Erna Sóley Gunnarsdóttir keppti í undankeppni kúluvarps kvenna á sunnudaginn. HM í Tókýó er hennar annað heimsmeistaramót og náði hún sér ekki alveg á strik að þessu sinni en hennar lengsta kast var 16,87 m og endaði hún í 31. sæti. En við erum að sjálfsögðu virkilega stolt af henni Ernu Sóleyju enda ekki lítið afrek að komast á HM og keppa á því stóra sviði.
Þátttakan á HM fer beint í reynslubankann og við trúum því að keppni á fleiri stórmótum bíði Ernu Sóleyjar í framtíðinni.
Tímabilið er búið að vera langt og strangt hjá henni og núna vonum við bara að hún fái gott off season og komi inn í næsta tímabil af miklum krafti.
Við heyrðum aðeins frá Ernu Sóleyju eftir keppnina og eins og við var að búast var hún ekkert allt of sátt með árangurinn sinn að þessu sinni. Flott íþróttakona hér á ferð.
„Ég hefði viljað gera betur og mér finnst eins og ég eigi meira inni en það sem ég náði að gera á mótinu“, sagði Erna Sóley að keppni lokinni.