Virkilega flott frjálsíþróttavika, bæði á Íslandi sem og út í heimi, bæði í vallarfrjálsum og götuhlaupum. Sumarið fer sannarlega vel af stað.
Norðurlandameistaramótið í fjölþrautum í Gautaborg
Ísland átti fjóra keppendur á Norðurlandameistaramótinu sem fram fór í Gautaborg í Svíþjóð um helgina, 14.-15. júní. Það voru þau Hjálmar Vilhelm Rúnarsson sem keppti í tugþraut U18, Ísold Sævarsdóttir sem keppti í sjöþraut í U20, María Helga Högnadóttir sem keppti í sjöþraut kvenna og Júlía Kristín Jóhannesdóttir sem einnig keppti í sjöþraut kvenna.
Þau stóðu sig með stakri prýði á mótinu og voru öll með persónulegar bætingar í stökum greinum og eins flest einnig með bætingu í þrautinni sjálfri. Bestum árangri Íslendinganna á mótinu náði Ísold en hún endaði í 2. sæti í sjöþraut U18 með 5490 stig og náði þar með einnig lágmarki inn á EM U20 sem fram fer í Tampere í Finnlandi dagana 7.-10. ágúst nk.
Ítarlegri fréttir um mótið má sjá hér og hér.
Flottur árangur hjá íslenkum frjálsíþróttakonum á NCAA
Þrjár íslenskar frjálsíþróttakonur kepptu í lokakeppni NCAA sem fram fór í Eugene í Oregon í Bandaríkjunum dagana 11.-14. júní, en NCAA er meðal stærstu og virtustu háskólaíþróttakeppna í heiminum.
Arndís Diljá Óskarsdóttir keppti í spjótkasti en hún er búin að vera á svaka siglingu undanfarið og kastaði 54,99 m í undankepppni mótsins um daginn og var það bæting um hvorki meira né minna en þrjá metra. Í lokakeppninni, sem var á fimmtudaginn, kastaði Arndís 49,96 m og endaði í 19. sæti. Frábært hjá Arndísi og verður gaman að sjá hvað hún gerir í sumar. Arndís er ein þeirra sem náð hafa lágmarki á EM U23 sem fram fer í Bergen dagana 17.-20 júlí.
Eva María Baldursdóttir átti frábært mót þegar lokakeppnin í hástökki fór fram á laugardaginn en hún stökk þar 1,84 m og endaði í 12. sæti, en þetta er bæting um 2 cm hjá henni Evu Maríu. En hún átti best 1,82 m frá því í undankeppni NCAA í lok maí. Frábær árangur hjá Evu Maríu og verður gaman að fylgjast með henni á næstunni. Eva María er einnig á leiðinni til Bergen í júlí á EM U23.
Guðrún Karítas Hallgrímsdóttir var meðal keppenda í lokakeppninni í sleggjukasti sem fram fór á fimmtudaginn. Þar endaði hún í 6. sæti en hún kastaði 68,66 m.
Heildarúrslit mótsins má sjá hér.
Irma sigraði mót í Slóveníu
Irma Gunnarsdóttir tók þátt í móti í Slóveníu 11. júní sl. og keppti þar í þrístökki og gerði sér lítið fyrir og sigraði með stökki upp á 13,24 m, en það er hennar fjórði besti árangur í þrístökki utanhúss. Spennandi að sjá hvað Irma gerir í þrístökkinu í sumar.
Aníta sigraði mót í Noregi
Aníta Hinriksdóttir tók þátt í 800 m hlaupi á Bislett Games pre-programme í Osló í Noregi 12. júní sl. og sigraði hún hlaupið þegar hún kom í mark á tímanum 2:03,73 mín. Vel gert hjá henni Anítu sem ennþá sýnir hvað í henni býr í 800 m hlaupinu.
Frábær árangur í Hafnarfjarðarhlaupinu
Hafnarfjarðarhlaupið fór fram sl. fimmtudag, 12. júní, en um er að ræða FRÍ vottað götuhlaup þar sem boðið var upp á 5 km og 10 km hlaup á marflatri braut sem tilvalin er til bætinga. Hlauparar létu ekki segja sér það tvisvar og náðist mjög góður árangur í hlaupinu. Þar ber helst að nefna nýtt aldursflokkamet í flokki 16-17 ára pilta í 5 km hlaupi sem Sindri Karl Sigurjónsson (2009) bætti þegar hann kom fyrstur í mark á 15:39 mín og stórbætti þá eldra met, en það var 16:05 mín frá því 2012 og var í eigu Sæmundar Ólafssonar. Annar í 5 km hlaupinu var Davíð Freyr Magnússon (2008) á tímanum 15:44, sem einnig var undir fyrra aldursflokkameti. Virkilega vel gert hjá þessum ungu hlaupurum.
Heildarúrslit hlaupsins má sjá hér.
ÍR-ingar Íslandsmeistarar félagsliða 11-14 ára
Meistaramót Íslands 11-14 ára fór fram um helgina og þar stóðu ÍR-ingar uppi sem sigurvegarar í stigakeppni félagsliða en þau hlutu 915 stig, í öðru sæti voru FH-ingar sem hlutu 643,5 stig og Ármenningar urðu í þriðja sæti með 508,5 stig. Fjöldi persónulegra bætinga var á mótinu og voru sett átta mótsmet. Sjá nánar hér.
Hvað er framundan?
Miðnæturhlaup Suzuki fer fram fimmtudginn 19. júní. Það er vottað FRÍ hlaup þar sem boðið er upp á 5 km, 10 km og 21,1 km hlaup.
Meistaramót Íslands 15-22 ára fer fram um næstu helgi, 20.-22. júní, á ÍR vellinum.