Norðurlandameistaramót U20 fer fram í Uppsala í Svíþjóð helgina 26.-27. júlí nk. Það er virkilega gaman að segja frá því að í ár mun Ísland senda nánast fullskipað lið á mótið, en undanfarið hefur Ísland sent sameiginlegt lið með Danmörku. Þessi ákvörðun að senda okkar eigið lið á NM í ár sýnir hvað unga frjálsíþróttafólkið okkar er öflugt og hversu mikil breidd er innan hópsins. Það verður mjög gaman að fylgjast með þessu unga frjálsíþróttafólki um næstu helgi, fjöldi keppenda er að stíga sín fyrstu skref í landsliðsverkefni á meðan önnur eru með nokkra reynslu á alþjóðavettvangi.
Hér fyrir neðan má sjá yfirlit yfir þá 22 íslensku keppendur sem taka þátt í mótinu og keppnisgreinar þeirra:
Arnar Logi Brynjarsson (ÍR) keppir í 100 m og 200 m hlaupi. Besti tími Arnars Loga í 100 m hlaupi er 10,88 sek frá því fyrr í sumar og í 200 m er besti tími hans 21,93 sek, einnig frá því fyrr í sumar. Þetta er í annað sinn sem Arnar Logi keppir á NM U20 en hann keppti í fyrsta sinn sumarið 2023 og þá í 200 m hlaupi og hljóp þá á 22,34 sek. Eins keppti Arnar Logi á EYOF árið 2022 og keppti þar í 100 m hlaupi. Svo var Arnar Logi hluti af íslensku boðhlaupssveitinni í 4×100 m hlaupi á Evrópubikarnum núna fyrr í sumar. Þannig að hann er sannarlega kominn með ágæta reynslu af því að keppa fyrir Íslands hönd á erlendri grundu.
100 m hlaup karla fer fram laugardaginn 26. júlí klukkan 16:05 og 200 m hlaupið fer fram sunnudaginn 27. júlí klukkan 12:30.
Birna Jóna Sverrisdóttir (ÍR) keppir í sleggjukasti (4 kg). Lengst hefur Birna Jóna kastað 4 kg sleggjunni 53,79 m, en það gerði hún fyrr í sumar, og er það sjötti besti árangur íslenskrar konu frá upphafi, sem er frábær árangur þar sem Birna Jóna er aðeins 18 ára gömul og því nýfarin að keppa með 4 kg sleggjunni. Birna Jóna er að keppa á NM U20 í annað sinn en hún keppti þar einnig í fyrra og þá kastaði hún 46,92 m. Hún keppti einnig í sleggjukasti á EYOF 2022 og á EM U18 í fyrrasumar.
Sleggjukast kvenna fer fram sunnudaginn 27. júlí klukkan 12:55
Daníel Breki Elvarsson (Selfoss) keppir í spjótkasti (800 g). Lengst hefur Daníel Breki kastað 55,07 m og gerði hann það einmitt á NM U20 í fyrrasumar. Í ár hefur hann kastað lengst 47,33 m. Auk þess að hafa áður keppt á NM U20 þá keppti Daníel Breki í spjótkasti á EYOF 2023.
Spjótkast karla fer fram sunnudaginn 27. júlí klukkan 10:00.
Eir Chang Hlésdóttir (ÍR) keppir í 100 m og 200 m hlaupi. Eir er Íslandsmethafi í 200 m hlaupi en hún bætti metið á Evrópubikar núna í júní þegar hún hljóp á 23,44 sek. Eir hefur hlaupið 100 m hraðast á 11,69 sek og gerði hún það einnig á síðasta Evrópubikar. Eir er þegar komin með ansi mikla reynslu af landsliðsverkefnum og hefur undanfarin tvö ár keppt á NM U20, EM U18, HM U20, NM, Smáþjóðameistaramótinu, Smáþjóðaleikunum og Evrópubikar.
100 m hlaup kvenna fer fram laugardaginn 26. júlí klukkan 15:55 og 200 m hlaupið fer fram sunnudaginn 27. júlí klukkan 12:40.
