Uppskeruhátíð Frjálsíþróttasambands Íslands fór fram í Laugardalshöllinni fyrr í kvöld og var mikil gleði og stemming meðal þess frjálsíþróttafólks sem mætti. Veittur var fjöldi viðurkenninga til okkar besta og efnilegasta frjálsíþróttafólks, innan vallar sem utan, og farið yfir frjálsíþróttaárið 2025 í máli og myndum.
Frjálsíþróttafólk ársins
Stærstu verðlaun kvöldsins voru val á frjálsíþróttafólki ársins. Guðrún Karítas Hallgrímsdóttir, sleggjukastari úr ÍR, var valin frjálsíþróttakona ársins og spjótkastarinn Sindri Hrafn Guðmundsson úr FH var valinn frjálsíþróttakarl ársins.
Guðrún Karítas átti frábært keppnisár. Hún setti glæsilegt Íslandsmet í sleggjukasti á Meistaramóti Íslands þegar hún kastaði 71,38 metra, árangur sem tryggði henni þátttökurétt á Heimsmeistaramótinu í Tókýó og staðfesti stöðu hennar meðal fremstu sleggjukastara heims. Guðrún Karítas er í dag í 36. sæti á heimslistanum og 18. sæti á Evrópulistanum í sleggjukasti og hefur með frammistöðu sinni sýnt að íslenskar frjálsíþróttakonur eiga fullt erindi í fremstu röð á alþjóðavettvangi. Árangur hennar á árinu, bæði á innlendum mótum og á stærsta sviði heims, ásamt metnaði og dugnaði, gerir Guðrúnu Karítas Hallgrímsdóttur að afar verðskuldaðri frjálsíþróttakonu ársins.
Sindri Hrafn átti mjög fínt keppnisár og staðfesti stöðu sína sem einn fremsti frjálsíþróttamaður landsins. Hann kastaði lengst 81,39 metra á árinu, sem er næstbesti árangur hans frá upphafi og sýndi með því að hann er í fremstu röð spjótkastara á alþjóðlegum mælikvarða. Sindri Hrafn keppti fyrir hönd Íslands á Heimsmeistaramótinu í Tókýó nú í haust og er í dag í 34. sæti á heimslistanum og 18. sæti á Evrópulistanum í spjótkasti. Með frammistöðu sinni á árinu hefur hann sýnt að íslenskir frjálsíþróttamenn eiga fullt erindi á stærstu frjálsíþróttasviðum heims. Árangur Sindra Hrafns á árinu, bæði á innlendum mótum og á alþjóðavettvangi, ásamt miklum metnaði og vinnusemi, gerir hann að afar verðskulduðum frjálsíþróttakarli ársins.
Önnur verðlaun
Stigahæsta afrek ársins skv. stigatöflu Alþjóða frjálsíþróttasambandsins
Viðurkenningu fyrir stigahæsta afrek ársins hlaut Baldvin Þór Magnússon (UFA) en hann fékk 1202 stig fyrir Íslandsmetstímann sinn í 3000 m hlaupi innanhúss, 7;39,94 mín, sem hann hljóp á NM í byrjun febrúar.
Spretthlaupari ársins í kvennaflokki og besta spretthlaupsafrek ársins (Jónsbikar)
Spretthlaupari ársins í kvennaflokki og besta spretthlaupsafrek ársins er Eir Chang Hlésdóttir (ÍR). Hún setti Íslandsmet í 200 m hlaupi bæði innan- og utanhúss í ár. Eir komst í úrslit í 200 m hlaupi á EM U20 í sumar og lenti þar í 7. sæti, sem er frábær árangur hjá þessum unga spretthlaupara. Hún hlaut brons á Smáþjóðaleikunum í 200 m hlaupi og varð Norðurlandameistari U20 í sömu grein. Eir varð Íslandsmeistari innanhúss í 60 m, 200 m og 400 m hlaupi og utanhúss í 100 m og 200 m hlaupi. Eir hlýtur Jónsbikarinn (besta spretthlaupsafrek ársins) fyrir Íslandsmetshlaup sitt innanhúss þar sem hún hljóp á 23,69 sek, en fyrir það hlaut hún 1112 stig.
