Langur og góður dagur í dag hjá íslenska frjálsíþróttafólkinu sem tekur þátt í Norðurlandameistaramótinu í fjölþrautum á Slottsskogsvallen í Gautaborg í Svíþjóð.
Hjálmar Vilhelm Rúnarsson keppir í tugþraut U18 og er hann í 4. sæti eftir fyrri daginn með 3526 stig. Hjálmar átti flottan dag í dag og gerði sér m.a. lítið fyrir og var með lengsta kastið í kúluvarpinu þar sem hann kastaði 15,17 m og varð annar í hástökkinu með 1,92 m sem er virkilega góð bæting hjá honum í hástökki utanhúss, en hann átti best 1,81 m. Heildarúrslitin hans Hjálmars eftir fyrri daginn má sjá hér.
Ísold Sævarsdóttir keppir í sjöþraut U20 og er hún í 2. sæti eftir fyrri daginn með 3157 stig. Dagurinn hennar Ísoldar var bara nokkuð góður og stökk hún m.a. 1,61 m í hástökkinu og var það annar besti árangurinn og svo var hún með flotta bætingu í 200 m hlaupinu þegar hún kom í mark á 24,93 sek, og fór þar með í fyrsta sinn undir 25 sekúndurnar, en hennar fyrri besti árangur utanhúss var 25,31 sek. Heildarúrslitin hennar Ísoldar eftir fyrri daginn má sjá hér.
María Helga Högnadóttir keppir í sjöþraut kvenna og er hún í 8. sæti eftir fyrri daginn með 3264 stig. Hún byrjaði daginn með stæl og bætti sig í 100 m grindahlaupi um 26 sekúndubrot þegar hún kom í mark á 14,19 sek. Þessi bæting setti tóninn hjá henni því hún var með smá (utanhúss)bætingar í öllum greinum dagsins. Heildarúrslitin hennar Maríu Helgu má sjá hér.
Júlía Kristín Jóhannesdóttir keppir einnig í sjöþraut kvenna og er hún í 9. sæti eftir fyrri daginn með 3238 stig. Hún byrjaði daginn af krafti þegar hún kom fyrst í mark í 100 m grindahlaupinu á 13,73 sek. Svo var hún með persónulega bætingu í 200 m hlaupinu en hún kom í mark á 25,29 sek, en hennar fyrri besti árangur var 25,42 sek. Heildarúrslit Júlíu Kristínar má sjá hér.
Frábært að fylgjast með þeim í dag og verður gaman að sjá hvernig morgundagurinn verður.
Startlista og úrslit mótsins má sjá hér.