Kjöraðstæður í Kamnik

Íslenska landsliðið í utanvegahlaupum tók þátt á Evrópumeistaramótinu í Kamnik í Slóveníu í dag.  Hlaupið var 52km með 2450m hækkun. Aðstæður í hlaupinu voru mjög góðar. Milt gott veður, lítill sem enginn vindur og skýjað að mestu. Landslið Íslands hafnaði í 7. sæti í liðakeppni kvenna og í 12. sæti í liðakeppni karla. Elísa Kristinsdóttir kom fyrst í mark af íslensku konunum og endaði í 9. sæti sem er stórkostlegur árangur í svona sterku hlaupi. Hjá körlunum var Þorbergur Ingi fyrstur en Þorsteinn Roy og Sigurjón Ernir fylgdu honum fast á eftir. Allir íslensku keppendurnir skiluðu sér í mark í hlaupinu sem er ekkert sjálfgefið í svona áskorun. Við getum svo sannarlega verið stolt af þessum árangri og íslenskir utanvegahlauparar sýndu enn og aftur að þeir eiga fullt erindi í keppni við þá bestu.

Þorbergur Ingi Jónsson

“Var árangurinn betri en ég hélt, ég veit það ekki, ég búinn að gera þetta svo oft að það er fátt sem kemur manni þannig séð á óvart. Ég bjóst etv. ekki við að keyra þetta hratt en svo var þetta bara svo ógeðslega gaman. Ég gat still mig mjög vel af í byrjun og vann svo á aðra hlaupara þegar það leið á hlaupið. Það náði mér enginn í hlaupinu nema einn og það var hann Þorsteinn sem ég vissi af rétt fyrir aftan mig. Það var geggjað að hlaupa með honum svona stóran hluta af hlaupinu, hann var þarna eins og glaðasti hundur í heimi. Hann gaf mér mikið af góðri orku, og við byrjuðum að pikka upp fullt af hlaupurum saman sem lið, það er mikill styrkur að nálgast svona verkefni sem lið og mikilvægt að fólk gerir sér grein fyrir því að við erum hér sem lið. Ég kláraði hlaupið sterkt og er mjög sáttur með árangurinn.“

Elísa Kristinsdóttir

„Ég átti góðan dag á fjöllum í dag í mjög skemmtilegri en krefjandi braut. Fór skynsamlega af stað en náði að vinna mig upp eftir því sem leið á hlaupið sem er virkilega skemmtilegt. Get ekki verið annað en sátt við dagsverkið og enda meðal 10 efstu á sjálfu Evrópumeistaramótinu í utanvegahlaupum.“ 

Úrslit hjá öllum íslensku keppendunum má finna hér að neðan:

Elísa Kristinsdóttir náði bestum árangri Íslendinga en hún kom 9. kona í mark á tímanum 4:51;43.
Andrea Kolbeinsdóttir varð í 33. sæti á tímanum 5:22;16. Anna Berglind Pálmadóttir varð 53.á tímanum 5:43;49. Íris Anna Skúladóttir var skammt á eftir á tímanum 5:51;23 og endaði í 55. sæti.

Kvennalið Íslands endaði í 7. sæti af 15 liðum.

Í karlaflokki var það Þorbergur Ingi Jónsson sem var fyrstur Íslendinga. Hann var í 51. sæti á tímanum 4:35;02. Þorsteinn Roy Jóhannsson var skammt á eftir á tímanum 4:36;31 og endaði í 53. sæti. Sigurjón Ernir Sturluson varð í 63. sæti á tímanum 4:43;50. Stefán Pálsson endaði í 75. sæti á tímanum 5:05;33.

Karlalið Íslands endaði í 12. sæti af 23 liðum.

Frábær árangur hjá íslenska liðinu í sterku hlaupi!