Eir Chang Hlésdóttir og Bryndís Embla Einarsdóttir luku keppni á heimsmeistaramóti U20 í Eugene í Oregon um helgina. Bryndís var aðeins 44 sentímetrum frá sæti í úrslitum spjótkastsins á meðan Eir keppti í undanrásum 200 metra hlaups.
Bryndís Embla 44 sentímetrum frá úrslitum
Bryndís kastaði lengst 48,64 metra í undankeppni spjótkastsins og hafnaði í 16. sæti í heildina. Tólf keppendur komust áfram í úrslit og var síðasta úrslitasætið tekið á 49,08 metrum. Bryndís var því aðeins 44 sentímetrum frá því að tryggja sér sæti meðal tólf bestu U20 í heiminum.
Bryndís, sem er fædd árið 2009 og því á yngra ári í U20-flokki, kom inn í mótið með 51,28 metra sem sinn besta árangur með U20-spjótinu. Hún var meðal yngri keppenda í greininni og lauk sínu fyrsta HM U20 í 16. sæti.
Kastsería
X – 47.62 – 48.64
Eir hljóp á 24,32 sekúndum
Eir Chang Hlésdóttir keppti í níunda riðli undanrása 200 metra hlaupsins. Hún kom í mark á 24,32 sekúndum í 0,5 m/s mótvindi og varð sjöunda í sínum riðli. Tíminn skilaði henni 53. sæti í heildina af þeim 74 keppendum sem luku hlaupi.
Eir kom inn í mótið með 23,44 sekúndur sem persónulegt met og hafði hlaupið best á 23,51 sekúndu á tímabilinu. Síðasti tíminn sem skilaði sæti í undanúrslitum í Eugene var 23,87 sekúndur.
Þar með lauk keppni þeirra Eirar og Bryndísar á HM U20, þar sem þær fengu að etja kappi við fremsta frjálsíþróttafólk heims í sínum aldursflokki.
