Keppni íslenska hópsins á heimsmeistaramóinu U20 í Eugene í Oregon hófst á miðvikudag þegar Ísold Sævarsdóttir keppti í fyrri hluta sjöþrautarinnar og Christina Alba Marcus Hafliðadóttir tók þátt í undanrásum 100 metra hlaups.
Skógareldar í Oregon hafa haft áhrif á loftgæði á svæðinu og íslensku keppendurnir þurfa því, ásamt öðrum keppendum, að takast á við krefjandi aðstæður meðan á mótinu stendur.
Ísold í 11. sæti eftir fjórar greinar
Ísold Sævarsdóttir úr FH er í 11. sæti sjöþrautarinnar eftir fyrri keppnisdag með 3.314 stig. Hún er aðeins átta stigum á eftir Meike Huistra frá Hollandi, sem er í tíunda sæti.
Ísold hóf keppni í 100 metra grindahlaupi þar sem hún kom í mark á 14,15 sekúndum í 1,3 metra meðvindi. Tíminn gaf henni 957 stig og var ellefti besti árangur keppenda í greininni.
Í hástökkinu jafnaði Ísold persónulegt met sitt þegar hún fór yfir 1,69 metra. Hún fékk 842 stig fyrir árangurinn og var með tíunda besta árangur keppenda í greininni.
Í kúluvarpi kastaði Ísold 12,13 metra og fékk 670 stig. Hún var með níunda lengsta kast keppninnar og færðist upp í níunda sæti samanlagt eftir þrjár greinar.
Fyrri keppnisdeginum lauk með 200 metra hlaupi. Ísold hljóp á 25,46 sekúndum í 0,7 metra mótvindi og fékk 845 stig. Hún lauk deginum í 11. sæti af 24 keppendum.
Finninn Enni Virjonen leiðir keppnina með 3.676 stig. Zola Ndouma-Mona frá Frakklandi er aðeins sjö stigum á eftir og Thea Brown frá Bretlandi er í þriðja sæti með 3.632 stig.
Sjöþrautinni lýkur í dag með langstökki, spjótkasti og 800 metra hlaupi. Langstökkið hefst klukkan 17:25 að íslenskum tíma, spjótkastið klukkan 19:30 og 800 metra hlaupið klukkan 01:10 aðfaranótt föstudags.
Alba hljóp á 12,24 sekúndum
Christina Alba Marcus Hafliðadóttir úr Fjölni keppti í undanrásum 100 metra hlaups kvenna.
Alba hljóp í þriðja riðli og kom í mark á 12,24 sekúndum í 0,2 metra mótvindi. Hún varð í 61. sæti af þeim 64 keppendum sem luku keppni og komst ekki áfram í undanúrslit.
Alba lýsir því á Instagram story-inu sínu að hún hafði glímt við veikindi í aðdraganda keppninnar, sem setti strik í reikninginn fyrir hlaupið.
Þótt tíminn hafi verið nokkuð frá hennar besta árangri öðlaðist Alba mikilvæga reynslu á sínu fyrsta heimsmeistaramóti U20, þar sem hún keppti við fremsta unga spretthlaupsfólk heims.
Kjartan Óli næstur á braut
Kjartan Óli Bjarnason úr Fjölni verður næsti íslenski keppandinn til að hefja keppni. Hann tekur þátt í undanrásum 400 metra hlaups karla í dag, fimmtudaginn 6. ágúst, klukkan 19:40 að íslenskum tíma.
Kjartan á best 47,44 sekúndur í greininni og varð Íslandsmeistari á 100. Meistaramóti Íslands í sumar. Komist hann áfram fara undanúrslitin fram klukkan 02:44 aðfaranótt föstudags.
Á föstudag hefja síðan Bryndís Embla Einarsdóttir og Eir Chang Hlésdóttir keppni. Bryndís keppir í undankeppni spjótkasts kvenna klukkan 17:00 eða 18:37, eftir því í hvorum riðlinum hún verður. Eir keppir í undanrásum 200 metra hlaups kvenna klukkan 19:15.