Evrópumeistaramótið í götuhlaupum fer fram núna um helgina, í fyrsta sinn, í Brussel og Leuven í Belgíu.
Í dag, sunnudaginn 13. apríl, fór 10 km hlaupið fram í Leuven. Þar kepptu þau Hlynur Andrésson (ÍR), Stefán Kári Smárason (FH) og Andrea Kolbeinsdóttir (ÍR). Veðrið í dag var aðeins hagstæðara fyrir okkur Íslendingana heldur en í gær, skýjað en nokkuð hlýtt, en brautin var nokkuð krefjandi.
Hlynur kom í mark á tímanum 30:47 mín. og endaði í 63. sæti í karlaflokki.
Stefán Kári endaði í 74. sæti á 33:46 mín.
Andrea hljóp á 34:24 mín. og endaði í 65. sæti í kvennaflokki, en þessi tími hennar Andrea er bæting um 9 sekúndur, en hún átti best 34:33 mín. frá því í lok desember sl.
Í heildina voru í kringum 5700 hlauparar sem hlupu í 10 km hlaupinu í dag.
Maraþonið fór einnig fram í dag, en þar var rásmarkið í Brussel og þaðan lá leiðin yfir til Leuven þar sem markið var. Það voru þau Kristján Svanur Eymundsson (Fjölnir) og Elín Edda Sigurðardóttir (ÍR) sem kepptu í maraþoninu, og Kristján Svanur að keppa í fyrsta sinn fyrir hönd Íslands. Veðuraðstæður voru ansi góðar fyrir þau, skýjað og hlýtt, og var þeirra braut einnig frekar krefjandi. En þau komu sannarlega sátt í mark.
Kristján Svanur hljóp á 2:38,51 klst og endaði í 35. sæti í karlaflokki.
Elín Edda endaði í 21. sæti í kvennaflokki á tímanum 2:51,27 klst.
Í heildina voru um 12500 hlauparar sem hlupu maraþon í dag.
Heilt yfir þá er árangur Íslendinganna á þessu fyrsta Evrópumeistaramóti í götuhlaupið bara nokkuð góður, veðuraðstæður voru nokkuð erfiðar í gær og brautin í öllum vegalengdum þótti mjög krefjandi. En við getum verið stolt af okkar fólki sem lagði allt í þetta.
Heildarúrslit hlaupa helgarinnar má sjá hér.
Frétt frá fyrri degi mótsins má sjá hér.