Heimsmeistaramótið í frjálsíþróttum fer fram í Tókýó í Japan dagana 13.-21. september og í ár taka þrír íslenskir frjálsíþróttakeppendur þátt. Heimsmeistaramótið er eitt stærsta frjálsíþróttamót heims og þangað mætir allt besta frjálsíþróttafólkið og því einstakt tækifæri fyrir íslenska keppendur að etja kappi við heimselítuna í sportinu.
Næst út á völlinn í Tókýó, og síðust Íslendinganna, er kúluvarparinn Erna Sóley Gunnarsdóttir, en hún tekur þátt í undankeppni kúluvarps kvenna á morgun, laugardaginn 20. september. Erna Sóley er í kasthópi A sem keppir klukkan 10:00 að staðartíma (klukkan 01:00 að íslenskum tíma).
Erna Sóley er margfaldur Íslandsmeistari í kúluvarpi og á hún einnig Íslandsmetin í greininni, bæði innanhúss og utanhúss. Íslandsmet hennar utanhúss er frá síðasta sumri og er 17,91 m en í ár hefur hún lengst kastað 17,63 m. Þetta er annað heimsmeistaramót Ernu Sóleyjar utanhúss en hún var meðal keppenda á HM Búdapest 2023 og kastaði þar 16,68 m og endaði í 27. sæti.
Það eru 36 keppendur skráðir til leiks í undankeppni kúluvarpsins og þar á meðal er sú sem á lengsta kast ársins, hin bandaríska Chase Jackson sem hefur lengst kastað 20,95 m. Heimsmetið í greininni er frá 1987 og er 22,63 m.
Við hlökkum til að fylgjast með Ernu Sóleyju í kúluvarpshringnum á HM í Tókýó.
Við hittum Ernu Sóleyju áður en hún flaug út til Japan til að taka stöðuna á henni svona rétt fyrir HM.
Til hamingju með HM sætið! Hvernig var tilfinningin þegar það var alveg ljóst að þú værir í 32. sæti á heimslistanum í kúluvarpi og því á leiðinni á heimsmeistaramótið í frjálsíþróttum núna í september?
„Það var bara frábært að komast að þessu. Það var smá bið og maður vissi ekki hvað myndi gerast en ég var svona nokkuð örugg að ég myndi komast en það var bara frábært að fá staðfestingu á þessu og geta farið“.
Sumarið hefur verið aðeins upp og ofan hjá þér, en þú áttir fínan árangur núna um helgina – gaf það þér aukið sjálfstraust inn í síðustu metrana fyrir HM?
„Já, þetta er búið að vera dálítið erfitt undanfarið í sumar. Ég átti rosalega gott innanhússtímabil en síðan náði ég ekki alveg, út af ýmsum ástæðum, að ná því aftur á sumartímabilinu. En við erum búin að vinna vel í gegnum það og ég er bara mjög spennt að geta klárað tímabilið mjög vel“.
Þú hefur áður keppt á bæði Ólympíuleikum og HM – hvernig nýtist sú reynsla þér núna?
„Það nýtist mjög vel. Maður veit alveg hvað maður er að fara í. Veit alveg hvernig aðstæðurnar eru, stressið og umgjörðin er allt öðruvísi heldur en á minni mótum þannig að það gefur góðan byr að fara inn í mót með reynslu“.
Ertu með einhver markmið sem þú vilt deila með okkur?
„Já, ég er bara með markmið að klára tímabilið vel. Ég á miklu meira inni finnst mér heldur en ég er búin að vera að sýna. Mig langar að fara að sýna hvað ég get og klára tímabilið mjög vel og ná góðum árangri á HM.“
Hvernig vinnur þú með spennu og væntingar fyrir svona stórt mót – ertu með einhverja sérstaka rútínu eða aðferðir til að halda einbeitingu?
„Já, bara að slaka á og hlusta á góða tónlist og vera slök. Ég er yfirleitt góð að ná mér niður þannig að ég þarf oft að ná mér upp frekar og gíra mig í gang. Þannig að ég er frekar í því að gíra mig upp og verða meira stressuð til þess að ganga vel“.
Hvað tekur við hjá þér eftir HM?
„Taka smá pásu og svo bara fulla ferð áfram í næsta ár. Næsta ár verður líka spennandi, EM og svona. Bara halda áfram og gera betur og betur á hverju ári“.
Hvaða ráð myndir þú gefa ungum íþróttakrökkum sem vilja feta í fótspor þín einn daginn og fara á stórmót í frjálsíþróttum?
„Bara haldið áfram að gera ykkar og svo lengi sem þið vinnið vel og gerið ykkar besta þá getið þið náð þeim markmiðum sem þið viljið.“
Sýnt verður frá Heimsmeistaramótinu í frjálsíþróttum alla keppnisdagana á RÚV og RÚV2. Hægt er að sjá dagskrá útsendinga hér.