Evrópumeistaramótið í götuhlaupum fer fram núna um helgina, í fyrsta sinn, í Brussel og Leuven í Belgíu.
Í dag, laugardaginn 12. apríl, fór hálfa maraþonið fram í Leuven. Þar kepptu þau Arnar Pétursson (Breiðablik) og Sigþóra Brynja Kristjánsdóttir (UFA). Veðrið í dag var ansi heitt og sólríkt fyrir okkur Íslendingana og hafði það aðeins áhrif og eins var brautin talin nokkuð erfið. En af stað þau fóru af miklum krafti í hópi flottra hlaupara.
Sigþóra Brynja kom í mark á tímanum 1:20,14 klst og endaði í 35. sæti.
Arnar kláraði því miður ekki sitt hlaup að þessu sinni, svoleiðis fara hlutirnir bara stundum.
Það sem gerir Evrópumeistaramótið í götuhlaupum sérstakt er að það er einnig opið almenningshlaup, þar sem þeir hlauparar hlaupa með þeim bestu í Evrópu. Í dag voru í heildina rúmlega 10.000 hlauparar sem hlupu hálft maraþon og var frábær stemming á svæðinu og voru nokkrir íslenskir hlauparar á meðal þátttakenda.
Heildarúrslit hlaupsins má sjá hér.
Á morgun, sunnudaginn 13. apríl, verður svo keppt í 10 km hlaupi og maraþoni. Í 10 km hlaupinu keppa Stefán Kári Smárason (FH), Hlynur Andrésson (ÍR) og Andrea Kolbeinsdóttir (ÍR) og í maraþoninu keppa Kristján Svanur Eymundsson (Fjölnir) og Elín Edda Sigurðardóttir (ÍR).
Hér er hægt að fylgjast með hlaupinu, bæði streymi og úrslit.