Frjálsíþróttahluti Reykjavíkurleikanna fer fram núna á laugardaginn, 24. janúar, í Laugardalshöllinni. Mótið hefst klukkan 12:50 og verður því einnig sjónvarpað á RÚV og hefst útsending klukkan 13:00.
Hægt er að kaupa miða á mótið á corsa.is og kostar miðinn 1500 kr, ekki verður hægt að kaupa miða á staðnum.
Okkar fremsta frjálsíþróttafólk verður meðal keppenda ásamt öflugum erlendum keppendum frá Englandi. Lista yfir keppendur í hverri grein má sjá á Road to RIG.
Hápunkturinn á síðasta RIG var án efa 1500 m hlaup karla þar sem Baldvin Þór Magnússon (UFA) gerði sér lítið fyrir og bætti eigið Íslandsmet í greininni þegar hann sigraði hlaupið á tímanum 3:39,67 mín. Baldvin Þór verður að sjálfsögðu meðal keppenda í 1500 m hlaupinu á laugardaginn og verður virkilega gaman að fylgjast með honum enda er hann í hörkuformi sem hann sýndi svo sannarlega fyrir tæpum tveimur vikum þegar hann bætti eigið Íslandsmet í 10 km götuhlaupi um tæpa mínútu. Það stefnir í alveg svakalega spennandi 1500 m hlaup hjá körlunum en tveir þeirra sem eru skráðir eiga mjög svipaðan tíma og Baldvin; Ted Higgins á best 3:39,52 mínútur og Jack Higgins á best 3:39,55 mínútur, en þeir eru báðir frá Englandi. 1500 m hlaup karla er síðasta grein mótsins og fer af stað klukkan 14:20 og er óhætt að segja að það sé þess virði að gera sér ferð í Laugardalshöllina til að fylgjast með þessu hlaupi.
Keppnin í 60 m hlaupi karla verður líka spennandi en þar skilur aðeins 1 sekúndubrot að þá þrjá sem eiga hröðustu tímana. Það eru þeir Dylan Bhatti frá Englandi sem á best 6,91 sek og svo FH-ingarnir Kristófer Þorgrímsson og Daníel Ingi Egilsson sem báðir hafa hlaupið hraðast á 6,92 sek. Fyrri riðill 60 m hlaups karla er á dagskrá klukkan 13:16 og seinni riðillinn klukkan 13:20.
Í 60 m hlaupi kvenna mætir Christina Alba Marcus Hafliðadóttir (Fjölnir) á brautina, en hún er nýbúin að bæta aldursflokkamet í greininni þegar hún kom í mark á 7,44 sek á MÍ 15-22 ára um liðna helgi en það er annar hraðasti tími íslenskrar konu í greininni frá upphafi. Það verður virkilega gaman að sjá hvað hún gerir á laugardaginn. Hún mun fá hörkukeppni frá hinni ensku Saskia King sem á best 7,49 sek og Eir Chang Hlésdóttur (ÍR) sem á best 7,53 sek. Fyrri riðill 60 m hlaups kvenna er á dagskrá klukkan 13:08 og seinni riðillinn klukkan 13:12.
Íslandsmethafinn í 200 m hlaupi kvenna, Eir Chang Hlésdóttir (ÍR), er að sjálfsögðu meðal keppenda í 200 m hlaupinu á laugardaginn en hennar besti tími er 23,44 sek. Hún mun fá keppni frá annarri ungri og frábærri frjálsíþróttakonu, Ísold Sævarsdóttur (FH) sem hefur hlaupið hraðast á 24,93 sek. Fyrri riðill 200 m hlaups kvenna er á dagskrá klukkan 13:38 og seinni riðillinn klukkan 13:43.
Það lítur út fyrir að 400 m hlaup karla verði spennandi en þar á besta tímann Ívar Kristinn Jasonarson, 47,76 sek, en Ethan Kirby frá Englandi á best 49,03 sek. 400 m hlaup karla verður ræst klukkan 14:00.
Kúluvarpskeppnin lofar einnig góðu en þar keppa saman konur og piltar U18 og U20. Kvennamegin mætir Erna Sóley Gunnarsdóttir (ÍR) að sjálfsögðu í hringinn en hún er Íslandsmethafi í greininni en Íslandsmet hennar innanhúss er 17,92 m. Hún fær hörkukeppni frá hinni ensku Sophie McKinna sem á best 18,82 m. Kúluvarpið byrjar klukkan 13:50.
Langstökkskeppnin er einnig blönduð, karlar og konur keppa saman, og þar gæti kvennakeppnin orðið ansi spennandi. Þar á Georgina Scott frá Englandi besta árangurinn, 6,51 m, en Birna Kristín Kristjánsdóttir (FH) er þar skammt frá en hún hefur lengst stokkið 6,46 m. Langstökkskeppnin byrjar klukkan 13:30.
Auk ofannefndra er fjöldi íþróttafólks skráður til leiks og um að gera að fylgjast vel með á Roster, en þar má sjá tímaseðil, keppendalista og úrslit.
Sjáum vonandi sem allra flesta í stúkunni á laugardaginn, þetta stefnir í góða frjálsíþróttaveislu.