Íslenska landsliðið í frjálsíþróttum átti magnað mót í 3. deild Evrópubikars sem fram fór í Maribor í Slóveníu í síðustu viku. Ísland vann stigakeppnina með glæsibrag og tryggði sér sæti í 2. deild eftir tvö ár. Fjögur Íslandsmet voru sett og íslenskir keppendur lentu í einu af þremur efstu sætunum í 26 greinum af þeim 37 sem keppt var í. Það undirstrikar enn frekar breidd og styrk liðsins.
Frammistaðan vakti verðskuldaða athygli víða og tónninn var gefinn strax í fyrstu grein keppninnar, þar sem íslenska liðið tók forystu og hélt henni ótrauð allt mótið.
„Ég hef komið nálægt Evrópubikarkeppni landsliða allt frá 1987 og þetta er að mínu mati sterkasta liðsframmistaða sem ég hef orðið vitni að“, segir Guðmundur Karlsson, afreksstjóri FRÍ. „Að sigra í 15 landsliða deild með þessum yfirburðum gerist ekki nema með framlagi allra sem að keppninni komu og það má alveg berja sér á brjóst með það. Tónninn var gefinn strax frá fyrstu grein og við tókum forystu í stigakeppninni og litum ekki til baka eftir það. Fjögur Íslandsmet og fullt af persónulegum bætingum hjálpuðu auðvitað til og juku jafnt og þétt á samstöðu og stemningu innan hópsins. Það var sannarlega tekið eftir þessum glæsilega árangri víða, ekki síst innan Frjálsíþróttasambands Evrópu, að í raun ekki fjölmennari þjóð en Ísland sigri 14 aðrar þjóðir í liðakeppni.“
Við samanburð við önnur lönd í deildinni, eins og Aserbaídsjan, Georgíu, Moldóvu og Bosníu og Hersegóvínu, verður árangurinn enn áhrifameiri, en þessi ríki búa flest yfir margfalt fleiri íbúum en Ísland. Að ná þessum árangri með innan við 400 þúsund íbúa staðfestir að íslenskt afreksíþróttafólk og umgjörðin í kringum það stendur framarlega í Evrópu.
Andinn innan hópsins var einnig til fyrirmyndar, sem skilaði sér bæði í árangri og samstöðu. Í viðtali við FRÍ eftir mótið lýstu fyrirliðar landsliðsins, Erna og Baldvin, mikilli ánægju með gengi liðsins, bætingar og frábæra stemningu sem ríkti í hópnum
„Hvernig er annað hægt en að hrífast með þegar okkar glæsilega íþróttafólk stendur sig svona vel?“ segir Freyr Ólafsson, formaður FRÍ. „Þessi uppskera sýnir hvernig agað uppbyggingarstarf fagfólks og stuðningur við okkar öfluga íþróttafólk er að skila árangri. Það gerir enginn neitt einn, en hér leggjast allir á eitt, róa að sama marki – þá er gaman að taka þátt. Sigrar vinnast!“
Ísland keppir því í 2. deild Evrópubikars næst þegar keppnin fer fram, árið 2027 – með byr undir báða vængi eftir þennan stórkostlega sigur. Lesa nánar um lokaniðurstöðuna hér.