Í dag fór seinni dagur Meistaramóts Íslands fram í Laugardalshöllinni og ekki var hann síðri en sá fyrri.
Í dag var keppt til úrslita í 13 greinum, auk tveggja boðhlaupa, og náðist frábær árangur í mörgum þeirra.
Sett var eitt Íslandsmet, eitt aldursflokkamet, tvö mótsmet og 34 persónulegar bætingar.
Eir Chang Hlésdóttir (ÍR) sigraði 200 m hlaup kvenna á hvorki meira né minna en nýju og glæsilegu Íslandsmeti, en hún hljóp á 23,69 sek og bætti eldra Íslandsmet Silju Úlfarsdóttur frá 2004 um 10 sekúndubrot. Þessi tími er einnig mótsmet. Glæsilegur árangur hjá henni Eir! Önnur, á góðu persónulegu meti var María Helga Högnadóttir (FH) á tímanum 25,13 sek, en hennar besti tími var 25,41 sek frá því á MÍ 15-22 ára um síðustu helgi og Ísold Sævarsdóttir (FH) var þriðja á tímanum 25,21 sek.
Það var Arnar Logi Brynjarsson (ÍR) sem sigraði 200 m hlaup karla en hann hljóp á tímanum 22,18 sek, sem er persónuleg bætin innanhúss en hans besti tími var 22,29 sek frá því í mars í fyrra. Annar var Sæmundur Ólafsson (ÍR) á tímanum 22,40 sek. og Aron Ingi Sævarsson (FH) var þriðji á persónulegu meti en hann hljóp á tímanum 22,52 sek, sem er bæting um 30 sekúndubrot en hann átti best 22,82 sek frá því í desember sl.
Í þrístökki karla var það Guðjón Dunbar Þorsteinsson (Fjölnir) sem sigraði með stökki upp á 14,17 m. Í öðru sæti var Egill Anton Waagfjörð (Katla) en hann stökk 12,66 m.
Í stangarstökki kvenna sigraði Katrín Tinna Pétursdóttir (Fjölnir) en hún stökk 2,83 m, sem er persónuleg bæting um 3 cm. Í öðru sæti var Sara Þórdís Sigurbjörnsdóttir (Fjölnir) sem einnig stökk 2,83 m og í þriðja sæti lenti Sara Kristín Lýðsdóttir (FH) sem stökk 2,73 m.
Guðjón Dunbar Þorsteinsson sigraði hástökk karla með flotta persónulega bætingu, en hann stökk 1,98 m og átti hann virkilega góðar tilrauni á 2 metrana, frábært hástökk hjá Guðjóni. Ægir Örn Kristjánsson (Breiðablik) var annar en hann stökk 1,95 og þriðji var Þorleifur Einar Leifsson (Breiðablik) sem stökk 1,92 m.
Irma Gunnarsdóttir (FH) sigraði þrístökk kvenna og var aðeins 5 cm frá Íslandsmeti sínu en sigurstökk hennar í dag var 13,31 cm, en stökksería Irmu var ansi jöfn í dag og voru öll stökkin hennar yfir 13 metra. Önnur var Sara Kristín Lýðsdóttir (FH) en hún stökk 11,68 m og þriðja var Anna Metta Óskarsdóttir (HSK/SELFOSS) með stökk upp á 11,33 m.
Það var Helga Lilja Maack (ÍR) sem sigraði 800 m hlaup kvenna á nýju persónulegu meti en hún hljóp á tímanum 2:17,42 mín, en hennar fyrra met var 2:17,89 frá því í janúar í fyrra. Önnur var Guðný Lára Bjarnadóttir (Fjölnir) á tímanum 2:19,23 mín. og Eyrún Svala Gustavsdóttir (Breiðablik) var þriðja á tímanum 2:52,55 mín.
Það var Daði Arnarson (Fjölnir) sem sigraði 800 m hlaup karla en hann hljóp á tímanum 1:56,33 mín. Annar var Fjölnir Brynjarsson (FH) á tímanum 1:56,91 mín. og Leó Örn Þórarinsson (UMFÁ) var þriðji á tímanum 1:58,90 mín.
