Frjálsíþróttasamband Íslands hefur nú opnað fyrir umsóknir í Afrekssjóð FRÍ. Íþróttafólk sem telur sig eiga raunhæfan möguleika á styrk er hvatt til að sækja um.
Markmið Afrekssjóðs FRÍ er að styðja við það afreksíþróttafólk sem er í stöðu til að ná langt á alþjóðavettvangi og stendur frammi fyrir mikilvægu keppnistímabili á árinu. Umsóknareyðublað er að finna hér neðst í frétt og skulu allar umsóknir berast á netfangið fri@fri.is.
Við mat á umsóknum verður stuðst við reglugerð um Afrekssjóð FRÍ, sem nálgast má hér.
Árið 2026 hefur farið mjög vel af stað hjá íslensku frjálsíþróttafólki. Bætingar hafa verið tíðar, Íslandsmet fallið og ljóst að fram undan er spennandi sumar með stórum verkefnum. Hápunktur keppnistímabilsins í fullorðinsflokki verður Evrópumeistaramótið í Birmingham dagana 10.–16. ágúst 2026, en einnig eru HM U20 og EM U18 á dagskrá síðar á árinu.
Strax í lok maí bíða tvö mikilvæg landsliðsverkefni, annars vegar Norðurlandameistaramót fullorðinna í Kaupmannahöfn og hins vegar Smáþjóðameistaramótið (European Challenger Championships) í Mónakó. Þessi mót skipta miklu máli fyrir íslenskt afreksíþróttafólk á leið inn í sumarið.
Fyrir þau sem stefna á EM í Birmingham er sérstaklega mikilvægt að safna sem flestum stigum á næstu vikum eða ná beinu lágmarki. Þar mun Meistaramót Íslands í lok júlí gegna lykilhlutverki, enda lokar tímabilið til stigasöfnunar að því móti loknu. Hægt er að fylgjast með stöðunni á Road to Birmingham hér.
Umsóknarfrestur er til 30. apríl.
Við hvetjum það íþróttafólk sem telur sig uppfylla skilyrði og eiga möguleika á stuðningi úr sjóðnum til að senda inn umsókn. Fyrirspurnir má senda á fri@fri.is.