Fyrri keppnisdagur Norðurlandameistaramótsins utanhúss fór fram í Kaupmannahöfn laugardaginn 30. maí. Íslenski hópurinn hóf mótið vel og tveir íslenskir keppendur komust á verðlaunapall á fyrsta degi mótsins. Aðstæður voru þó krefjandi, þar sem keppendur þurftu að takast á við mikinn og á köflum óútreiknanlegan vind sem setti svip sinn á keppnina.
Hilmar Örn Jónsson átti frábæra keppni í sleggjukasti karla og hafnaði í 2. sæti með kast upp á 75,10 m. Hilmar sýndi enn og aftur að hann er á meðal fremstu kastara Norðurlandanna og tryggði Íslandi silfurverðlaun á fyrsta keppnisdegi.
Ingibjörg Sigurðardóttir náði einnig verðlaunasæti þegar hún varð þriðja í 400 m grindarhlaupi kvenna á 62,16 sek. Ingibjörg hljóp fínt hlaup og tryggði Íslandi önnur verðlaun dagsins.
Í 100 m hlaupi kvenna varð Eir Chang Hlésdóttir í 6. sæti á 11,65 sek, en meðvindur var yfir leyfilegum mörkum eða +4,0 m/s. Eir var í níunda sæti eftir undanrásir en fékk sæti í úrslitahlaupinu vegna forfalla. Hún nýtti tækifærið vel og vann sig upp í 6. sæti í úrslitunum. Eir keppir einnig í 200 m hlaupi á seinni keppnisdegi mótsins.
Í 100 m hlaupi karla varð Kristófer Þorgrímsson í 14. sæti á 10,88 sek í löglegum meðvindi, +0,5 m/s. En hann þurfti að glíma við meðvind í byrjun hlaups og mótvind í lokin. Kristófer keppir einnig í 200 m hlaupi á sunnudeginum.
Í 400 m grindarhlaupi karla varð Ívar Kristinn Jasonarson í 6. sæti á 52,93 sek. Í stangarstökki kvenna urðu Hanna María Petersdóttir og Karen Sif Ársælsdóttir í 8. og 9. sæti, þar sem Hanna María stökk 3,30 m og Karen Sif 3,10 m.
Í kringlukasti kvenna varð Hera Christensen í 6. sæti með kast upp á 55,42 m.
Heilt yfir var fyrri dagur Norðurlandameistaramótsins sterkur hjá íslenska hópnum, með tveimur verðlaunasætum og nokkrum góðum frammistöðum. Seinni keppnisdagur mótsins fer fram sunnudaginn 31. maí, þar sem fjölmargir íslenskir keppendur verða aftur í eldlínunni.