Þann 13. júní árið 1976 bætti Þórdís Gísladóttir fyrst Íslandsmet í hástökki en þá stökk hún 1,73m. Metið bætti hún eða jafnaði 13 sinnum og setti sitt síðasta met árið 1990, 1,88m, sem enn stendur. Þórdís hefur því verið Íslandsmethafi í hástökki í hálfa öld.
RÚV fjallaði um afrek Þórdísar og ræddi við Íslandsmethafann. Sjá hér: https://www.ruv.is/frettir/ithrottir/2026-06-13-islandsmethafi-i-halfa-old-477613
Ferill Þórdísar
Þórdís var ung að aldri þegar hún hóf frjálsíþróttaæfingar á gamla Melavellinum og Guðmundur Þórarinsson þjálfari sá fljótt að þarna var mikið efni á ferð og árangurinn sýndi sig fljótt. Þórdís vann sinn fyrsta Íslandsmeistaratitil í hástökki aðeins 14 ára gömul. Þá stökk hún 1,64m og jafnaði þáverandi Meistaramótsmet. Það met bætti hún jafnt og þétt upp í 1,80m sem stendur enn í dag, 51 ári síðar.
Þórdís var svo 15 ára gömul þegar hún bætti Íslandsmetið í Norðurlandalandskeppni kvenna í Joensu í Finnlandi árið 1976. Með því stökki tryggði hún sér þátttöku á Ólympíuleikunum í Montreal sama ár. Hún varð um leið fyrst íslenskra kvenna til að stökkva hærra en 1,70 m. Næstu ár bætti Þórdís Íslandsmetið jafnt og þétt. Árið 1979 stökk Þórdís fyrst íslenskra kvenna yfir 1,80m og stökk svo þá hæð eða hærra samfleytt til ársins 1997, að undanskildu árinu 1989 þegar hún gekk með sitt fyrsta barn.
Ári 1981 hóf Þórdís nám við Háskólann í Alabama í Bandríkjunum á fullum íþrótta- og skólastyrk fyrst íslenskra kvenna. Hún vakti fljótlega verðuga athygli vestanhafs en hún varð fyrst íslenskra íþróttamanna til að verða Bandarískur háskólameistari í íþróttum þegar hún stökk 1,86m og bætti Íslandsmet sitt enn frekar. Þórdís sigraði öll háskólamótin innanhúss og utanhúss árið 1983 og kórónaði frábært innanhússtímabil á að verða Bandarískur háskólameistari og bætti Íslandsmetið innanhúss í 1,88m. Hún hélt uppteknum hætti á utanhússtímabilinu, varði Bandaríska háskólameistaratitilinn og bætti Íslandsmetið utanhúss í 1,87m.
Árið 1990 stökk Þórdís 1,88m í Grimsby á Englandi og setti þar með Íslandsmet utanhúss, sem stendur enn 36 árum síðar. Þórdís keppti í 30 landskeppnum fyrir Íslands hönd á árunum 1976-1999 og var einnig fyrirliði landsliðsins í 15 ár.
Þróun Íslandsmetsins í hástökki kvenna utanhúss:
1.73m 1976 Joensu, Finnland
1.76m 1977 Kaupmannahöfn, Danmörk
1.76m 1979 Cwambran, Wales
1.78m 1979 Reykjavik
1.78m 1979 Bygoszoz, Pólland
1.80m 1979 Reykjavík
1.80m 1980 Gautaborg, Svíþjóð
1.81m 1980 Varberg, Svíþjóð
1.85m 1981 Memphis, Tennesee, USA
1.86m 1982 Provo, Utah, USA
1.87m 1983 Gainesville, Flórida, USA
1.87m 1983 Houston, Texas, USA
1.88m 1990 Grimsby, England
Þróun Íslandsmetsins í hástökki kvenna innanhúss:
1.68m 1977 Reykjavík
1.76m 1979 Ottawa, Kanada
1.78m 1980 Sherbrooke, Kanada
1.80m 1980 Toronto, Kanada
1.83m 1981 Baton Rough, Louisiana, USA
1.83m 1982 Gainesville, Flórída, USA
1.83m 1983 Johnson City, USA
1.86m 1983 Baton Rough, Louisiana, USA
1.86m 1983 Bloomingon, Indiana, USA
1.88m 1983 Pontiac, USA
1.88m 1984 Ottawa, Kanada