Í sumar og haust ætlar FRÍ að fara í ferðalag um landið þar sem boðið verður upp á opna frjálsíþróttaæfingu fyrir krakka. Markmiðið með verkefninu er að kynna frjálsar íþróttir fyrir börnum í gegnum leik, gleði og fjölbreyttar æfingar.
Öll félög geta sótt um að fá æfingu en við hvetjum sérstaklega þau félög sem bjóða ekki upp á skipulagðar frjálsíþróttaæfingar að skrá sig. Þau félög sem halda úti frjálsíþróttastarfi og óska eftir að fá heimsókn fá þá mögulega einhver ný verkfæri eða hugmyndir.
Æfingarnar henta krökkum á aldrinum 4 – 12 ára en fyrirkomulagið á æfingunum fer eftir fjölda og aldri hverju sinni. Ef hóparnir eru stórir er óskað eftir aðstoð íþróttafélags með sjálfboðaliða. Áhersla er lögð á þátttöku allra óháð getu, bakgrunni eða fyrri reynslu. Einnig er stefnt á að ná til þjálfara, sjálfboðaliða og annarra sem hafa áhuga og þeim gefin verkfæri og hugmyndir að því hvernig hægt er að innleiða frjálsar íþróttir í íþróttastarf á svæðinu.
Ef þitt íþróttafélag hefur áhuga á að taka þátt, skráið ykkur hér að neðan og við höfum samband!
https://forms.gle/aDEnMAWbouRUSCL89
Fyrir nánari upplýsingar um verkefnið má hafa samband við Björgu Gunnarsdóttur, bjorg@fri.is.