Elísabet Rut Rúnarsdóttir varð í nótt NCAA-meistari í sleggjukasti á bandaríska háskólameistaramótinu í frjálsum íþróttum sem fram fer á Hayward Field í Eugene í Oregon.
Elísabet, sem keppir fyrir Texas State Bobcats, kastaði lengst 73,19 metra og tryggði sér sigurinn með nýju persónulegu meti. Þetta er annar NCAA-meistaratitill Elísabetar á ferlinum, en hún varð einnig meistari í sleggjukasti árið 2024.
Keppnin var æsispennandi frá upphafi til enda. Elísabet náði sigurkastinu í þriðju umferð og vann með aðeins fjögurra sentímetra mun, en Anthonett Nabwe frá Minnesota varð önnur með 73,15 metra.
Kastsería Elísabetar var afar sterk: 69,80 m, 70,26 m, 73,19 m, 69,74 m, ógilt kast og 70,34 m. Hún átti því þrjú köst yfir 70 metra í úrslitunum.
Árangurinn er 30 sentímetra bæting á hennar fyrra persónulega meti og færir hana enn nær Íslandsmetinu í greininni. Elísabet hefur unnið sér inn farseðil á EM í Birmingham í ágúst, en hún og Guðrún Karítas munu keppa um sæti í úrslitum þar.
Hér má sjá video of kastinu hennar Elísabetar
Arndís í 8 sæti og Júlía hleypur grindina vel
Arndís Óskarsdóttir keppti einnig til úrslita á mótinu og náði frábærum árangri í spjótkasti. Arndís, sem keppir fyrir FIU, kastaði 54,75 metra og hafnaði í 8. sæti. Kastið var hennar besti árangur á tímabilinu og tryggði henni sæti á meðal þeirra allra bestu í bandaríska háskólakerfinu.
Júlía Jóhannsdóttir, sem keppir fyrir Rice, var einnig á meðal keppenda á lokamóti NCAA. Hún keppti í 100 metra grindahlaupi og hljóp á 13,33 sekúndum í undanrásum. Júlía hafnaði í 23. sæti í greininni og komst ekki áfram í úrslit. Hún er einnig skráð til leiks í sjöþraut á mótinu.