Spretthlaupari ársins í karlaflokki
Ívar Kristinn Jasonarson (ÍR) er spretthlaupari ársins í karlaflokki í ár. Ívar varð Smáþjóðameistari í 400 m grindahlaupi á tímanum 51,74 sek og var það hlaup stigahæsta afrek karla í spretthlaupum í ár, 1045 stig. Ívar varð Íslandsmeistari í 400 m grindahlaupi og hann var einnig í blönduðu boðhlaupssveitinni í 4×400 m boðhlaupi sem tvíbætti Íslandsmetið í sumar. Flottur árangur í ár hjá þessum reynda hlaupara.
Stökkvari ársins í kvennaflokki
Stökkvari ársins í kvennaflokki er Irma Gunnarsdóttir (FH) en hún setti glæsilegt Íslandsmet í þrístökki á Evrópubikar í sumar þegar hún stökk 13,72 m (1089 stig). Hún hlaut bronsverðlaun í langstökki á NM innanhúss og varð Íslandsmeistari í þrístökki innanhúss og utanhúss og Íslandsmeistari í langstökki innanhúss.
Stökkvari ársins í karlaflokki
Daníel Ingi Egilsson (FH) er stökkvari ársins í karlaflokki. Hann stökk lengst í ár 7,79 m í langstökki (1092 stig), en það gerði hann á Evrópubikar í sumar. Hann var með beint lágmark inn á EM innanhúss í mars og keppti þar í langstökki og lenti í 16. sæti. Daníel Ingi varð Íslandsmeistari í langstökki innanhúss.
Kastari ársins í kvennaflokki
Sleggjukastarinn Guðrún Karítas Hallgrímsdóttir (ÍR) er kastari ársins í kvennaflokki en hún setti glæsilegt Íslandsmet á MÍ í lok sumars þegar hún kastaði 71,38 m (1116 stig) og tryggði sér þátttökurétt á HM í Tókýó. Guðrún Karítas varð að sjálfsögðu Íslandsmeistari í greininni með Íslandsmetskasti sínu. Auk þess að setja Íslandsmet í sleggjukasti setti hún einnig Íslandsmet í lóðkasti og hlaut silfurverðlaun í þeirri grein á NCAA móti innanhúss. Hún er í 36. sæti á heimslistanum og í 18. sæti á Evrópulistanum í sleggjukasti.
Kastari ársins í karlaflokki
Sindri Hrafn Guðmundsson, spjótkastari úr FH, er kastari ársins í karlaflokki. Sindri kastaði lengst í ár 81,39 m (1121 stig). En þetta er annar besti árangur Sindra í greininni frá upphafi og aðeins rétt rúmum metra frá hans besta árangri sem er 82,55 m. Hann varð Íslandsmeistari í greininni í sumar. Sindri var meðal keppenda á HM í Tókýó núna í haust og er í 34. sæti á heimslistanum og 18. sæti á Evrópulistanum.
Fjölþrautakona ársins
Fjölþrautarkona ársins er Ísold Sævarsdóttir (FH) en hún átti stórgott frjálsíþróttaár í ár. Ísold keppti í sjöþraut á NM í fjölþraut og hlaut þar silfurverðlaun og náði lágmarki inn á EM U20, ekkert smá gott NM hjá henni. Á EM U20 lenti hún í 12. sæti í sjöþraut sem er hinn fínasti árangur. Ísold náði einnig góðum árangri í einstaka greinum í ár og þar ber m.a. að nefna að hún fór í fyrsta skipti yfir 6 metrana í langstökki og hljóp frábært 400 m grindahlaup á bikar í sumar þar sem hún setti aldursflokkamet í flokki 18-19 ára og hljóp undir lágmarkinu fyrir EM U20. Ísold var einnig í blönduðu boðhlaupssveitinni í 4×400 m boðhlaupi sem tvíbætti Íslandsmetið í sumar. Hún fékk silfurverðlaun í langstökki á Smáþjóðaleikunum í sumar og vann til tvennra verðlauna á NM U20, brons í 100 m grind og silfur í langstökki. Ísold varð Íslandsmeistari utanhúss í 800 m hlaupi og 100 m grindahlaupi og innanhúss varð hún Íslandsmeistari í 60 m grindahlaupi. Heldur betur fjölhæf og frábær íþróttakona hér á ferð.
