Annar frábær dagur á frjálsíþróttavellinum í Maribor hjá íslenska frjálsíþróttafólkinu og sigur í 3. deildinni er í höfn, sem þýðir að Ísland keppir í 2. deild eftir tvö ár. Sigur Íslands var aldrei í hættu og leiddu þau stigakeppnina strax frá fyrstu grein, þetta var bara spurning um með hve miklum mun íslenska liðið myndi vinna. Niðurstaðan var 461,5 stig, sem er rúmlega 50 stigum meira en hjá Lúxemborg sem urðu í öðru sæti með 410 stig og Bosnía Hersegóvína endaði í þriðja sæti með 383 stig eftir hörkuspennandi keppni við Moldóvíu sem sitja eftir með sárt ennið í fjórða sæti með 371 stig, sen Móldóvska sveitin var dæmd ógild í 4×400 m blönduðu boðhlaupi og varð þar af mjög mikilvægum stigum. En svona er Evrópubikar, spenna fram yfir síðustu grein.
Í dag urðu íslensku keppendurnir í fyrstu þremur sætunum í 11 greinum af þeim 17 sem keppt var í í dag, tvær persónulegar bætingar litu dagsins ljós sem og þrjú Íslandsmet. Þvílíkur dagur!
Eins og í gær voru það sleggjukastararnir sem settu tóninn fyrir daginn og Guðrún Karítas Hallgrímsdóttir endaði þar í 2. sæti. Það tók Guðrúnu Karítas nokkur köst að koma sér í gírinn en í fjórðu umferð kastaði hún 66,04 m sem var hennar lengsta kast í dag.
Einn af hápunktum dagsins hjá okkar fólki var þrístökk kvenna þar sem Irma Gunnarsdóttir gerði sér lítið fyrir og bætti eigið Íslandsmet um 11 cm þegar hún stökk 13,72 m í fimmtu umferð og lenti í 2. sæti. Frábærlega vel gert hjá Irmu og óskum við henni innilega til hamingju með nýtt Íslandsmet. Eldra Íslandsmet hennar var frá síðastliðnu sumri, 13,61 m. Þess má geta að Irma átti mjög flott og jafna stökkseríu, sem er alltaf gott.
Erna Sóley Gunnarsdóttir sigraði kúluvarp kvenna með kasti upp á 16,05 m. Kastlengdarlega séð var þetta ekki besti dagurinn hennar Ernu Sóleyjar en örugg 15 stig í höfn fyrir íslenska liðið.
Þorleifur Einar Leifsson lenti í því leiðindaatviki í 110 m grindahlaupi karla að detta um grind. Hann stóð samt upp aftur og kláraði hlaupið en var á endanum dæmdur úr leik þar sem hann fór ekki yfir síðustu grindina.
Í kringlukasti karla bætti Mímir Sigurðsson sinn ársbesta árangur um tæpa 3 metra þegar hann kastaði kringlunni 55,78 m og endaði í 3. sæti.
Júlía Kristín Jóhannesdóttir hljóp öruggt og flott 100 m grindahlaup og kom í mark á 13,75 sek og varð í 2. sæti.
Í 1500 m hlaupi kvenna kom Embla Margrét Hreimsdóttir sjötta í mark á 4:36,13 mín og er það annar besti tími hennar utanhúss.
Daði Arnarson varð áttundi í 800 m hlaupi karla en hann kom í mark á tímanum 1:55,08 mín.
Í stangarstökki karla endaði Gunnar Eyjólfsson í 4. sæti en hann stökk 4,35 m.
Annar hápunktur dagsins var 200 m hlaupið hjá Eir Chang Hlésdóttur. Hún sigraði hlaupið á nýju Íslandsmeti en hún kom í mark á 23,44 sek og bætti 6 ára gamalt Íslandsmet Guðbjargar Jónu Bjarnadóttur um 1 sekúndubrot. Frábær árangur hjá Eir og bætir hún þessu Íslandsmeti við Íslandsmet sitt í 200 m hlaupi innanhúss frá því í vetur. Eir er greinilega í svakalegu formi því hún var með virkilega góða persónulega bætingur í 100 m hlaupinu í gær.
Kristófer Þorgrímsson hljóp 200 m á 21,60 sek og endaði í 5.sæti.
Birta María Haraldsdóttir jafnaði sinn ársbesta árangur þegar hún stökk 1,81 m í hástökki kvenna og varð þar í 2. sæti.
Það er nóg að gera hjá Andreu Kolbeinsdóttur þessa dagana en hún keppti í 5000 m hlaupi í dag og kom önnur í mark á tímanum 16:53,93 mín.
Guðjón Dunbar D. Þorsteinsson stökk 13,87 m í þrístökki og endaði í 9. sæti.
Sindri Guðmundsson hafnaði í öðru sæti í spjótkasti karla en hans lengsta kast í dag var 74,54 m.
Í 3000 m hindrunarhlaupi karla kom Hlynur Andrésson annar í mark á tímanum 9:08,99 mín.
Íslenska boðhlaupssveitin í blönduðu 4×400 m boðhlaupi innsiglaði frábæran árangur íslenska liðsins með því að setja enn eitt Íslandsmet dagsins, en þau komu önnur í mark á 3:25,96 mín og bættu eldra met um rúmlega þrjár sekúndur en það var sett á Smáþjóðaleikunum í lok maí sl. Íslensku sveitina í dag skipuðu Ívar Kristinn Jasonarson, Guðbjörg Jóna Bjarnadóttir, Sæmundur Ólafsson og Ísold Sævarsdóttir.
Í ár gekk næstum allt upp hjá íslenska liðinu og það sannarlega skilaði þeim þessum frábæra árangri. Öruggur sigur í deildinni, fjögur Íslandsmet, fimm persónulegar bætingar og íslenska frjálsíþróttafólkið var meðal þriggja efstu í 26 greinum af þeim 37 sem keppt var í. Það var frábært að fylgjast með liðinu keppa, liði sem samanstendur af reynsluboltum og nýliðum, liði þar sem augljóst er að samstaðan og stemmingin er mikil og liði sem lagði allt sitt í keppnina og sýndi hvað í því býr.
Til hamingju með árangurinn frábæra íþróttafólk, þjálfarar og annað fylgdarlið, við erum mjög stolt af ykkur.
Heildarúrslit mótsins má sjá hér.
Horfa má á streymið af mótinu hér.