Fjölbreytt frjálsíþróttavika að baki, innanvallar og utan, innanlands og erlendis.
FH-ingar bikarmeistarar utanhúss 2025 og Ísold með aldursflokkamet og EM U20 lágmark í 400 m grindahlaupi
Bikarkeppni FRÍ fór fram í fallegu sumarveðri á Sauðárkróki núna um helgina, 5.-6. júlí. Ágætis árangur náðist á mótinu og þar ber helst að nefna árangur Ísoldar Sævarsdóttur í 400 m grindahlaupi. Ísold, sem er frábær fjölþrautarkona, hefur ekki oft keppt í 400 m grindahlaupi en gerði sér lítið fyrir og vann greinina á nýju aldursflokkameti í flokki 18-19 ára stúlkna þegar hún kom í mark á 59,76 sek. Þessi tími hennar er einnig vel undir lágmarkinu í 400 m grindahlaupi á EM U20 sem fram fer í Tampere í Finnlandi núna í ágúst, en um miðjan júní náði hún lágmarkinu í sjöþraut.
Sett voru fjögur mótsmet um helgina.
| Nafn | Grein | Árangur |
| Guðrún Karítas Hallgrímsdóttir (ÍR) | Sleggjukast | 65,84 m |
| Hera Christensen (FH) | Kringlukast | 53,12 m |
| Ísold Sævarsdóttir (FH) | 400 m grindahlaup | 59,76 sek |
| Sveit ÍR | 1000 m boðhlaup | 1:55,75 mín |
Það voru FH-inar sem stóðu uppi sem bikarmeistarar eftir keppni helgarinnar en þau hlutu samtals 164 stig, lið ÍR varð í öðru sæti með 159 stíg og lið Fjölnis/UMSS varð í þriðja sæti með 139 stig.
Sjá má nánar um úrslit bikarkeppninnar hér og hér.
ÍR-ingar bikarmeistarar 15 ára og yngri utanhúss 2025
Bikarkeppni 15 ára og yngri fór einnig fram á Sauðárkróki um helgina og þar urðu ÍR-ingar bikarmeistarar með 108,5 stig, lið FH varð í öðru sæti með 93 stig og lið Breiðabliks í því þriðja með 87 stig.
Sett voru fimm mótsmet í bikarkeppni 15 ára og yngri.
| Nafn | Grein | Árangur |
| Sigurður Orri Arason (ÍR) | 80 m hlaup | 9,74 sek |
| Sigurður Orri Arason (ÍR) | 300 m hlaup | 38,57 sek |
| Eyrún Svala Gustavsdóttir (Breiðablik) | 300 m hlaup | 42,29 sek |
| Anna Metta Óskarsdóttir (HSK/Selfoss) | Langstökk | 5,42 m |
| Elísabet Rós Ólafardóttir (HSÞ/UMSS) | 80 m hlaup | 10,95 sek |
Stefán Pálsson og Andrea Kolbeinsdóttir Íslandsmeistarar í 10 km götuhlaupi
Meistaramót Íslands í 10 km götuhlaupi fór fram samhliða Aukakrónuhlaupi Ármanns miðvikudaginn 2. júlí sl. Það voru þau Andrea Kolbeinsdóttir (ÍR) og Stefán Pálsson (Ármann) sem komu fyrst í mark og eru því Íslandsmeistarar í 10 km götuhlaupi árið 2025.
Arnar Pétursson og Rannveig Oddsdóttir Íslandsmeistarar í hálfu maraþoni
Meistaramót Íslands í hálfu maraþoni fór fram samhliða Akureyarhlaupi Mizuno og atNorth fimmtudaginn 3. júlí sl. Það voru þau Rannveig Oddsdóttir (UFA) og Arnar Pétursson (Breiðablik) sem komu fyrst í mark og eru því Íslandsmeistarar í hálfu maraþoni árið 2025.
Flottur árangur hjá íslensku frjálsíþróttafólki erlendis
Íslenskt frjálsíþróttafólk er duglegt að keppa á mótum víða um heim og í síðustu viku voru þau nokkur sem kepptu á mótum á Norðurlöndunum með fínum árangri.
Guðbjörg Jóna Bjarnadóttir keppti í 400 m hlaupi á Boysen Memorial í Osló í Noregi 2. júlí sl., og kom fyrst í mark á persónulegu meti þegar hún hljóp á 54,84 sek.
Hilmar Örn Jónsson keppti í sleggjukasti á Karlstad Grand Prix í Karlstad í Svíþjóð 3. júlí sl.og kastaði hann lengst 73,58 m og lenti í 1. sæti.
Daníel Ingi Egilsson keppti í langstökki á sama móti og endaði í fimmta sæti með stökk upp á 7,65 m.
Hvað er framundan?
12.–13. júlí – Sumarleikar HSÞ – Laugar