Egill Atlason Waagfjörð (Katla) keppir í þrístökki. Lengst hefur Egill stokkið 12,90 m og gerði hann það í fyrrasumar, en lengsta stökk hans í ár er frá því í febrúar en þá stökk hann 12,68 m. Þetta er fyrsta landsliðsverkefni Egils.
Þrístökk karla fer fram sunnudaginn 27. júlí klukkan 10:30.
Elena Soffía Ómarsdóttir (UFA) keppir í spjótkasti (600 g). Lengsta kast Elenu Soffíu er 41,55 m frá því síðasta sumar og í ár hefur hún kastað lengst 39,30 m. Þetta er fyrsta landsliðsverkefni Elenu Soffíu.
Spjótkast kvenna fer fram laugardaginn 26. júlí klukkan 16:45.
Grétar Björn Unnsteinsson (Fjölnir) keppir í stangarstökki. Grétar Björn hefur stokkið hæst 4,61 m og gerði hann það í febrúar sl. Grétar Björn keppti einnig í stangarstökki á NM U20 í fyrrasumar og þá stökk hann 3,70 m.
Stangarstökk karla fer fram laugardaginn 26. júlí klukkan 13:35.
Hafdís Anna Svansdóttir (UÍA) keppir í 400 m hlaupi. Hraðast hefur Hafdís Anna hlaupið 400 m á 59,52 sek og gerði hún það í júní sl. Þetta er fyrsta landsliðsverkefni Hafdísar Önnu.
400 m hlaup kvenna fer fram laugardaginn 26. júlí klukkan 16:25.
Hanna Dóra Höskuldsdóttir (Selfoss) keppir í kringlukasti (1 kg). Hanna Dóra á best í kringlukasti 35,24 m og er það frá síðasta sumri, en í ár hefur hún kastað lengst 32,70. Þetta er fyrsta landsliðsverkefni Hönnu Dóru.
Kringlukast kvenna fer fram laugardaginn 26. júlí klukkan 15:15.
Hekla Magnúsdóttir (ÍR) keppir í kúluvarpi (4 kg). Hekla hefur kastað lengst 12,73 m og er það frá því fyrr í sumar. Hekla keppti í kúluvarpi á NM U20 í fyrrasumar og kastaði þá 12,30 m. Hekla keppti einnig á NM í fjölþrautum sumarið 2023.
Kúluvarp kvenna fer fram sunnudaginn 27. júlí klukkan 11:15.
Helga Lilja Maack (ÍR) keppir í 800 m og 1500 m hlaupi. Besti tími Helgu Lilju í 800 m hlaupi er 2:17,42 sek frá því í febrúar sl. og í 1500 m hlaupi 4:46,32 sek frá því í mars sl. Helga Lilja var í íslenska liðinu sem keppti á NM í víðavangshlaupi sl. haust.
800 m hlaup kvenna fer fram sunnudaginn 27. júlí klukkan 11:45 og 1500 m hlaupið fer fram laugardaginn 26. júlí klukkan 16:50.
Hilmar Ingi Bernharðsson (ÍR) keppir í 1500 m hlaupi. Besti tími Hilmars Inga er 4:14,83 sek frá því í febrúar sl. Þetta er fyrsta landsliðsverkefni Hilmars Inga.
1500 m hlaup karla fer fram laugardaginn 26. júlí klukkan 17:05.
Ísold Sævarsdóttir (FH) keppir í langstökki og 100 m grindahlaupi. Lengsta stökk Ísoldar er 6,01 m frá því í febrúar sl., en það er níundi besti árangur íslenskrar konu í langstökki frá upphafi. Í 100 m grindahlaupi hefur Ísold hlaupið hraðast á 14,31 sek og gerði hún það núna um miðjan júlí. Þrátt fyrir ungan aldur er Ísold komin með mikla landsliðsreynslu og hefur keppt á NM U20, NM í fjölþraut, EM U18, Smáþjóðaleikum og Evrópubikar.
Langstökk kvenna fer fram laugardaginn 26. júlí klukkan 14:15 og 100 m grindahlaupið fer fram laugardaginn 26. júlí klukkan 14:00.
Ívar Ylur Birkisson (Dímon) keppir í hástökki og 110 m grindahlaupi. Ívar Ylur hefur hæst stokkið 1,92 m og gerði hann það í febrúar sl. og í 110 m grindahlaupi hefur hann hraðast hlaupið á 14,76 sek og gerði hann það sl. sumar. Þetta er fyrsta landsliðsverkefnið Ívars Yls.
