Átta íslenskir keppendur verða meðal 1.643 keppenda frá 49 þjóðum á Evrópumeistaramótinu í frjálsíþróttum sem fer fram í Birmingham dagana 10.–16. ágúst. Sýnt verður frá mótinu í beinni á RÚV.
Íslenska liðið samanstendur af sex kösturum og tveimur langhlaupurum. Hópurinn er jafn fjölmennur og íslenska liðið á EM í Róm árið 2024, þegar átta Íslendingar kepptu á mótinu og hópurinn var sá fjölmennasti frá Íslandi á EM í 66 ár.
Alls eru 840 karlar og 803 konur skráð til keppni í Birmingham.
Íslenski hópurinn kemur til Birmingham eftir sterkt keppnistímabil. Fjórir keppendur hafa sett eða jafnað Íslandsmet á árinu.