Fjölþrautakarl ársins
Þorleifur Einar Leifsson, Breiðablik, er fjölþrautarkarl ársins. Þorleifur varð Íslandsmeistari í tugþraut í sumar. Hann átti frábært mót á Smáþjóðaleikunum í Andorra þar sem hann varð Smáþjóðameistari í langstökki en hann stökk lengst 7,26 m sem var bæting utanhúss um hvorki meira né minna en 74 cm og vann silfurverðlaun í 110 m grindahlaupi. Þorleifur náði á árinu næstbesta tíma Íslendings frá upphafi í 60 m grindahlaupi innanhúss þegar hann hljóp á 8,08 sek og setti aldursflokkamet í flokki 20-22 ára, og náði einnig 3.-4. besta tíma Íslendings í 110 m grindahlaupi. Þorleifur varð Íslandsmeistari innanhúss í 60 m grindahlaupi. Flott ár hjá Þorleifi.
Óvæntasta afrekið
Óvæntasta afrek ársins á spjótkastarinn Arndís Diljá Óskarsdóttir (FH). Arndís átti stórgott ár og bætti sig um hvorki meira né minna en rúma 5 m á árinu og lengst kastaði hún 54,99 m á NCAA East Regionals, og tryggði sig inn á NCAA lokamót. Hún keppti á EM U23 í sumar og kastaði sig þar inn í úrslit og lenti í 12. sæti. Virkilega vel gert hjá Arndísi og það verður gaman að sjá hvort hún brjóti ekki 55 m múrinn fljótlega.
Millivegalengdarhlaupari ársins í kvennaflokki
Aníta Hinriksdóttir (FH) er millivegalengdarhlaupari ársins í kvennaflokki en hún hljóp mjög flott 800 m hlaup í ár, bæði innanhúss og utanhúss, en hún var með um og yfir 1100 stig í báðum þeim hlaupum sem er frábær árangur hjá þessari reyndu hlaupakonu. Aníta hljóp einnig flott 800 m hlaup á NM innanhúss þar sem hún lenti í 3. sæti í greininni og átti annað tveggja stigahæstu afrekanna á RIG í upphafi árs fyrir flott 1500 m hlaup.
Millivegalengdarhlaupari ársins og langhlaupari ársins innan vallar í karlaflokki
Millivegalengdarhlaupari ársins og langhlaupari ársins innan vallar í karlaflokki er Baldvin Þór Magnússon (UFA) en hann átti frábært ár í ár. Hann byrjaði árið af krafti þegar hann bætti eigið Íslandsmet í 3000 m hlaupi, viku seinna bætti hann eigið Íslandsmet í 1500 m hlaupi í geggjuðu hlaupi á RIG þar sem hann endurtók leikinn frá því árinu áður. Svo tveimur vikum eftir það met bætti hann Íslandsmetið með 3000 m hlaupi aftur í frábæru sigurhlaupi sínu á NM inni en þá bætti hann metið um rúmar fimm sekúndur og með því hlaupi tryggði Baldvin sér þátttökurétt á EM inni þar sem hann lenti í 20. sæti. Þvílík byrjun á árinu hjá Baldvini. En hann var ekki hættur þarna því hann bætti enn eitt Íslandsmetið núna í október þegar hann mætti metið í 10 km götuhlaupi. Baldvin varð Íslandsmeistari utanhúss í 1500 m hlaupi í ár. Einnig var Baldvin annar fyrirliða íslenska landsliðsins sem sigraði 3. deild Evrópubikars með yfirburðum í sumar. Glæsilegt ár hjá Baldvini Þór.
