Þá er heimsmeistaramótinu í eldri aldursflokkum lokið, en það fór fram í Flórída í Bandaríkjunum dagana 23.-30. mars.
Þar áttum við Íslendingar að sjálfsögðu flotta fulltrúa, þau Hafstein Óskarsson sem keppir í flokki 65-69 ára og Fríðu Rún Þórðardóttur sem keppir í flokki 55-59 ára, og stóðu þau sig heldur betur með prýði og komu heim hlaðin verðlaunum.
Fríða hóf keppni strax á fyrsta keppnisdegi, 23. mars, þegar hún tók þátt í 8 km víðavangshlaupi og hún gerði sér lítið fyrir og sigraði sinn flokk nokkuð örugglega þegar hún kom í mark á tímanum 33:51,45 mín og endaði í 15. sæti í heildina af 80 keppendum. Frábært hjá henni Fríðu og fyrstu verðlaunin strax komin í hús.
Sama dag, 23. mars, hlupu þau Fríða Rún og Hafsteinn bæði í undanrásum 800 m hlaupsins og hlupu sig bæði inn í úrslitin. Hafsteinn var með besta tímann inn í úrslitin og Fríða Rún sjöunda besta tímann.
Úrslitahlaupin í 800 m voru svo á mánudeginum, 24. mars. Þar endaði Hafsteinn í öðru sæti í sínum flokki á tímanum 2:22,70 mín, og var aðeins 25 sekúndubrotum frá aldursflokkameti sínu í greininni. Þetta er besti árangur sem Hafsteini á HM, frábært hjá honum. Fríða færði sig aðeins upp listann í úrslitahlaupinu og endaði í 5. sæti á tímanum 2:42,01 mín.
Næst var komið að 3000 m hlaupi hjá henni Fríðu Rún en það var miðvikudaginn 26. mars. Þar endaði Fríða í 2. sæti á flottum tíma, 11:10,40 mín mín og hlaut þar með sín önnur verðlaun á mótinu.
Á laugardeginum, 29. mars, var komið að síðustu greinum Fríðu og Hafsteins. Fríða keppti þá í 1500 m hlaupi og þar voru ekki undanriðlar heldur bein úrslit og þar gerði Fríða sér lítið fyrir og sló Norðurlandamet í sínum flokki þegar hún kom þriðja í mark á tímanum 5:13,31 mín. og nældi sér þar með í sín þriðju verðlaun á mótinu. Fyrra aldursflokkamet Fríðu var 5:16,20 mín frá því í febrúar sl. Frábær árangur hjá Fríðu Rún.
Hafsteinn hljóp í undanriðlum 400 m hlaupsins á laugardeginum og hljóp þar nokkuð nálægt sínu aldursflokkameti (61,66 sek frá því í janúar sl.) þegar hann kom í mark á 61,92 sek, og vantaði aðeins 0,6 sekúndur að hann kæmist í úrslit.
Virkilega góður árangur hjá þeim Hafsteini og Fríðu á HM í eldri aldursflokkum og koma þau heim með fern verðlaun og eitt Norðurlandamet í vasanum, ekki er það nú amalegt.
Óskum við þeim innilega til hamingju með árangurinn og það er búið að vera gaman að fylgjast með þessum verðugu og flottu fulltrúum okkar í masters frjálsum.
Heildarúrslit mótsins er hægt að sjá hér.