Andrea Kolbeinsdóttir úr ÍR setti nýtt Íslandsmet í 5 km götuhlaupi þegar Víðavangshlaup ÍR fór fram í miðborg Reykjavíkur á sumardaginn fyrsta. Hlaupið var jafnframt Meistaramót Íslands í 5 km götuhlaupi.
Andrea kom fyrst kvenna í mark á 16:02 mínútum og bætti eigið Íslandsmet um 16 sekúndur. Fyrra met hennar var 16:18 mínútur, sett í Reykjavík þann 19. júní 2025.
Með sigrinum varð Andrea Íslandsmeistari í 5 km götuhlaupi. Hún heldur því áfram að festa sig í sessi sem ein sterkasta hlaupakona landsins, en hún hefur nú unnið Víðavangshlaup ÍR sex ár í röð.
Öruggur sigur í kvennaflokki
Andrea vann öruggan sigur í kvennaflokki. Halldóra Huld Ingvarsdóttir úr FH varð önnur á tímanum 17:16 mínútum, sem er persónuleg bæting hjá henni. Íris Anna Skúladóttir úr FH varð þriðja á 17:29 mínútum.
Íris Dóra Snorradóttir úr FH varð fjórða á 17:47 mínútum og María Birkisdóttir úr FH fimmta á 18:41 mínútum.
Stefán Íslandsmeistari eftir spennandi hlaup
Í karlaflokki var baráttan um Íslandsmeistaratitilinn afar jöfn. Stefán Pálsson úr Ármanni kom fyrstur í mark á tímanum 15:18 mínútum og tryggði sér Íslandsmeistaratitilinn.
Davíð Freyr Magnússon úr ÍR varð annar á 15:22 mínútum og Þorsteinn Jóhannsson úr UMFÖ varð þriðji á 15:26 mínútum. Arnar Pétursson úr Breiðabliki varð fjórði á 15:28 mínútum, rétt á undan þeim Jökli Bjarkasyni úr ÍR og Stefáni Kára Smárasyni úr FH, sem komu báðir í mark á 15:29 mínútum.
Aðeins ellefu sekúndur skildu að fyrstu sex hlauparana í karlaflokki.
Verðlaunahafar á Meistaramóti Íslands í 5 km götuhlaupi
Konur
- Andrea Kolbeinsdóttir, ÍR — 16:02 — Íslandsmet
- Halldóra Huld Ingvarsdóttir, FH — 17:16
- Íris Anna Skúladóttir, FH — 17:29
Karlar
- Stefán Pálsson, Ármann — 15:18
- Davíð Freyr Magnússon, ÍR — 15:22
- Þorsteinn Jóhannsson, FH — 15:26
Fleiri myndir er hægt að nálgast hér
Víðavangshlaup ÍR var haldið í 111. sinn og fór hlaupið fram í miðborg Reykjavíkur. Hlaupið var í WA ranking category F og jafnframt Meistaramót Íslands í 5 km götuhlaupi.