Langhlaupari ársins innan vallar í kvennaflokki
Langhlaupari ársins innan vallar í kvennaflokki er Íris Dóra Snorradóttir (FH). Íris Dóra varð Íslandsmeistari í 5.000 m og 10.000 m hlaupi í sumar og í 1500 m hlaupi og 3000 m hlaupi innanhúss í vetur. Hún var í landsliði Íslands sem keppti á NM í víðavangshlaupi núna í október sl.
Langhlaupari ársins utan vallar og utanvegahlaupari ársins í kvennaflokki
Hlaupakonan fjölhæfa Andrea Kolbeinsdóttir (ÍR) er langhlaupari ársins utanvallar og utanvegahlaupari ársins í kvennaflokki. Andrea átti stórgott ár og varð m.a. Íslandsmeistari í 5 km hlaupi og 10 km hlaupi og er með bestan árangur kvenna í maraþoni á árinu. Hún setti Íslandsmet í 5 km götuhlaupi og 3000 m hindrunarhlaupi í sumar. Andrea varð sigurvegari í ITRA National league á Íslandi. Sigurvegari í Puffin run, Hengill Ultra 25 km, Öræfahlaupinu, Mýrdalshlaupinu, Laugaveginum, Kerlingafjöllum Ultra, Fjarðarhlaupinu, Þórsgötu og Garmin Eldslóðinni. Hún var í landsliði Íslands sem keppti á HM í utanvegahlaupum í haust og varð í 13. sæti í Long trail og var í íslensku sveitinni sem lenti í 5. sæti í sveitakeppni hlaupsins. Andrea keppti í utanvegahlaupi í Ástralíu í lok nóvember og kom þar fyrst í mark og tryggði sér þar með rétt til að keppa OCC hlaupinu í UTMB seríunni. Þvílíkt ár hjá þessum frábæra hlaupara.
Langhlaupari ársins utan vallar í karlaflokki
Arnar Pétursson (Breiðablik) er langhlaupari ársins utan vallar í karlaflokki. Arnar varð fjórfaldur Íslandsmeistari í ár í götu- og víðavangshlaupum en hann vann 5 km hlaupið, hálfa maraþonið, Víðavangshlaupið og varð fyrsti Íslandsmeistarinn í 100 km götuhlaupi þar sem hann setti einnig nýtt Íslandsmet. Auk þessa varð Arnar Íslandsmeistari innanhúss í 3000 m hlaupi og utanhúss í 5000 m hlaupi. Hann var hluti af íslenska landsliðinu sem keppti á Evrópumeistaramótinu í götuhlaupum í Brussel sl. vor og hljóp frábært maraþon í Valencia núna fyrr í desember þar sem hann náði þriðja besta tíma íslensks karlmanns í greininni.
Utanvegahlaupari ársins í karlaflokki
Utanvegahlaupari ársins í karlaflokki er Þorsteinn Roy Jóhannsson, UMFÖ. Þorsteinn stóð uppi sem sigurvegari í ITRA National league á Íslandi. Hann sigraði í Esju Ultra, Laugaveginum Ultra, Kerlingafjöllum Ultra og Fjarðarhlaupinu. Hann á hæsta ITRA skor ársins, 889 stig í Kerlingafjöllum Ultra. Þorsteinn var í íslenska landsliðinu sem keppti á HM í utanvegahlaupum núna í haust og keppti þar í short trail.