Hástökk karla fer fram sunnudaginn 27. júlí klukkan 12:35 og 110 m grindahlaupið fer fram laugardaginn 26. júlí klukkan 13:40.
Kjartan Óli Bjarnason (Fjölnir) keppir í 400 m hlaupi. Kjartan Óli hefur hlaupið 400 m hraðast á 50,05 sek og gerði hann það fyrr í júlímánuði og er hann því alveg við það að rjúfa 50 sekúndna múrinn. Þetta er fyrsta landsliðsverkefni Péturs Óla.
400 m hlaup karla fer fram laugardaginn 26. júlí klukkan 16:35.
Marsibil Þóra Í Hafsteinsdóttir (FH) keppir í hástökki. Marsibil Þóra hefur stokkið hæst 1,74 m og gerði hún það í febrúar sl. Hún keppti í hástökki á NM U20 síðasta sumar og stökk þá 1,65 m.
Hástökk kvenna fer fram laugardaginn 26. júlí klukkan 16:10.
Pétur Óli Ágústsson (Fjölnir) keppir í 400 m grindahlaupi. Besti tími Péturs Óla er 58,51 sek og er frá því í byrjun júlí. Þetta er fyrsta landsliðsverkefni Kjartans Óla.
400 m grindahlaup karla fer fram sunnudaginn 27. júlí klukkan 10:55.
Sara Kristín Lýðsdóttir (FH) keppir í þrístökki. Besti árangur Söru Kristínar í þrístökki er 11,79 m og er frá því í febrúar sl. Sara Kristín keppti í þrístökki á NM U20 í fyrrasumar og þar stökk hún 11,63 m.
Þrístökk kvenna fer fram sunnudaginn 27. júlí klukkan 12:25.
Sindri Karl Sigurjónsson (UMSB) keppir í 5000 m hlaupi. Sindri Karl hefur ekki keppt áður í 5000 m hlaupi á braut en fyrr í sumar setti hann nýtt aldursflokkamet í flokki 16-17 ára pilta í 5 km götuhlaupi þegar hann hljóp á 15:39 mínútum, og er sá tími áttundi besti tími íslensks karlmanns frá upphafi. Þetta er fyrsta landsliðsverkefni Sindra Karls.
5000 m hlaup karla fer fram sunnudaginn 27. júlí klukkan 13:05.
Tobías Þórarinn Matharel (UFA) keppir í langstökki. Tobías hefur lengst stokkið 6,66 m og gerði hann það síðasta sumar, en lengst í ár hefur hann stokkið 6,58 m. Þetta er fyrsta landsliðsverkefni Tobíasar.
Langstökk karla fer fram laugardaginn 26. júlí klukkan 16:20.
Þorsteinn Pétursson (Ármann) keppir í kúluvarpi (6 kg) og kringlukasti (1,75 kg). Besti árangur Þorsteins í kúluvarpi er 14,45 m frá því í byrjun júlí og í kringlukasti hefur hann kastað lengst 43,68 m í febrúar sl. Þetta er fyrsta landsliðsverkefni Þorsteins.
Kúluvarp karla fer fram laugardaginn 26. júlí klukkan 14:50 og kringlukastið fer fram sunnudaginn 27. júlí klukkan 11:30.
Þorvaldur Gauti Hafsteinsson (Selfoss) keppir í 800 m hlaupi. Besti tími Þorvaldar Gauta er 1:57,29 frá því í janúar sl. Þorvaldur Gauti keppti í 800 m hlaupi á EYOF 2023.
800 m hlaup karla fer fram sunnudaginn 27. júlí klukkan 11:35.
Það er óhætt að segja að þetta sé stórt og frábært skref fyrir íslenskar unglingafrjálsíþróttir. Þátttaka með nær fullskipað lið á NM U20 sýnir bæði metnað og framþróun innan íþróttarinnar og gefur góð fyrirheit um framtíðina. Við óskum öllum keppendum góðs gengis í Uppsölum um næstu helgi – áfram Ísland!
Heimasíðu mótsins má sjá hér.
Úrslit munu birtast hér.