Meistaramót Íslands 15–22 ára fór fram á Þórsvelli á Akureyri dagana 19.–21. júní. UFA hélt mótið að þessu sinni og tókst vel til á Akureyri þar sem mikið af okkar efnilegustu frjálsíþróttafólki landsins mætti til leiks.
HSK/Selfoss sigraði heildarstigakeppni mótsins með 468 stig. Íþróttafélag Reykjavíkur varð í öðru sæti með 292 stig og UFA endaði í þriðja sæti með 238 stig. FH varð í fjórða sæti með 227 stig og Fjölnir í fimmta sæti með 188 stig.
Mótið var sterkt í mörgum greinum og fjölmörg persónuleg met féllu yfir helgina. Nokkrir keppendur sem hafa nú þegar náð lágmörkum á erlend stórmót í sumar voru í eldlínunni, auk þess sem aðrir nýttu mótið til að styrkja stöðu sína í baráttunni um sæti á alþjóðlegum mótum.
Bryndís Embla Einarsdóttir úr HSK/Selfossi, sem hefur náð lágmarki á bæði EM U18 og HM U20 í spjótkasti, vann spjótkast U18 með 49,78 m kasti. Hún átti einnig sterka keppni í kúluvarpi þar sem hún kastaði 13,88 m og bætti sinn persónulega árangur, auk þess sem hún varð önnur í sleggjukasti með 47,53 m.
Í U18 flokki karla átti Garðar Atli Gestsson úr UFA gott mót. Hann vann spjótkast með 60,62 m, varð annar í kúluvarpi með 15,13 m persónulegt met og bætti sig einnig í sleggjukasti og hástökki. Garðar hefur þegar náð lágmarki á EM U18 í spjótkasti.
Benedikt Gunnar Jónsson úr ÍR, sem hefur einnig náð lágmarki á EM U18, vann kúluvarp U18 með 17,15 m kasti og kringlukastið með 44,10 m. Þá vann Tobías Þórarinn Matharel úr UFA þrístökk U18 með 13,35 m persónulegu meti og varð annar í 100 m hlaupi, 110 m grindahlaupi, langstökki og spjótkasti. Tobías hefur einnig náð lágmarki á EM U18.
Gabríel Glói Freysson úr UFA sýndi styrk sinn í spretthlaupunum og vann 100 m hlaup U18 á 11,00 sekúndum og 200 m hlaup á 22,25 sekúndum. Bæði hlaupin komu þó í of miklum meðvindi, en árangurinn sýnir að hann er í góðri stöðu í baráttunni um að ná lágmarki á gildu móti.
Í U20 flokki kvenna vann Christina Alba Marcus Hafliðadóttir úr Fjölni 100 m hlaup á 11,92 sekúndum í meðvindi og Eir Chang Hlésdóttir úr ÍR vann 200 m hlaup á 24,25 sekúndum, einnig í meðvindi. Báðar hafa náð lágmarki á HM U20.
Heildarstigakeppni félaga
- HSK/Selfoss – 468 stig
- Íþróttafélag Reykjavíkur – 292 stig
- UFA – 238 stig
- FH – 227 stig
- Fjölnir – 188 stig
- Ármann – 137,5 stig
- Breiðablik – 115,5 stig
- HHF – 27 stig
- HSÞ – 26 stig
- UMSS – 22 stig
- UÍA – 13 stig
- USAH – 8 stig
Sigurvegarar í flokkakeppni
ÍR sigraði stigakeppni 15 ára karla með 109 stig, en Breiðablik sigraði í flokki 15 ára kvenna með 71,5 stig.
UFA vann stigakeppni U18 karla með 136 stig og HSK/Selfoss vann stigakeppni U18 kvenna með 90 stig.
Í U20 flokkunum var HSK/Selfoss sterkast og vann bæði stigakeppni karla með 97 stig og kvenna með 107 stig.
Fjölnir vann báða U23 flokkana, stigakeppni kvenna með 75 stig og stigakeppni karla með 40 stig.
Mótinu lauk því með sannfærandi sigri HSK/Selfoss í heildarkeppni félaga og góðri frammistöðu fjölda ungra keppenda sem verða áfram spennandi að fylgjast með í sumar.