Hvatningarverðlaun langhlaupanefndar FRÍ í kvennaflokki
Þau verðlaun hlaut Elísa Kristinsdóttir (UÍA) en hún var með stórkostlegar bætingar á árinu, bæði í utanvegahlaupum og götuhlaupum. Hún er mörgum hlaupurum hvatning í að elta draumana og sýnir vel að það er ávallt rými fyrir bætingar. Í sumar hlaut hún 819 ITRA stig fyrir Gyðjuna í Súluhlaupinu og er það hæsta ITRA skor sem íslensk kona hefur hlotið. Elísa varð í 11. sæti í Long trail á HM í utanvegahlaupum í Canfranc á Spáni núna í haust og var í íslensku sveitinni sem lenti í 5. sæti í sveitakeppni hlaupsins, en það var fyrsta landsliðsverkefni Elísu. Elísa er búin að vinna sér rétt í CCC hlaupið í UTMB seríunni en það er það allra flottasta og besta í utanvegahlaupunum þannig að það verður heldur betur gaman að fylgjast áfram með henni Elísu á hlaupum.
Hvatningarverðlaun langhlaupanefndar FRÍ í karlaflokki
Það er hinn ungi og efnilegi Sindri Karl Sigurjónsson (UMSB) sem hlaut hvatningarverðlaun FRÍ í karlaflokki en hann hefur átt stórgott ár. Sindri Karl hljóp frábært 10 km götuhlaup í Aukakrónuhlaupi Ármanns í sumar, sem einnig var MÍ í 10 km hlaupi, en þar kom hann í mark á nýju aldursflokkameti í flokki 16-17 ára, en Sindri er fæddur 2009 og er því á yngra árinu í þeim flokki. Hann setti einnig aldursflokkamet í 5 km götuhlaupi á árinu. Sindri sýndi miklar bætingar í fjölda vegalengda á árinu, bæði innan vallar og utan. Sindri varð Íslandsmeistari í sínum aldursflokki í víðavangshlaupum og var í landsliðinu í víðavangshlaupum sem fór á NM nú í haust. Svo fór hann í sitt fyrsta landsliðsverkefni í vallarfrjálsum í sumar þar sem hann keppti í 5000 m hlaupi á NM U20. Þessi ungi hlaupari á svo sannarlega framtíðina fyrir sér.
Stúlka ársins 19 ára og yngri og óvæntasta afrek 19 ára og yngri
Stúlka ársins 19 ára og yngri er Eir Chang Hlésdóttir (ÍR) og á hún einnig óvæntasta afrek ársins hjá 19 ára og yngri. Eir var með besta afrek kvenna í 60 m, 100 m, 200 m og 400 m hlaupi innanhúss á árinu. Hún setti Íslandsmet í 200 m hlaupi innanhúss og utanhúss. Eir tók þátt í fjölda landsliðsverkefna, bæði í ungmennaflokki sem og fullorðinsflokki, þar sem kannski stendur upp úr árangur hennar í 200 m hlaupinu á EM U20 þar sem hún hljóp sig alla leið í úrslit og endaði í 7. sæti. Frábær íþróttakona er hér á ferð sem sannarlega á framtíðina fyrir sér. Viðurkenninguna fyrir óvæntasta afrekið fær hún fyrir Íslandsmet sitt í 200 m hlaupi innanhúss þar sem hún bætti rétt rúmlega 20 ára gamalt met Silju Úlfarsdóttur um 10 sekúndubrot.
Piltur ársins 19 ára og yngri
Piltur ársins 19 ára og yngri er Hjálmar Vilhelm Rúnarsson (Umf. Selfoss). Hjálmar átti alveg frábært ár í ár, setti aldursflokkamet í flokki 16-17 ára í tugþraut á NM í fjölþraut núna í sumar. Þar átti hann virkilega flotta þraut þar sem hann var efstur í tveimur greinum og annar í öðrum tveimur og bætti sinn persónulega árangur í 6 greinum af 10. Hann keppti einnig í þraut á EYOF í sumar við ansi krefjandi aðstæður þar sem hitinn var um og yfir 40 gráður, en þrátt fyrir það þá gerði hann sér lítið fyrir og var með bestan árangur í tveimur greinum og persónulega bætingu í fjórum greinum. Auk þessa þá varð hann Íslandsmeistari í hástökki utanhúss núna í lok ágúst. Hérna er virkilega öflugur og flottur íþróttamaður á ferð.
