Hið víðfræga Víðavangshlaup ÍR fer fram á Sumardaginn fyrsta, fimmtudaginn 23. apríl. Í ár verður hlaupið haldið í 111. sinn og er sem fyrr einn af föstu punktunum í hlaupasumri margra hlaupara. Víðavangshlaupið hefur lengi verið meðal vinsælustu 5 km götuhlaupa landsins og er frábær leið til að hefja sumarið á skemmtilegu hlaupi í hjarta Reykjavíkur.
Hlaupið verður ræst klukkan 12:00 í Vonarstræti og liggur hlaupaleiðin um miðborg Reykjavíkur. Í ár verður einnig boðið upp á 2,5 km skemmtiskokk án tímatöku fyrir þau sem vilja taka þátt á léttari nótum. Nánari upplýsingar um hlaupið, hlaupaleiðina og skráningu má finna hér.
Samhliða Víðavangshlaupi ÍR fer fram Meistaramót Íslands í 5 km götuhlaupi. Keppt verður um Íslandsmeistaratitil í karla- og kvennaflokki, auk þess sem keppt verður um Íslandsmeistaratitla í aldursflokkum samkvæmt reglugerð FRÍ.
Athygli er vakin á því að einungis íslenskir ríkisborgarar sem eru skráðir í aðildarfélag innan FRÍ geta orðið Íslandsmeistarar og/eða Íslandsmeistarar í aldursflokki. Þátttakendur sem stefna að því að vinna til verðlauna eru hvattir til að ganga úr skugga um að skráning í aðildarfélag sé í lagi og að þeir klæðist aðildabúningi á keppnisdegi.
Vonir standa til þess að veðrið leiki við hlaupara og gesti og að góð stemning myndist í miðborg Reykjavíkur á sumardaginn fyrsta þar sem við fögnum komu sumars og hefjum frábært hlaupasumar.
