Seinni keppnisdagur Norðurlandameistaramótsins utanhúss fór fram í Kaupmannahöfn sunnudaginn 31. maí. Íslenski hópurinn átti sterkan lokadag þar sem Erna Sóley Gunnarsdóttir varð Norðurlandameistari í kúluvarpi og þrír íslenskir kastarar bættu við silfurverðlaunum. Aðstæður voru nokkuð betri en á fyrri keppnisdegi, þó vindurinn hafi áfram sett sinn svip á mótið. Í 100 m grindarhlaupi kvenna var hlaupinu meðal annars fært og snúið við til að forðast mótvind og nýta vindinn betur. Það skilaði sér í mjög sterkri keppni þar sem Martine Hjørnevik frá Noregi setti mótsmet á 12,79 sek, Ida Beiter Bomme setti danskt met á 12,81 sek og María Helga Högnadóttir bætti sig og hljóp frábært hlaup á 13,96 sek.
Erna Sóley Gunnarsdóttir stóð uppi sem sigurvegari í kúluvarpi kvenna með kast upp á 16,62 m. Erna sýndi mikinn styrk í keppninni og tryggði Íslandi gullverðlaun á seinni degi mótsins.
Í kringlukasti karla varð Guðni Valur Guðnason í 2. sæti með kast upp á 61,20 m. Guðni Valur átti góða keppni, en hann kom sér upp í annað sæti með sínu sjötta og síðasta kasti og bætti við silfurverðlaunum fyrir íslenska hópinn.
Sindri Hrafn Guðmundsson varð einnig í 2. sæti í spjótkasti karla með kast upp á 75,84 m. Sindri var í miklum ham í upphitun þar sem hann átti nokkur köst í kringum 80 metra og eitt kast sem var um 81 metri. Það sýndi vel að stórt kast liggur í loftinu hjá honum, þó lengsta gilda kastið í keppninni hafi endað í 75,84 m.
Í sleggjukasti kvenna varð Guðrún Karítas Hallgrímsdóttir í 2. sæti með kast upp á 72,92 m. Guðrún sýndi strax í upphitun að stór köst væru í kortunum, þar sem nokkur köst hennar voru í kringum Íslandsmet hennar. Í keppninni náði hún þó aðeins einu gildu kasti af sex tilraunum, en það dugði henni til silfurverðlauna.
Einn af hápunktum dagsins kom einnig í 100 m grindarhlaupi kvenna, þar sem María Helga Högnadóttir hljóp frábært hlaup og varð í 7. sæti á 13,96 sek. Með hlaupinu bætti hún sinn besta árangur og komst í fyrsta sinn undir 14 sekúndna múrinn.
Irma Gunnarsdóttir varð í 4. sæti í þrístökki kvenna með stökk upp á 13,13 m, aðeins einu sæti frá verðlaunapalli. Í 200 m hlaupi kvenna varð Eir Chang Hlésdóttir í 7. sæti á 23,91 sek, eftir að hafa einnig komist í úrslit í 100 m hlaupi á fyrri keppnisdegi.
Í 200 m hlaupi karla varð Kristófer Þorgrímsson í 12. sæti á 22,06 sek. Þorleifur Einar Leifsson keppti bæði í 110 m grindarhlaupi og langstökki. Hann varð 10. í 110 m grindarhlaupi á 14,69 sek og 13. í langstökki með stökk upp á 6,82 m.
Heilt yfir var seinni dagur Norðurlandameistaramótsins mjög góður hjá íslenska hópnum. Ísland fékk ein gullverðlaun, þrjú silfurverðlaun og nokkrar sterkar frammistöður til viðbótar, þar á meðal persónulegt met hjá Maríu Helgu og góða keppni hjá íslensku kastgreinakeppendunum.
Hægt er að finna myndir frá mótinu á Flickr síðu FRÍ