Þjálfari ársins og hvatningarverðlaun unglingaþjálfara
Viðurkenningu sem þjálfari ársins og hvatningarverðlaun unglingaþjálfara hlýtur Óðinn Björn Þorsteinsson, yfirþjálfari frjálsíþróttadeildar ÍR. Óðinn átti afar farsælt ár sem þjálfari og hefur sýnt bæði fagmennsku og metnað í starfi sínu með iðkendum á ólíkum aldurs- og keppnisstigum. Hann er þjálfari spretthlauparans Eirar Chang Hlésdóttur, sem átti frábært ár og sýndi stöðugar framfarir og frábæran árangur undir hans leiðsögn. Einnig er hann einn þjálfara kúluvarparans Ernu Sóleyjar sem var einn þriggja íslenskra keppenda á HM í Tókýó í haust. Auk þess gegnir Óðinn Björn lykilhlutverki sem aðalþjálfari unglingaliðs frjálsíþróttadeildar ÍR. Undir hans stjórn náði félagið framúrskarandi árangri á Meistaramóti Íslands 11–14 ára, þar sem ÍR sigraði stigakeppni félagsliða bæði innanhúss og utanhúss. Þá urðu unglingar félagsins einnig bikarmeistarar í flokki 15 ára og yngri, jafnt innanhúss sem utanhúss. Óðinn hefur jafnframt sinnt þjálfun í meistaraflokki af miklum metnaði og er með marga efnilega og flotta iðkendur í sínum hópi. Hann hefur sýnt einstaka hæfni til að byggja upp jákvætt og faglegt æfingaumhverfi.
Besta afrek öldunga í kvennaflokki
Fríða Rún Þórðardóttir (ÍR) á besta afrek öldunga í kvennaflokki. Fríða náði stigahæsta afreki kvenna árið 2025, samkvæmt stigatöflu Alþjóða frjálsíþróttasambandsins að teknu tilliti til aldurs, þegar hún setti aldursflokkamet í 10 km götuhlaupi í flokki 55-59 ára. Fríða hljóp á 38:30 mín. í Lyon í október og fær fyrir það 1127 mastersstig sem er sambærilegt og 32:14 mín. í opnum flokki og nokkuð örugglega hæsta stigaskor hennar á löngum keppnisferli. Fríða tók þátt á NM, EM og HM í masters á árinu og vann þar til fjölda verðlauna í ýmsum greinum. Auk þessa þá setti Fríða sjö aldursflokkamet á árinu. Enn eitt frábæra árið hjá Fríðu Rún innan sem utan vallar.
Besta afrek öldunga karla
Besta afrek öldunga í karlaflokki á Hafsteinn Óskarsson (ÍR). Hafsteinn náði stigahæsta afreki karla árið 2025, samkvæmt stigatöflu Alþjóða frjálsíþróttasambandsins að teknu tilliti til aldurs, þegar hann sló eigið Norðurlandamet innanhúss í flokki 65-69 ára í 800 m hlaupi á Stórmóti ÍR. Hljóp hann á 2:22,46 mín. og fær fyrir þann árangur 1042 mastersstig sem jafngildir 1:51,34 mín. í opnum flokki. Þessi árangur kom honum í 2. sætið á heimslista World Masters Rankings. Hann setti sex aldursflokkamet á árinu og hlaut verðlaun á NM og EM í masters, en hann varð Evrópumeistari í 800 m hlaupi utanhúss. Hafsteinn heldur ótrauður áfram á brautinni með frábærum árangri og sýnir að frjálsíþróttir eru sannarlega íþrótt fyrir allan aldur og aldrei of seint að reima á sig hlaupaskóna.
Nefnd ársins
Í ár er það Fræðslunefnd FRÍ sem hlaut viðurkenningu sem nefnd ársins. Nefndin hefur látið til sín taka með glæsilegum hætti undanfarið þar sem hún hefur staðið fyrir nýjungum í menntun og fræðslu okkar mikilvægasta fólks.
