Það var ekki aðeins okkar fremsta frjálsíþróttafólk sem var að keppa um helgina heldur einnig okkar unga og efnilega íþróttafólk þar sem Meistaramót Ísland 11-14 ára fór fram um helgina í Kaplakrika.
Mikil stemming var í Krikanum og ekki annað að sjá en að gleðin hafi verið við völd, og ekki lét árangurinn á sér standa, en það voru hvorki meira né minna en 888 persónulegar bætingar á mótinu. Greinilegt að æfingar vetrarins eru að skila sér. Virkilega vel gert!
Sett voru tvö mótsmet á mótinu. Daníel Már Ólafsson (HHF) bætti mótsmetið í þrístökki pilta 13 ára þegar hann stökk 9,85 og Sigurður Ari Orrason bætti mótsmetið í 60 m hlaupi þegar hann hljóp á 7,61 sek.
Það voru ÍR-ingar sem sigruðu heildarstigakeppnina en þau hlutu 505 stig, í öðru sæti urðu FH-ingar með 459,5 stig og í þriðja sæti Ármenningar með 411,5 stig.
Óskum öllum keppendum til hamingju með sinn frábæra árangur.
Heildarúrslit mótsins má sjá hér.
Myndir frá mótinu eru komnar inn á Flickr síðu FRÍ.