Í gær, laugardag, kepptu tveir íslenskir keppendur á EM U23 í Bergen í Noregi. Hera Christensen keppti fyrripart dags í undankeppni í kringlukasti kvenna og var hún í kasthópi A. Hera kastaði lengst 50,37 m og endaði í 7. sæti í sínum hópi. Það voru 12 í heildina sem komust áfram í úrslit og því þurftum við að bíða og sjá hver úrslitin í hópi B yrðu. Þar voru aðeins þrjár sem köstuðu lengra en Hera og hún komst því örugg áfram í úrslit, endaði í 10. sæti í heildina í undankeppninni.
Hera var að sjálfsögðu mjög ánægð með þetta. „Markmið dagsins var að komast í úrslit, sem tókst! Það var mjög stressandi að sitja í stúkunni og bíða eftir að B-grúppan kláraðist en tilfinningin þegar það var ljóst að ég var komin áfram var mjög góð og mikill léttir. Eftir nokkur stórmót unglinga sem hafa ekki gengið upp var þetta mjög sætt. Ég er mjög vel stemmd fyrir úrslitunum og nú er bara að gera sitt besta og negla á það!“ segir Hera eftir undankeppnina í gær.
Úrslitin í kringlukastinu fara svo fram seinna í dag eða klukkan 18:20 að norskum tíma.
Hér má fylgjast með útsendingu af mótinu.
Hér má sjá startlista og úrslit.
Seinni partinn í gær keppti Arndís Diljá Óskarsdóttir í úrslitum spjótkasts kvenna og þar kastaði hún lengst 46,26 m og endaði í 12. sæti. Flottur árangur hjá Arndísi Diljá að komast í úrslit á stórmóti og verður virkilega gaman að fylgjast með henni á næstunni enda búin að vera á mikilli siglingu undanfarið.
Myndir frá EM U23 má sjá á Flickr síðu FRÍ.