Hópur ársins
Það kemur kannski fáum á óvart að hópur ársins er landsliðið á Evrópubikar en þau sýndu frábæran árangur þar sem þau tóku forystuna í fyrstu grein og héldu henni út mótið og enduðu á að vinna 3. deildina með talsverðum yfirburðum og mun Ísland því keppa í 2. deild á næsta Evrópubikar. Íslenska frjálsíþróttafólkið var í fyrstu þremur sætunum í 26 greinum af 37 og voru sett fjögur Íslandsmet á mótinu. Svo var einnig aðdáunarvert hversu frábær stemming og liðsandi einkenndi liðið og það skilaði sér alla leið í gegnum skjáinn fyrir okkur sem fylgdumst með hérna heima. Algjörlega frábært lið!
Miðlun ársins
Viðurkenningu fyrir miðlun ársins hlutu Daníel Breki og félagar og Skálin entertainment fyrir miðlunina á MÍ á Selfossi í sumar. Glæsileg tímamótamiðlun framkvæmd af hugsjón fyrir frjálsíþróttum. Frábær og sérlega glæsileg frumraun hjá þeim félögum.
Viðburður ársins
Viðburður ársins 2025 er Meistaramót Íslands innanhúss sem frjálsíþróttadeild ÍR hélt í febrúar en það var stórglæsilegt mót, góð framkvæmd og svakalega góð stemning sem myndaðist í Laugardalshöllinni. Fagmennska í einu orði er það sem best lýsir glæsilegum viðburði sem ÍR stóð fyrir.
Abban
Í ár er það Magnús Jakobsson, betur þekktur sem Maggi Jak, sem hlýtur Öbbuna. Magnús hóf feril sinn sem frjálsíþróttamaður hjá UMF Reykdæla og síðar UMSB og UMSK, en það er þó utan keppnisvallar sem stærstu afrek hans liggja. Hann tók fyrst þátt í félagsmálum árið 1953 og hefur síðan þá, í meira en sjö áratugi, starfað ósérhlífinn fyrir íþróttahreyfinguna, fyrst í ungmennafélögum og síðar innan FRÍ. Magnús sat í stjórn FRÍ frá 1968 og var formaður sambandsins 1989–1993. Hann hefur gegnt fjölda trúnaðarstarfa, m.a. sem fyrsti formaður landsliðsnefndar og formaður skráninganefndar og laganefndar til margra ára. Enn í dag, kominn á níræðisaldur, er hann enn virkur í ýmsum störfum innan FRÍ og frjálsíþróttahreyfingarinnar. Starf hans hefur verið heiðrað með öllum helstu viðurkenningum íþróttahreyfingarinnar: heiðurskrossi ÍSÍ (2010), gullmerki UMFÍ (2001), heiðurskrossi FRÍ (1999), silfurmerki UMSK (2004) og gullmerki UMSK (2011). Hann hefur hlotið sérstaka viðurkenningu Kópavogsbæjar (2009), var Eldhugi Kópavogs (2012) og árið 2015 varð hann fyrsti Íslendingurinn til að hljóta European Athletics Member Federation verðlaunin. Forseti Íslands hefur jafnframt sæmt hann riddarakrossi hinnar íslensku fálkaorðu.
Abban er veitt framúrskarandi framlagi til upplyftingar og útbreiðslu frjálsíþrótta og er veitt til að heiðra minningu Aðalbjargar Hafsteinsdóttur, varaformanns FRÍ, sem lést fyrir aldur fram árið 2023
Aðrar heiðranir
Kvennasveitin í long trail á HM í utanvegahlaupum í haust
Í ár voru þrjár íþróttakonur sérstaklega heiðraðar en það voru þær Andrea Kolbeinsdóttir, Elísa Kristinsdóttir og Guðfinna Kristín Björnsdóttir sem mynduðukvennaliðið í Long trail sem lenti í 5. sæti í sveitakeppninni á sterkasta HM í utanvegahlaupum hingað til, sem fram fór í Canfranc á Spáni í lok september. Ótrúlega vel gert hjá mjög sterkri sveit og unnu þær m.a. spænska liðið sem var á heimavelli, það sænska líka sem var firnasterkt og fleiri sterkar þjóðir eins og Sviss, Þýskaland og Kanada. 5. sæti á heimsmeistaramóti er frábær árangur.
