VIKAN: Vormót HSK, EM U18-lágmark og sterkur árangur í maí

Vikan í frjálsum íþróttum var viðburðarík þar sem Vormót HSK fór fram á Selfossi, íslenskir kastarar létu til sín taka erlendis og fjöldi hlaupara keppti í stórum götuhlaupum í Evrópu.

Maímánuður hefur farið vel af stað hjá íslensku frjálsíþróttafólki. Á síðustu vikum hafa íslenskir keppendur náð góðum árangri bæði hér heima og erlendis, þar sem met féllu, lágmörk náðust og margir bættu sinn besta árangur.

Vormót HSK á Selfossi

Vormót HSK fór fram á Selfossi miðvikudaginn 21. maí þar sem 115 keppendur voru skráðir til leiks. Góður árangur náðist á mótinu og alls voru sett þrjú HSK met og eitt aldursflokka-Íslandsmet.

Mótið var einn af hápunktum maímánaðar til þessa og nokkrir ungir keppendur sýndu að þeir eru í góðu formi þegar keppnistímabilið er að komast á fullt.

Úrslit mótsins má sjá hér

Bryndís Embla með Íslandsmet og EM U18-lágmark

Bryndís Embla Einarsdóttir átti einn af hápunktum mótsins á Selfossi 21. maí þegar hún kastaði 500 gramma spjóti 51,16 metra í flokki 16–17 ára stúlkna.

Með kastinu bætti hún eigið aldursflokka-Íslandsmet, sem var 46,93 metrar frá 18. ágúst 2025. Bætingin er því rúmir fjórir metrar.

Árangurinn er einnig vel yfir lágmarki fyrir EM U18, en lágmarkið í spjótkasti er 46,00 metrar.

Ívar Ylur bætti eigið HSK met í grindahlaupi

Ívar Ylur Birkisson bætti eigið HSK met í 110 metra grindahlaupi 18–19 ára pilta á 106,7 cm grindum á Selfossi 21. maí þegar hann hljóp á 15,08 sekúndum.

Fyrra met hans var 15,28 sekúndur, sett á Sauðárkróki 5. júlí 2025. Ívar var einnig aðeins 0,03 sekúndum frá HSK meti Jóns Arnars Magnússonar í 20–22 ára flokki, sem er 15,05 sekúndur frá árinu 1989.

Kristján Kári með fyrsta HSK metið í kringlukasti

Kristján Kári Ólafsson setti nýtt HSK met í kringlukasti 18–19 ára pilta með 1,75 kg kringlu á Selfossi 21. maí þegar hann kastaði 44,97 metra.

Fyrra metið var 44,83 metrar og hafði staðið frá 2. september 2007. Kristján Kári var mjög öflugur í kastgreinum á síðasta ári og setti þá fjölda HSK meta í sleggjukasti, lóðkasti og kastþraut. Þetta var hans fyrsta HSK met í kringlukasti.

Sterkur árangur íslenskra kastara erlendis

Íslenskir kastarar voru einnig áberandi erlendis í vikunni.

Guðrún Karítas Hallgrímsdóttir varð önnur í sleggjukasti á sterku móti í Halle í Þýskalandi með 71,81 metra kasti. Hún keppti einnig í Ballerup í Danmörku fyrr í vikunni þar sem hún kastaði 66,17 metra.

Elísabet Rut Rúnarsdóttir sigraði í sleggjukasti á Sun Belt Outdoor Track & Field Championships í Bandaríkjunum með 70,81 metra kasti.

Guðni Valur Guðnason kastaði kringlu 61,88 metra í Halle og náði sínum besta árangri á tímabilinu.

Hera Christensen kastaði 53,88 metra í kringlukasti í Ballerup og 51,67 metra í U23 flokki í Halle.

Arndís Diljá Óskarsdóttir varð önnur í spjótkasti á Conference USA Outdoor Track & Field Championships með 50,24 metra kasti.

Sindri byrjar sumarið með krafti

Sindri Hrafn Guðmundsson er búinn að ná tveimur köstum yfir 80m í sumar en hann kastaði 81.90 í Pocatello, USA en það er hans annar besti árangur. Hann kastaði síðan 80.73 í Tucson, USA. Sindri keppir á NM um helgina og verður gaman að fylgjast með honum þar

Góður árangur í Bandaríkjunum

Júlía Kristín Jóhannesdóttir varð önnur í sjöþraut á The American Outdoor Track & Field Championships með 5617 stig, sem er persónuleg bæting. Hún hljóp einnig 100 metra grindahlaup á 13,15 sekúndum í undanrásum og 13,19 sekúndum í úrslitum. Tímarnir voru þó ekki löglegir vegna of mikils meðvinds.

Eva María Baldursdóttir varð önnur í hástökki á ACC Outdoor Track & Field Championships með 1,80 metra stökk.

Ingibjörg Sigurðardóttir náði einnig góðum árangri þegar hún hljóp 400 metra grindahlaup á 59,98 sekúndum og bætti sinn besta árangur á tímabilinu.

Íslendingar í Kaupmannahafnar maraþoninu

Hlynur Andrésson var fyrstur Íslendinga í mark í Copenhagen Marathon 10. maí þegar hann hljóp á 2:15:30. Elín María Matthíasdóttir var fyrst íslenskra kvenna í mark á 2:56:43 og bætti sinn persónulega árangur. Fjöldi íslenskra hlaupara tók þátt í hlaupinu og margir þeirra bættu sinn besta árangur.

Karlar

1. Hlynur Andrésson – 2:15:30, SB
2. Hermann Bjarni Ragnarsson – 2:45:24, PB
3. Pétur Haukur – 2:45:51, PB
4. Anton Ástvaldsson – 2:51:23, PB
5. Sigmundur Páll Freysteinsson – 2:54:12, PB

Konur

1. Elin Maria Matthiasdottir – 2:56:43, PB
2. Fanney Þorbjörg Guðmundsdóttir – 3:14:26, PB
3. Eva Skarpaas – 3:33:38, PB
4. Sigríður Rúna Þóroddsdóttir – 3:36:35, SB
5. Helga Sigurlaug Erlingsdóttir – 3:36:35, PB