Eftir öruggan sigur Íslands í 3. deild Evrópubikars landsliða í frjálsíþróttum, þar sem liðið tryggði sér sæti í 2. deild eftir tvö ár, ræddum við við fyrirliðana Ernu Sóleyju Gunnarsdóttur og Baldvin Þór Magnússon um árangurinn, andann í hópnum og einstaka stemningu í íslenska liðinu.
Hvernig líður ykkur núna þegar ljóst er að Ísland hefur unnið 3. deildina og fer því upp um deild?
Erna: Bara stórkostlega! Við erum ofboðslega stolt af þessu.
Baldvin: Það er miklu skemmtilegra að vera í 2. deild heldur en í 3. deild. Það er alveg klárt.
Hvernig hefur verið að fylgjast með þessum frábæra árangri sem liðið hefur náð á mótinu?
Erna: Þetta hefur verið æðislegt – svo mikið af Íslandsmetum og persónulegum bætingum. Við gætum ekki verið stoltari af íþróttafólkinu okkar. Þetta hafa verið tveir frábærir dagar.
Baldvin: Ég var í stúkunni allan daginn í gær og það var nóg að fylgjast með! Ótrúlega gaman að sjá hve vel öllum gekk – þetta hefur verið frábært.
Það hlýtur að vera einstakt að vera fyrirliðar svona glæsilegs hóps – hvað viljið þið segja um íslenska liðið í ár?
Baldvin: Þetta hefur verið virkilega skemmtilegur hópur. Mikið stuð í stúkunni og flottur liðsandi – allir leggja sig fram og vinna saman að sameiginlegu markmiði. Það var klárt markmið að komast upp um deild og allir lögðu sig fram til að ná því.
Erna: Takk fyrir að vera æðisleg og gera ykkar besta – við gætum ekki beðið um betri hóp. Þetta hefur verið ótrúlega skemmtilegt.
Má segja að stemmingin í hópnum hafi verið góð, bæði innan vallar og utan?
Bæði: Já, algjörlega!
Erna: Það eru margir ungir í hópnum og við erum mjög spennt að fylgjast með hvernig þeim mun ganga í framtíðinni.
Er eitthvað sem stendur sérstaklega upp úr frá þessum tveimur dögum?
Erna: Liðsandinn! Við fáum sjaldan að keppa í svona liðamótum í frjálsum, þannig að það var geggjað að vera hluti af þessu liði.
Baldvin: Mér fannst líka gaman hvað sigurinn var aldrei í hættu. Við vissum hvert við vorum að fara – upp!
Við þökkum Ernu Sóleyju og Baldvini Þór kærlega fyrir spjallið og óskum þeim, og íslenska liðinu, innilega til hamingju með árangurinn og sigurinn í 3. deild Evrópubikars.
Sjá má ítarlega umfjöllun um gengi íslenska liðsins á Evrópubikar hér og hér.