Núna þegar marsmánuður er að renna sitt skeið og sumardagurinn fyrsti handan við hornið er ekki úr vegi að fara að taka fram hlaupagallann og pússa hlaupaskóna og gíra sig fyrir frábært hlaupasumar.
Hlaup eru holl og góð hreyfing og tiltölulega einföld og ódýr, í þeim skilningi að það þarf ekki mikið meira en góða skó og vilja. Æfingar geta farið fram nánast hvar sem er hvort sem það er á malbiki, malarstígum, túnum eða utan alfaraleiða.
Ennþá skemmtilegra getur verið að hlaupa saman í góðum félagsskap og eru starfandi hlaupa-og skokkhópar út um allt land og eru margir þeirra innan aðildafélaga FRÍ.
Nánari upplýsingar um hlaupaæfingar-og áætlanir sem og upplýsingar um ýmsa hlaupa-og skokkhópa má sjá hér.
Stór og mikilvægur partur hjá mörgum hlaupurum er að taka þátt í skipulögðum almenningshlaupum og þar er sko af nægu að taka, hvort sem um er að ræða götuhlaup, utanvegahlaup eða fjallahlaup, öll ættu að geta fundið sér keppnishlaup við hæfi.
Undanfarin ár hefur Frjálsíþróttasamband Íslands unnið að því að bæta umgjörð götuhlaupa með því að votta hlaup og þannig geta hlauparar verið vissir um að hlaupið sem þeir taka þátt í uppfylli ákveðnar kröfur og að úrslit þeirra séu viðurkennd og skráð, þannig að ekki sé verið að bera saman epli og appelsínur.
Vottunarferli götuhlaupa hefur gengið vel undanfarin ár og hefur vottuðum hlaupum fjölgað ár frá ári og er vonast til að sú fjölgun haldi áfram í ár. Hér má sjá lista yfir vottuð hlaup undanfarinna ára sem og hlaup sem eru komin í vottunarferli fyrir árið 2025.
Hvetjum alla hlaupara til að kynna sér lista yfir þau vottuðu hlaup sem eru í boði og taka þátt í þeim sem flestum.
Svo hefur litið ljós virkilega góð síða, hlaupadagskra.is, þar sem er er að finna yfirlit yfir nánast öll hlaup á Íslandi hvort sem um er að ræða vottuð götuhlaup, skemmtiskokk, önnur götuhlaup, utangvegahlaup, fjallahlaup o.s.fr.v. og hvetjum við hlaupara einnig til að skoða þá síðu vel til að skipuleggja hlaupasumarið sitt vel.
Óskum öllum gleðilegs og skemmtilegs hlaupasumars.