Sumarið er handan við hornið og því ekki úr vegi að renna létt yfir hvaða frjálsíþróttaviðburðir eru á dagskrá næstu mánuðina, fram á haustið. Sumarið er allajafna mikilvægur tími í frjálsíþróttum, hvort sem um er að ræða vallarfrjálsar eða hlaup af ýmsum toga.
Stiklum af stóru yfir hvað er framundan í sumar. Þetta er alls ekki tæmandi listi yfir mót og hlaup sumarsins. Nánari frétt verður svo gerð um hvern og einn viðburð þegar nær honum dregur.
Mótaskrá FRÍ er að finna hér.
Lista yfir vottuð FRÍ hlaup er að finna hér.
Apríl
Evrópumeistaramótið í götuhlaupum fer fram dagana 12.-13. apríl í Brussel og Leuven í Belgíu.
Meistaramót Íslands í 5 km hlaupi fer fram samhliða Víðavangshlaupi ÍR sem fram fer á sumardaginn fyrsta, fimmtudaginn 24. apríl.
Maí
Vormót HSK fer fram miðvikudaginn 14. maí á Selfossvelli, en um er að ræða Global Calendar mót.
Í lok maí er svo komið að Smáþjóðaleikunum, en í ár fara þeir fram í Andorra dagana 26.-30. maí.
Júní
Fimmtudaginn 5. júní fer Vormót ÍR fram á ÍR-vellinum, en um er að ræða Global Calendar mót.
Um miðjan júní, helgina 13.-15. júní er svo komið að fyrsta meistaramóti sumarsins þegar Meistaramót Íslands 11-14 ára fer fram á ÍR-vellinum.
Helgina 14.-15. júní fer Norðurlandameistaramótið í fjölþrautum fram í Gautaborg í Svíþjóð.
Helgina 20.-22. júní er komið að Meistaramóti Íslands 15-22 ára sem fram fer á ÍR-vellinum.
Dagana 24.-25. júní fer Evrópubikar fram í Maribor í Sloveníu, en Ísland keppir í 3. deild með 14 öðrum löndum.
Júlí
Fyrstu helgina í júlí, 5.-6. júlí er komið að Bikarkeppnum FRÍ sem í ár fara fram á Sauðárkróki.
Evrópumeistaramót U23 fer fram dagana 17.-20. júlí í Bergen í Noregi.
Dagana 20.-26. júlí fer Ólympíuhátíð Evrópuæskunnar fram í Skopje í Norður Makedóníu.
Síðustu helgina í júlí, 26.-27. júlí, fer Norðurlandameistaramót U20 fram í Uppsala í Svíþjóð.
Ágúst
Um verslunarmannahelgina, 1.-3. ágúst, er komið að Unglingalandsmóti UMFÍ sem í ár fer fram á Egilsstöðum.
Evrópumeistaramót U20 fer fram í Tampere í Finnlandi dagana 7.-10. ágúst.
Um miðjan ágúst, 16.-17. ágúst er svo komið að meistaramótsþrennu á ÍR-vellinum þegar Meistaramót Íslands í fjölþrautum, eldri aldursflokkum og 10.000 m hlaupi fara þar fram.
Meistaramót Íslands fer svo fram helgina 22.-24. ágúst á Selfossvelli.
September
Dagana 13.-21. september fer heimsmeistaramótið utanhúss fram í Tókýó í Japan.
Í lok september, 25.-28. september, fer heimsmeistaramótið í utanvegahlaupum fram í Canfranc á Spáni.
Október
Evrópumeistaramótið í eldri aldursflokkum utanhúss fer fram í Madeira í Portúgal dagana 8.-19. október.