Bryndís Embla fjórða á EM U18

Bryndís Embla Einarsdóttir náði bestum árangri íslenska hópsins á Evrópumeistaramóti U18 í Rieti á Ítalíu þegar hún hafnaði í fjórða sæti í spjótkasti. Tveir íslenskir keppendur komust í úrslit á mótinu og Gabríel Glói Freysson bætti sinn besta árangur í 200 metra hlaupi.

Bryndís Embla Einarsdóttir

Bryndís Embla tryggði sér örugglega sæti í úrslitum spjótkastsins þegar hún kastaði 55,96 metra í undankeppninni. Í úrslitunum kastaði Bryndís lengst 53,34 metra í fimmtu umferð og hafnaði í fjórða sæti. Hún var aðeins 2,38 metrum frá bronsverðlaunum. Lucy Bull frá Bretlandi varð Evrópumeistari með 56,60 metra kasti.

Garðar Atli Gestsson

Garðar Atli Gestsson komst einnig í úrslit í spjótkasti. Hann kastaði 64,94 metra í undankeppninni, náði tólfta og síðasta sætinu inn í úrslitin og var 70 sentímetrum á undan næsta keppanda. Í úrslitunum kastaði Garðar Atli lengst 57,37 metra og hafnaði í tólfta sæti. Finninn Jere Murto varð Evrópumeistari með 80,41 metra kasti, sem var jafnframt besti árangur ársins í heiminum í U18 flokki.

Benedikt Gunnar Jónsson

Benedikt Gunnar Jónsson var afar nálægt því að tryggja sér sæti í úrslitum kúluvarps. Benedikt kastaði 17,33 metra og hafnaði í 13. sæti, aðeins fjórum sentímetrum frá tólfta sætinu og úrslitasæti. Kúluvarpararnir voru margir í vandræðum en kasthringurinn var ansi sleipur, en þrátt fyrir þá áskorun þá stóð Benedikt sig mjög vel þegar kom að mótinu.

Gabríel Glói Freysson

Gabríel Glói Freysson bætti sinn besta árangur í 200 metra hlaupi og setti nýtt u18 aldursflokkamet þegar hann kom í mark á 21,89 sekúndum í 0,1 metra meðvindi. Hann varð sjötti í sínum riðli og hafnaði í 29. sæti af 36 keppendum í heild, sem er frábær árangur og óskum honum til hamingju með metið.

Tobías Þórarinn Matharel

Tobías Þórarinn Matharel stökk 6,64 metra í undankeppni langstökksins í 0,9 metra meðvindi. Hann hafnaði í 29. sæti af 31 keppanda sem náði gildri tilraun. Tobías var að glíma við örlítil meiðsli í ökkla en kom sér samt sem áður í góðan gír. Hann átti flott 7m stökk sem var því miður rétt ógilt.

Karl Sören Theodórsson

Karl Sören Theodórsson felldi fyrstu hæð og fékk því NM. Hann átti ótrúlega góða upphitun og var að stökkva mjög vel en þegar kom að keppni þá var hann hátt yfir en óheppinn með að fella. Ótrúlega flottur árangur að fá að mæta á þetta mót, meðal bestu í Evrópu og dýrmæt reynsla í bankann.

Íslenski hópurinn lýkur því keppni á EM U18 með tvö úrslitasæti, eitt fjórða sæti og persónulegt met í 200 metra hlaupi. Keppendurnir öðluðust jafnframt dýrmæta reynslu á einu sterkasta unglingamóti Evrópu.

---

Dagana 16.–19. júlí fer fram Evrópumeistaramót U18 í frjálsíþróttum í Rieti á Ítalíu, þar sem efnilegasta frjálsíþróttafólk Evrópu undir 18 ára aldri kemur saman til keppni. Alls eru 1.104 keppendur frá 48 þjóðum skráðir til leiks, þar af 551 piltar og 553 stúlkur, og verður samkeppnin því afar hörð í öllum greinum. 

Rieti er vel þekkt nafn í frjálsíþróttaheiminum. Keppnin fer fram á Raul Guidobaldi-leikvanginum, sem hefur í gegnum árin verið vettvangur fjölmargra heimsmeta og stórmóta. Borgin hefur löngum verið talin ein af miðborgum evrópskra frjálsíþrótta og býður upp á fyrsta flokks keppnisaðstöðu fyrir okkar keppendur. 

Íslenska landsliðið samanstendur af efnilegum keppendum sem hafa tryggt sér þátttökurétt með því að ná lágmörkum European Athletics. Fyrir marga þeirra verður þetta fyrsta stórmót á alþjóðlegum vettvangi, þar sem þau fá tækifæri til að keppa við bestu U18-keppendur Evrópu og safna dýrmætri reynslu fyrir komandi ár.

Ísland á sterka keppendur sem geta horft hátt. Bryndís Embla kemur inn í spjótkast kvenna með annan besta árangur keppenda,  Aðrir íslenskir keppendur mæta öflugri samkeppni, en hafa allir sýnt góðan árangur á tímabilinu og unnið sér inn rétt til þátttöku á stærsta móti aldursflokksins. 

Keppni hefst fimmtudaginn 16. júlí með undanrásum og undankeppnum og lýkur sunnudaginn 19. júlí þegar síðustu Evrópumeistararnir verða krýndir. Búast má við spennandi keppni í fjóra daga þar sem framtíðarstjörnur evrópskra frjálsíþrótta stíga fram á sjónarsviðið.

FRÍ mun fylgjast náið með íslenska hópnum alla mótsdagana og birta fréttir, úrslit og myndir frá keppninni á fri.is og samfélagsmiðlum sambandsins.

Dagskrá

Dagur	Keppandi	Grein	Tími	Athugasemd
16. júlí	Karl Sören	Stangarstökk	17:47	Undankeppni
17. júlí	Bryndís Embla Einarsdóttir	Spjótkast	08:25 eða 09:50	Undankeppni*
	Tobías Þórarinn Matharel	Langstökk	11:45	Undankeppni
	Gabríel Glói Freysson	200 m	12:15	Riðlar
18. júlí	Garðar Atli Gestsson	Spjótkast	08:55 eða 10:10	Undankeppni*
	Benedikt Gunnar Jónsson	Kúluvarp	11:43	Undankeppni
	Gabríel Glói Freysson	200 m	12:30	Undanúrslit**
	Karl Sören	Stangarstökk	16:25	Úrslit**
	Tobías Þórarinn Matharel	Langstökk	17:25	Úrslit**
	Gabríel Glói Freysson	200 m	19:25	Úrslit**
	Benedikt Gunnar Jónsson	Kúluvarp	19:35	Úrslit**
19. júlí	Bryndís Embla Einarsdóttir	Spjótkast	12:15	Úrslit**
	Garðar Atli Gestsson	Spjótkast	18:15	Úrslit**

Streymi

Hægt verður að fylgjast með mótinu í beinu streymi á European Athletics. sem er að finna hér fyrir neðan

https://www.european-athletics.com/home/live-stream/rieti-2026

Úrslit

https://7cy74.r.sp1-brevo.net/mk/cl/f/sh/7nVU1aA2ng3nQ8IaJii3FP0C5pxsBsK/WDwEyRQxfAtH