Þvílíkur lokadagur á frjálsíþróttavellinum í dag, það skiptust á skin og skúrir eins og stundum vill verða í íþróttunum, en heilt yfir virkilega fínn lokadagur hjá okkar frábæra frjálsíþróttafólki.
Ívar Kristinn Jasonarson startaði þessu með stæl í morgun þegar hann sigraði 400 m grindahlaup karla á tímanum 51,74 sek. Frábær tími hjá Ívari en þetta er hans þriðji besti árangur í greininni og aðeins 30 sekúndubrotum frá hans besta árangri. Virkilega vel gert Ívar!
Ingibjörg Sigurðardóttir var fimmta í 400 m grindahlaupi kvenna í morgun en hún kom í mark á 62,48 sek.
Guðjón Dunbar D. Þorsteinsson stökk flott þrístökk og tók bronsið með stökki upp á 14,66 sem er 19 cm bæting, Vel gert hjá Guðjóni og það styttist í 15 m hjá honum.
Hlynur Andrésson var mættur á brautina í 10.000 m hlaupi karla og endaði þar í þriðja sæti eftir hörkuspennandi lokasrett.
Örn Davíðsson nældi sér í silfurverðlaun í spjótkasti karla en hann kastaði 68,08 m.
María Helga Högnadóttir hljóp í undanriðlum 100 m grindahlaups kvenna og var önnur í sínum riðli á 14,64 sek og var örugg í úrslit. María Helga var óheppin í úrslitahlaupinu og rak sig ill í síðustu grindina og datt í mark á tímanum 14,91 sek. En mjög öflugt hlaup hjá Maríu Helgu og greinilegt að hún á nóg inni.
Ísold Sævarsdóttir var líka meðal keppenda í undanriðlum 100 m grindahlaupsins og kom hún í mark á 14,86 sek og komst áfram í úrslit þar sem hún hljóp á 14,53 sek og endaði í 4. sæti og er þetta persónuleg bæting um 8 sekúndubrot. Flott hjá Ísold.
Eir Chang Hlésdóttir hljóp í úrslitum 200 m hlaups kvenna og kom í mark á 24,31 sek, sem er alveg við hennar besta árangur utanhúss (24,31 sek) og endaði hún í þriðja sæti.
Kristófer Þorgrímsson og Kolbeinn Höður Gunnarsson voru flottir í úrslitahlaupinu í 200 m. Kristófer endaði í 2. sæti á 21,42 sek og Kolbeinn í því þriðja á 21,63 sek.
Íris Anna Skúladóttir sýndi svo sannarlega þvílíkur karakter hún er þegar hún kláraði 5000 m hlaupið þrátt fyrir að örmagnast þegar lítið var eftir að hlaupinu, en hún kom sér yfir marklínuna. Aðstæður voru krefjandi, heitt og sólríkt og það voru ekki allir keppendur sem kláruðu hlaupið. Við vorum, og erum, virkilega stolt af henni.
Þorleifur Einar Leifsson er búin að eiga frábært mót hérna á Smáþjóðaleikunum, en hann stórbætti sig í langstökki á fimmtudaginn þegar hann sigraði langstökkskeppnina og í dag bætti hann silfri í safnið þegar hann lenti í 2. sæti í 110 m grindahlaupi karla á tímanum 14,74 sek. Þetta er önnur stórbæting hjá honum Þorleifi en hans besti tími var 15,48 sek. Þorleifur greinilega á góðri siglingu.
Svo var komið að boðhlaupsveislunni, sem er frábær endir á stórskemmtilegri frjálsíþróttakeppni Smáþjóðaleikanna.
Konurnar byrjuðu í 4×100 m boðhlaupi og íslenska sveitin sem skipuð var af þeim Birnu Kristínu Kristjánsdóttur, Ingibjörgu Sigurðardóttur, Ísold Sævarsdóttur og Eir Chang Hlésdóttur kom í mark á 46,61 sek og enduðu í 4.sæti.
Íslenska sveitin í 4×100 m boðhlaupi karla hlau bronsverðlaun en þeir komu þriðju í mark á tímanum 41,17 sek. Íslensku sveitina skipuðu Þorleifur Einar Leifsson, Sæmundur Ólafsson, Kolbeinn Höður Gunnarsson og Kristófer Þorgrímsson
Konurnar tryggðu sér bronsverðlaun í 4×400 m boðhlaupi kvenna en íslenska sveitin kom í mark á 3:40,75 mín. Íslensku sveitina skipuðu Eir Chang Hlésdóttir, Ingibjörg Sigurðardóttir, Ísold Sævarsdóttir og Guðbjörg Jóna Bjarnadóttir.
Því miður náði karlasveitin í 4×400 m boðhlaupinu ekki að klára sitt hlaup.
Niðurstaða dagsins ekki af verri endanum, eitt gull, þrjú silfur og sex brons, auk persónlegra meta.
Heildarúrslit dagsins má sjá hér.
Við getum verið mjög stolt af okkar frjálsíþróttafólki sem hefur staðið sig með mikilli prýði hér á Smáþjóðaleikunum í Andorra. Flottur árangur hjá virkilega frábærum og skemmtilegum hóp.