Meistaramót Íslands í 10 km götuhlaupi fór fram í gærkvöldi samhliða Aukakrónuhlaupi Ármanns. Frábær þátttaka var í hlaupinu en tæplega 500 hlauparar tóku þátt, virkilega gaman að sjá hversu vinsæl götuhlaupin hérna á Íslandi eru orðin, enda eru þau frábær skemmtun og góð hreyfing.
Stefán Pálsson (Ármann) og Andrea Kolbeinsdóttir (ÍR) stóðu uppi sem sigurvegarar og eru því Íslandsmeistarar í 10 km götuhlaupi árið 2025 og óskum við þeim innilega til hamingju með það. Stefán hljóp kílómetrana tíu á 31:28 mín og Andrea kom í mark á 34:06 mín. Ekki nóg með að sigra hlaupið þá setti Stefán einnig aldursflokkamet í aldursflokki 35-39 ára.
Annar í karlaflokki var Þorsteinn Roy Jóhannsson (Umf. Öræfa) á tímanum 31:29 mín og þriðji var Sindri Karl Sigurjónsson (UMSB) á 33:03 mín, sem er nýtt aldursflokkamet í greininni í flokki pilta 16 -17 ára. Glæsilegt hjá honum Sindra Karli sem er nýbúinn að bæta aldursflokkametið í 5 km götuhlaupi.
Í kvennaflokknum var Elísa Kristinsdóttir (Höttur) önnur á tímanum 36:51 mín og þriðja var Elín Edda Sigurðardóttir (ÍR) en hún kom í mark á 37:12 mín.
Heildarúrslit hlaupsins má sjá hér.
Myndir frá hlaupinu munu fljótlega koma inn á Flickr síðu FRÍ.