FH þrefaldir Bikarmeistarar 2026

Bikarkeppni FRÍ lauk á ÍR-vellinum í Skógarseli í dag þar sem FH tryggði sér þrefaldan sigur. Félagið varð bikarmeistari í heildarkeppninni ásamt því að vinna bæði karla- og kvennakeppnina.

Keppnisaðstæður voru krefjandi alla helgina. Kuldi og mikill vindur gerðu keppendum erfitt fyrir, sérstaklega í stökk- og kastgreinum, og höfðu einnig áhrif á hlaup á brautinni. Þrátt fyrir aðstæður náðist fjöldi sterkra afreka og spennan í liðakeppninni hélst fram í síðustu greinar.

FH lauk keppni með 183 stig í heildarkeppninni, 12,5 stigum á undan Íþróttafélagi Reykjavíkur sem fékk 170,5 stig. Fjölnir varð í þriðja sæti með 129 stig. FH vann jafnframt kvennakeppnina með 95 stig gegn 88 stigum ÍR og karlakeppnina með 88 stig, 5,5 stigum á undan ÍR. 

FH-ingar sneru við karlakeppninni

Karlakeppnin var sérstaklega spennandi. Að loknum fyrri deginum hafði ÍR aðeins hálfs stigs forystu á FH, 42,5 stig gegn 42. FH-ingar sóttu hins vegar 46 stig á seinni deginum, sex stigum meira en ÍR, og sneru stöðunni sér í hag. Lokamunurinn varð 5,5 stig, FH í vil. 

Sigur FH byggðist á sterkri liðsheild. Félagið vann alls 16 af 36 greinum mótsins og lauk helginni með sigri í báðum 1000 m boðhlaupunum. Kvennasveit FH vann eftir hörkukeppni við ÍR, en aðeins 0,20 sekúndur skildu sveitirnar að í markinu. Karlasveit FH vann jafnframt sitt boðhlaup og innsiglaði þar með glæsilegan endi á mótinu. 

Þrír keppendur með tvo einstaklingssigra

Þrír keppendur unnu tvær einstaklingsgreinar á mótinu.

Kristófer Þorgrímsson úr FH var fljótastur í bæði 100 og 200 m hlaupi. Hann hljóp 100 m á 10,85 sek. og 200 m á 22,55 sek. Embla Margrét Hreimsdóttir, einnig úr FH, vann 1500 m á 4:34,36 mín. og 800 m á 2:17,11 mín. 

Ívar Kristinn Jasonarson úr ÍR vann báðar grindahlaupsgreinar karla. Hann sigraði í 110 m grindahlaupi á 15,32 sek. og í 400 m grindahlaupi á 55,14 sek. 

Breitt aldursbil keppenda setti einnig skemmtilegan svip á mótið. Tuttugu ár skildu að elsta og yngsta sigurvegara einstaklingsgreinar. Íris Dóra Snorradóttir úr FH, fædd 1991, vann 5000 m hlaupið á 17:47,51 mín., en Eyrún Svala Gustavsdóttir úr Breiðabliki, fædd 2011, vann 400 m hlaupið á 58,81 sek. 

Á meðal annarra sterkra afreka helgarinnar var 74,42 m kast Hilmars Arnar Jónssonar í sleggjukasti, 71,06 m kast Guðrúnar Karítasar Hallgrímsdóttur í sleggjukasti kvenna og 60,12 m kast Guðna Vals Guðnasonar í kringlukasti.