Meistaramót Íslands 15–22 ára fer fram á Akureyri dagana 19.–21. júní. UFA heldur mótið að þessu sinni og er undirbúningur á lokametrunum, en fyrstu greinarnar hefjast seinni partinn í dag.
Á mótinu verður keppt í 15 ára flokki, U18, U20 og U23. Framundan er þétt og spennandi keppnishelgi þar sem mikið er af efnilegum keppendum sem mæta til leiks. Það verður hörð keppni um Íslandsmeistaratitla í aldursflokkum en einnig um bætingar, stöðu á árslistum og möguleika á sæti á erlendum mótum í sumar.
Dagskrá mótsins lofar góðu og margir áhugaverðir keppendur eru skráðir til leiks. Fyrir nokkra þeirra er mótið einnig mikilvægur hluti af undirbúningi og baráttu fyrir erlend stórmót í sumar.
Í U18 flokki verður meðal annars spennandi að fylgjast með þeim keppendum sem nú þegar hafa náð lágmarki á EM U18. Þar má nefna Bryndísi Emblu Einarsdóttur úr HSK/Selfossi í spjótkasti, Garðar Atla Gestsson úr UFA í spjótkasti, Benedikt Gunnar Jónsson úr ÍR í kúluvarpi og Tobías Þórarinn Matharel úr UFA í þrístökki. Bryndís hefur einnig náð lágmarki á HM U20 og er því í sérstaklega sterkri stöðu fyrir sumarið.
Í U20 flokki verða augu margra á þeim keppendum sem hafa þegar náð lágmarki á HM U20. Þar eru Eir Chang Hlésdóttir úr ÍR og Christina Alba Marcus Hafliðadóttir úr Fjölni meðal þeirra sem vert verður að fylgjast sérstaklega með.
Þá verða fleiri keppendur í baráttu um sæti á EM U18. Gabríel Glói Freysson hefur hlaupið undir lágmarkstíma en þarf að ná árangrinum á gildu móti, og Patrekur Ómar Haraldsson verður einnig í spennandi baráttu í 400 m hlaupi.
Nokkrir keppendur eru einnig í baráttu um miða á erlend mót í sumar, þar á meðal NM U20, EM U18, HM U20 og EM fullorðinna. Það verður því mikið undir hjá mörgum.
Fylgist með fréttum af helstu úrslitum, bætingum og afrekum mótsins.