Íslenskt frjálsíþróttafólk er heldur betur á faraldsfæti þessa dagana, EM U23 kláraðist í gær í Bergen í Noregi, frjálsíþróttakeppni EYOF í Skopje í Norður-Makedóníu hófst í morgun og NM U20 fer fram í uppsala í Svíþjóð um næstu helgi.
Flottur árangur hjá íslensku frjálsíþróttakonunum á EM U23 í Bergen í Noregi
Evrópumeistaramót U23 fór fram í Bergen í Noregi dagana 17.-20. júlí og í ár tóku fimm íslenskar frjálsíþróttakonur þátt og stóðu sig með stakri prýði.
- Hera Christensen keppti í kringlukasti og náði bestum árangri íslensku keppendanna en hún hafnaði í 5. sæti með kast upp á 53,44 m sem er hennar næstlengsta kast á ferlinum og ekki langt frá hennar besta árangri sem er 53,80 m. Hera tryggði sér sæti í úrslitum þegar hún kastaði 50,37 m í undankeppninni. Þetta er virkilega frábær árangur hjá Heru og er þetta með því betra sem íslenskir keppendur hafa gert á EM U23.
- Arndís Diljá Óskarsdóttir keppti í spjótkasti og náði einnig flottum árangri með því að komast í úrslit í greininni. Í undankeppninni kastaði Arndís Diljá 51,05 m og í úrslitunum sjálfum kastaði hún 46,26 m og endaði í 12. sæti.
- Eva María Baldursdóttir keppti í hástökki og var hún aðeins einu sæti og einni hæð frá því að komast í úrslitin. Hún stökk 1,77 metra en þurfti að stökkva 1,81 m til að komast í úrslitin, og endaði Eva María í 15. sæti.
- Júlía Kristín Jóhannesdóttir keppti í 100 m grindahlaupi og kom í mark á 13,75 sek og var hún aðeins fjórum sætum frá því að komast áfram í undanúrslitahlaupið.
- Birta María Haraldsdóttir keppti einnig í hástökki og stökk hún 1,73 m og endaði í 25. sæti.
Aníta Hinriksdóttir með ársbest á móti í Lucern í Sviss
Aníta Hinriksdóttir keppti í 800 m hlaupi á Spitzen Leichtathletik í Luzern í Sviss 15. júlí sl. og hljóp þar á 2:03,04 mín sem er hennar ársbesti árangur. Virkilega gaman að sjá hvað Aníta er að hlaupa vel þessi misserin.
Spjótkastarinn Sindri Hrafn Guðmundsson keppti á sama móti og kastaði hann spjótinu 77,26 m.
Christina Alba Marcus Hafliðadóttir með frábært 100 m hlaup á Héraðsmóti HSK
Héraðsmót HSK fór fram á Selfossi dagana 15. og 16. júlí, en um er að ræða Global Calendar-mót. Flottur árangur náðist þar og voru 120 persónulegar bætingar á mótinu.
Christina Alba Marcus Hafliðadóttir (Fjölnir) hljóp frábært 100 m hlaup en hún kom í mark á 11,89 sek. Þetta er í fyrsta skipti sem Christina Alba fer undir 12 sekúndur í 100 m hlaupi en hennar fyrri besti árangur var 12,00 sek. Þess má einnig geta að þessi árangur, 11,89 sek, er jöfnun á tíunda besta tíma íslenskrar konu í 100 m hlaupi frá upphafi. Frábær árangur hjá Christinu Ölbu.
Frjálsíþróttakeppni EYOF hófst í morgun
Ólympíuhátíð Evrópuæskunnar (EYOF) var sett í gær, sunnudaginn 20. júlí, en hún fer fram dagana 20.-26. júlí í Skopje í Makedóníu. Frjálsíþróttakeppnin hófst í morgun, en í ár taka fjögur frjálsíþróttaungmenni þátt.
- Patrekur Ómar Haraldsson keppir í 800 m hlaupi.
- Benedikt Gunnar Jónsson keppir í kúluvarpi.
- Bryndís Embla Einarsdóttir keppir í spjótkasti.
- Hjálmar Vilhelm Rúnarsson keppir í tugþraut.
NM U20 fer fram um næstu helgi
Um næstu helgi, 26.–27. júlí, fer Norðurlandameistaramót U20 fram í Uppsala í Svíþjóð. Ísland sendir í ár nánast fullskipað lið en ekki sameiginlegt lið með Danmörku eins og undanfarið. Það eru virkilega góðar fréttir að Ísland sendi sitt eigið lið á mótið að þessu sinni og sýnir hvað unga frjálsíþróttafólkið okkar er öflugt og hversu mikil breidd er innan hópsins.
Hvað er framundan?
| Dagsetning | Viðburður | Aldurshópur |
|---|---|---|
| 21. júlí 2025 | Selfossmót | 13 ára og eldri |
| 23. júlí 2025 | Sumarmót Umf. Heklu | Blandað |
| 23. júlí 2025 | 2. Sumarmót UMSS | 11 ára og eldri |
| 25. júlí 2025 | Selfossmót | 13 ára og eldri |
| 26.–27. júlí 2025 | Norðurlandameistaramót U20 | U20 landslið |