessu sinni en kastaði lengst 64,94 m og endaði í 35. sæti. Sindri Hrafn Guðmundsson keppti í undankeppni spjótkasts karla, einnig á sínu fyrsta heimsmeistaramóti í fullorðinsflokki. Hann kastaði lengst 75,56 m og hafnaði í 35. sæti. Erna Sóley Gunnarsdóttir keppti í undankeppni kúluvarps kvenna og var HM í Tókýó hennar annað heimsmeistaramót. Hún kastaði lengst 16,87 m og endaði í 31. sæti.

Ísland sendi sterkt lið á heimsmeistaramótið í utanvegahlaupum sem fram fór í Cranfranc á Spáni í lok september. Ísland átti keppendur í 45 km hlaupinu og í 82 km hlaupinu, og stóðu hlaupararnir sig alveg frábærlega. Hæst ber að nefna árangur kvennasveitarinnar í 82 km hlaupinu, en þær Elísa Kristinsdóttir, Andrea Kolbeinsdóttir og Guðfinna Kristín Björnsdóttir mynduðu sveitina sem endaði í 5. sæti sem er glæsilegur árangur.

Október

Í byrjun október setti Baldvin Þór Magnússon (UFA) enn eitt Íslandsmet sitt á árinu þegar hann bætti eigið Íslandsmet í 10 km götuhlaupi í hlaupi í Rúmeníu.

Evrópumeistaramótið í eldri aldursflokkum fór fram í Madeira í Portúgal dagana 8.-19. október og voru 10 íslenskir frjálsíþróttakeppendur meðal þátttakenda. Okkar fólk náði þar flottum árangri, voru sett nokkur aldursflokkamet og unnu þau einnig til nokkurra verðlauna. Hæst ber þar að nefna árangur Hafsteins Óskarssonar í 800 m hlaupi en hann vann þá grein í sínum flokki og varð því Evrópumeistari, frábært hjá honum Hafsteini. Svo unnu þau Fríða Rún Þórðardóttir og Jóhann Karlsson einnig til verðlauna, Fríða hlaut brons í 10 km götuhlaupi og Jóhann silfur í 5000 m hlaupi. Virkilega gaman að fylgjast með íslenska masters frjálsíþróttafólkinu vera að gera svona frábæra hluti á alþjóðlegum mótum.

Meistaramót Íslands í víðavangshlaupum fór fram í Laugardalnum í október og þar komu þau Hildur Aðalsteinsdóttir (FH) og Arnar Pétursson (Breiðablik) fyrst í mark.

Nóvember

NM í víðavangshlaupum fór fram í Danmörku í byrjun nóvember og þar tóku fjórir íslenskir hlauparar þátt.

Helgina 7.–9. nóvember fór fram virkilega skemmtilegt stangarstökksnámskeið í Laugardalshöllinni undir stjórn franska þjálfarans Yoann Rouzières. Námskeiðið var á vegum FRÍ og var ætlað bæði þjálfurum og iðkendum, sem mynduðu flottan, áhugasaman og virkan hóp. Yoann er fyrrum stangarstökkvari sem keppti fyrir unglingalandslið Frakklands í stangarstökki og í dag er hann leiðtogi norska unglingalandsliðsins í greininni.

Í lok nóvember lauk þjálfaranámskeiði 1 hjá Frjálsíþróttasambandi Íslands sem er ætlað þeim sem starfa með yngstu iðkendunum, 12 ára og yngri. Námskeiðið er hluti af almennri þjálfaramenntun ÍSÍ, þar sem ÍSÍ sér um bóklega grunninn en sérsamböndin, líkt og FRÍ, sjá um sérgreinahlutann sjálfan og verklega hlutann.

Desember

Launasjóður íþróttafólks var kynntur í byrjun desember. Í fyrsta sinn í sögu íslenskra íþrótta mun afreksíþróttafólk fá greidd laun fyrir vinnu sína sem íþróttamenn. Það eru sex úr frjálsíþróttum sem hljóta laun úr launasjóðnum að þessu sinni.

Í desember var tilkynnt að um áramótin verði mótaforritið Þór lagt niður og mun Roster Athletics taka alfarið við sem mótaumsjónarkerfi FRÍ. Jafnframt fer afrekaskrá FRÍ alfarið yfir í Tilastopaja, alþjóðlegan gagnagrunn sem heldur utan um árangur milljóna frjálsíþróttamanna um heim allan.

Uppskeruhátíð FRÍ fór fram rétt fyrir jól og þar var veittur fjöldi viðurkenninga og farið yfir frábært frjálsíþróttamál í máli og myndum. Stærstu verðlaun kvöldsins voru val á frjálsíþróttafólki ársins. Guðrún Karítas Hallgrímsdóttir, sleggjukastari úr ÍR, var valin frjálsíþróttakona ársins og spjótkastarinn Sindri Hrafn Guðmundsson úr FH var valinn frjálsíþróttakarl ársins.

Svo minnum við að sjálfsögðu á Flickr síðu FRÍ þar sem hægt er að skoða fjölda mynda frá liðnu ári.