Langhlaupanefnd FRÍ hefur gengið frá vali á landsliði Íslands fyrir heimsmeistaramótið í götuhlaupum sem fram fer í Kaupmannahöfn í Danmörku dagana 19.–20. september 2026.
Fjórir hlauparar skipa íslenska liðið. Þrjár konur keppa í hálfmaraþoni og einn karl í 5 km hlaupi.
Við val á liðinu var fyrst og fremst horft til árangurslista World Athletics, þar sem stig eru reiknuð út frá árangri hlaupara í viðkomandi greinum. Með því móti er hægt að bera árangur hlaupara saman á milli mismunandi vegalengda og fá þannig skýrari mynd af styrkleika þeirra við val í verkefnið.
Einnig var horft til valreglna FRÍ og árangurs hlaupara á undanförnum misserum.
Eftirtaldir hlauparar skipa íslenska liðið:
Konur – hálfmaraþon
- Sigþóra Brynja Kristjánsdóttir (UFA)
- Íris Anna Skúladóttir (FH)
- Íris Dóra Snorradóttir (FH)
Karlar – 5 km
- Baldvin Þór Magnússon (UFA)
Ísland verður því jafnframt með fullt lið í liðakeppni kvenna í hálfmaraþoni. Þar telja samanlagðir tímar þriggja fyrstu hlaupara hverrar þjóðar til úrslita.
Baldvin keppir í 5 km hlaupi karla laugardaginn 19. september, en hálfmaraþon kvenna fer fram sunnudaginn 20. september.
Fararstjóri liðsins verður Tonie Sörensen úr Langhlaupanefnd FRÍ.