Í kúluvarpi kvenna var það Erna Sóley Gunnarsdóttir (ÍR) sem sigraði, á nýju mótsmeti, með kasti upp á 17,41 m, en Erna áttu mjög jafna kastseríu og voru öll köstin hennar í dag yfir 17 metrana. Í öðru sæti var Hekla Magnúsdóttir (ÍR) en hún kastaði 12,81 m og Katharina Ósk Emilsdóttir (ÍR) var í því þriðja með kast upp á 12,32 m.
Það var Ísold Sævarsdóttir (FH) sem sigraði 60 m grindahlaup kvenna og hljóp hún á 8,77 sek. Önnur var María Helga Högnadóttir (FH) á tímanum 8,79 sek. og María Rún Gunnlaugsdóttir (ÍR) var þriðja á tímanum 8,94 sek.
Það vantaði ekki persónulegu metin í 60 m grindahlaupi karla en fyrstu þrír bættu allir sinn persónulega árangur. Þorleifur Einar Leifsson (Breiðablik) sigraði 60 m grindahlaup karla og hljóp hann á 8,08 sek, en hann átti best 8,25 sek frá því í janúar sl. Annar var Ísak Óli Traustason (UMSS) á tímanum 8,18 sek., en hans besti árangur var 8,25 frá því í febrúar í fyrra og Ívar Kristinn Jasonarson (ÍR) var þriðji á tímanum 8,52 sek, en hans besti tími var 8,53 frá því í janúar sl.
Það var Íris Dóra Snorradóttir (FH) sem sigraði 3000 m hlaup kvenna en hún hljóp á tímanum 10:10,66 mín. Önnur var Sigþóra Brynja Kristjánsdóttir (UFA) á tímanum 10:19,48 mín. og Elín Edda Sigurðardóttir (ÍR) var þriðja á tímanum 10:24,38 mín.
Það var Arnar Pétursson (Breiðablik) sem sigraði 3000 m hlaup karla en hann hljóp á tímanum 8:46,47mín. Annar, með persónulega bætingu, var Stefán Kári Smárason (FH) á tímanum 8:54,35 mín, en hann átti best 8:55,89 frá því í janúar sl. og þriðj, með persónulega bætingu og aldursflokkamet í flokki 16-17 ára, var Sindri Karl Sigurjónsson (UMSB) á tímanum 9:07,99 mín en fyrra met hans var 9:10,74 frá því á MÍ 15-22 ára um síðustu helgi.
í 4×400 m boðhlaupi kvenna var það sveit ÍR sem sigraði á tímanum 3:37,09 mín. Sveit Fjölnis var í öðru sæti á tímanum 4:09,46 mín og sveit FH var í því þriðja á tímanum 4:19,89 mín.
í 4×400 m boðhlaupi karla var það einng sveit ÍR sem sigraði á tímanum 3:20,79 mín. Sveit Fjölnis var í öðru sæti á tímanum 3:26,28 mín og sveit FH var í því þriðja á tímanum 3:27,33 mín.
Heildarstigakeppni félagsliða var hörkuspennandi og réðust úrslitin ekki fyrr en í síðustu grein dagins. En að lokum voru það ÍR-ingar sem stóðu upp sem sigurvegarar með 49 stig. FH varð í öðru sæti með 46 stig og Fjölnir í því þriðja með 31 stig.
Í kvennaflokki var það lið FH sem sigraði stigakeppnina með 34 stig, lið ÍR var í öðru sæti með 27 stig og lið Fjölnis með 13 stig.
Í karlaflokki var það lið ÍR sem sigraði með 22 stig, lið Fjölnis var í öðru sæti með 18 stig og lið Breiðablik var í því þriðja með 13 stig
Stigahæsta afrek mótsins átti Eir Chang Hlésdóttir (ÍR) og var það fyrir hennar frábæra 200 m hlaup þar sem hún bætti 21 árs gamalt Íslandsmet í greininni þegar hún hljóp á 23,69 sek, fyrir þennan árangur hlaut hún 1112 stig.
Stigahæsta afrek karlamegin átti Þorleifur Einar Leifsson (Breiðablik) en hann hlaut 1015 stig fyrir 60 m grindahlaupið sitt sem hann hljóp á 8,08 sek.
Frábært Meistaramót Íslands í frjálsíþróttum að baki og óskum við öllu þessu flotta íþróttafólki til hamingju með árangurinn sinn.
Heildarúrslit mótsins má sjá hér.
Myndir frá mótinu má sjá á Flickr síðu FRÍ.