Fyrsta kvennalandsliðið í frjálsíþróttum
Það er annar hópur kvenna sem við heiðruðum í kvöld, en í sumar voru liðin 60 ár frá því að íslenskar konur kepptu í fyrsta sinn í landskeppni í frjálsíþróttum, þegar þær tóku þátt í landskeppni Íslands og Skotlands þann 21. ágúst 1965 í Edinborg. Keppnin fór fram í tengslum við Hálandaleikana og markaði tímamót í sögu íslenskra frjálsíþrótta. Í íslenska kvennaliðinu kepptu þær Lilja Sigurðardóttir, Björk Ingimundardóttir, Halldóra Helgadóttir og Linda Ríkarðsdóttir. Þær voru brautryðjendur í orðsins fyllstu merkingu og stigu fyrstu skrefin fyrir hönd Íslands á alþjóðavettvangi á tímum þar sem tækifæri kvenna í íþróttum voru mun takmarkaðri en í dag. Sextíu árum síðar sjáum við skýrt hvernig þessi vegferð hefur borið ávöxt. Í dag eigum við íslenskar frjálsíþróttakonur í fremstu röð, konur sem hafa sýnt framúrskarandi árangur á stórmótum og eru sterkar fyrirmyndir fyrir ungar íþróttakonur. Eins og við sáum í kvöld, og sjáum hér að ofan, eigum við ótrúlega margar frábærar íþróttakonur í dag. Það er því bæði viðeigandi og mikilvægt að minnast brautryðjendanna frá 1965 um leið og við fögnum þeirri sterku stöðu sem íslenskar konur í frjálsíþróttum hafa í dag og horfum með bjartsýni til framtíðar.
Viðurkenningar frá Evrópska frjálsíþróttasambandinu
Unnar Vilhjálmsson hlýtur þjálfaraverðlaun European Athletics fyrir margra áratuga framlag til frjálsíþrótta á Íslandi. Unnar þarf ekki frekar en hin tvö að kynna fyrir hópnum. Framúrskarandi kraftmikill leiðtogi sem hefur náð að stórefla starf hvar sem hann hefur komið! Yfirburðar hvetjandi barna- og unglingaþjálfari sem hvert samfélag dreymir um að eiga. Óþreytandi að takast á við stórar áskoranir og skila þannig frá sér að stundum er spurt, hvernig var þetta hægt.
Ragnheiður Ólafsdóttir hlýtur viðurkenningu European Athletics fyrir ómetanlegt framlag til frjálsíþrótta. Ragnheiður hefur sýnt og sannað að hún er sannur leiðtogi. Ragnheiður er nú þegar heiðursfélagi FRÍ og það ekki af ósekju. Hún hefur verið í fararbroddi við uppbyggingarstarf sitt innan frjálsíþróttadeildar FH í áratugi og komið ótal öflugu íþróttafólki til mikilla afreka, innan vallar sem utan. Öguð, hvetjandi, metnaðarfull. Dugnaðarforkur sem hreyfingin á mikið að þakka.
Þráinn Hafsteinsson hlýtur einnig viðurkenningu European Athletics fyrir áralangt starf innan frjálsíþróttahreyfingarinnar. Þráinn er alinn upp í sunnlenskri ungmennafélagshreyfingu og það var gott uppeldi. Eins og við vitum hefur hann á sínum langa ferli sýnt að hann sjálfur er einn af landsins fremstu uppalendum landsins. Óteljandi frjálsíþróttamenn hefur hann eflt og uppfrætt, en sömuleiðis kynnt íþróttina fyrir ótal íþróttakennaranemum á sínum ferli.
Myndir frá uppskeruhátíðinni munu birtast inn á Flickr síðu FRÍ.