Tveir íslenskir keppendur hafa þegar tryggt sér sæti í úrslitum á Evrópumeistaramótinu í frjálsíþróttum í Birmingham. Hilmar Örn Jónsson er kominn í úrslit í sleggjukasti karla og Guðrún Karítas Hallgrímsdóttir í úrslit í sleggjukasti kvenna.
Hilmar tryggði sér sæti í úrslitum með frábæru þriðja kasti í undankeppninni. Eftir 73,13 m og 73,44 m í fyrstu tveimur umferðunum kastaði hann 76,63 m í þeirri þriðju og tryggði sér sjöunda sæti í heildina.
Hilmar kom inn á mótið í 13. sæti á ranking lista og bætti því stöðu sína um sex sæti í undankeppninni. Hann keppir í úrslitum í dag, þriðjudaginn 11. ágúst, kl. 18:10.
Guðrún Karítas þurfti aðeins eitt kast til að tryggja sig inn í úrslit sleggjukasts kvenna. Hún kastaði 70,31 m í fyrstu umferð og endaði með sjötta besta árangur undankeppninnar. Hún fylgdi því eftir með köstum upp á 69,70 m og 66,15 m.
Guðrún var í sjöunda sæti á ranking lista fyrir mótið og fór því einu sæti ofar í undankeppninni. Úrslit sleggjukasts kvenna fara fram miðvikudaginn 12. ágúst kl. 18:45.
Hverjir keppa næst?
Næstur íslensku keppendanna á eftir Hilmari og Guðrúnu er Sindri Hrafn Guðmundsson, sem keppir í undankeppni spjótkasts karla fimmtudaginn 13. ágúst kl. 12:35 eða 13:55, eftir því í hvorum riðlinum hann verður. Sindri kemur inn á mótið í 13. sæti á ranking lista og verður því í baráttunni um eitt af tólf sætunum í úrslitum.
Baldvin Þór Magnússon keppir síðan í úrslitum 10.000 m hlaups karla laugardaginn 15. ágúst kl. 19:25. Baldvin er í 17. sæti á ranking lista fyrir mótið.
Síðasti íslenski keppandinn á mótinu verður Hlynur Andrésson, sem hleypur maraþon sunnudaginn 16. ágúst kl. 07:10.
Átta Íslendingar keppa á EM í Birmingham dagana 10.–16. ágúst og verður sýnt beint frá mótinu á RÚV / RÚV 2.